ޅ. އޮޅުވެލިފުށީގެ ބިން ހިއްކުމާއި ބޯހިޔާވަހިކަން އަދި ޕިކްނިކް އައިލެންޑްގެ ވައުދުފުޅު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެ ރަށަށް ވެވަޑައިގަންނަވައިފިއެވެ.
"އުފާވެރި އަމާންރާއްޖެ" ކެމްޕޭނަށް ޅ. އޮޅުވެލިފުއްޓަށް ވަޑައިގެން ރައީސް ވިދާޅުވީ މި ވޭތުވެދިޔަ 5 އަހަރުގެ ތެރޭގައި ތަފާތު އިންގިލާބީ ބޮޑު ބަދަލުތަކާއި ކުރިއެރުންތަކެއް މި ރާއްޖެއަށް ގެނެސްދެއްވާފައިވާ ކަމަށެވެ. ރައީސް ވިދާޅުވީ މީހުން މަދުރަށެއް ބޮޑުރަށެއް ތަފާތު ނުކޮށް އަސާސީ ހިދުމަތްތައް ދިނުމުގައި މަސައްކަތް ކުރައްވާފައިވާ ކަމަށެވެ. އަދި އޮޅުވެލިފުށީގައި ބައެއް މަސައްކަތްތައް ނިމި އަނެއްބައި މަސައްކަތްތައް ނިމެމުންދާ ކަމަށެވެ. ރައީސް ވިދާޅުވީ ގައުމީ ތަރައްގީއަކީ ހަމަޖެހޭ، އަމާން އުފާވެރި ރާއްޖެއެއްގައި އުޅުން ކަމަށެވެ.
ރައީސް ވިދާޅުވީ ރާއްޖެއަކީ ފުދުންތެރި ގައުމެއް ކަމަށާއި، ސިޔާސަތުތައް ނެތުމުގެ ސަބަބުން މީގެ ކުރިން ތަރައްގީ ގެނެސްފައިނުވާ ކަމަށެވެ. ރައީސް ވިދާޅުވީ އުފާވެރި އަމާން ރާއްޖޭގައި އުފާވެރިކަމާއެކުގައި ހަމަޖެހޭ ދިރުއުޅުމެއް ބޭނުންވާނަމަ އަސާސީ ހިދުމަތްތައް ލިބެންޖެހެ ކަމަށެވެ. އަދި މި ކަންކަން ލިބެން ފެށީ އަދިކިރިޔާ ކަމަށާއި، މި އެޅުނީ ބިންގާ ކަމަށެވެ.
ރައީސް ވިދާޅުވީ އަމާޒަކީ ބިން ކުދި ރަށްތައް ހިއްކާ ބޯހިޔާވަހިކަން ފޯރުކޮށްދެއްވުން ކަމަށާއި، އޮޅުވެލިފުށީގެ ބިން އިތުރުކޮށް ރަށަށް ބޭނުންވާ ބޯހިޔާވަހިކަން ފޯރުކޮށްދިނުމަށްޓަކައި ފުލެޓް ނުވަތަ ރޯ ހައުސް އަޅުއްވާނެ ކަމަށެވެ. ރައީސް ވިދާޅުވީ އަމިއްލަ ގޯތީގައި ގެދޮރު އަޅާފައި ނެތް ފަރާތްތަކަށް ލޯން ދޫކުރަން ހާއްސަ ބޭންކެއް ގާއިމްކޮށް ލޯން ފޯރުކޮށްދޭނެ ކަމަށެވެ.
ރައީސް ވިދާޅުވީ ވާދަވެރިން ވާ ވައުދުތަކާ މެދުގައި ރައްޔިތުން ވިސްނާލަން ޖެހޭ ކަމަށެވެ. އެގޮތުން ހައުސިންގ ލޯން 6 ޕަސެންޓަށް ކުޑަކޮށްދެއްވާނެކަމަށް ވިދާޅުވުުމުން، އަނެއްދުވަހު އިދިކޮޅު ކެންޑިޑޭޓް އަރާ 5 އިންސައްތައަށް ކުޑަކޮށްދޭނަމޭ ބުނަމުންދާ ކަމަށެވެ.
އަޅުގަނޑުމެން އިހައްދުވަަހަކު އިއުލާންކުރީ ރޯދަމަހު ގޭގައި ތިބެގެން މަސައްކަތް ކުރެވޭ ގޮތް ހަދައިދޭނަމޭ. އިހައްދުވަހަކު ވިދާޅުވީ 10 ދުވަސް ބަންދުކުރާނަމޭ. ތިބޭފުޅުން ވިސްނާވަޑައިގަންނަވައްޗޭ އެހެން ބޭފުޅުން ވާ ވައުދުތަކާ މެދު. އެއްޗެއް ބުނާއިރަށް ކުޑަކޮށް ބަދަލުކޮށްލާފައި ދެން ބުނަމުން ގެންދަނީ. އެހެން ބޭފުޅުން ބުނަމުންދޭ އެހެން ރަށެއްގައި އެއަރޕޯޓެއް އަޅަމުންދާނަމޭ 1200 މީޓަރުގެ. ބުނާ އިރުގައި އެ ބުނާ ރަށުގައި 1600 މީޓަރުގެ އެއަރޕޯޓެއް އަސްލަމް އެބަ އަޅާ. ރަހުނެއް ނެތި ސޮފްޓް ލޯން މިހާރުވެސް ދެމުންދާއިރު، އެހެން ކެންޑިޑޭޓަކު ބުނަނީ ލޯނު ދޭނަމޭ. މިއީ މިހާރުވެސް ކުރަމުންގެންދާ ކަމެއް.ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ވިދާޅުވީ ވަޑައިގެންނެވި ރަށްތަކުން ފެނިވަޑައިގަންނަވަނީ އެއްބުރުން އިންތިހާބު ކާމިޔާބުކުރެއްވޭނެކަން ކަމަށާއި، މިއަދު ވޯޓެއް ނެގިޔަސް އެކަން ކާމިޔާބުކުރައްވާނެ ކަމަށެވެ. އަދި މާދަމާ ވޯޓު ނަގައިފިނަމަ އެއަށްވުރެ ރަނގަޅުވާނެ ކަމަށާއި 9 ސެޕްޓެމްބަރުގައި ވޯޓު ނަގައިފިއްޔާ މާ ބޮޑުތަނުން ކާމިޔާބުކުރައްވާނެ ކަމަށެވެ.
ރައީސް ވިދާޅުވީ އޮޅުވެލިފުށީގެ ތަރައްގީއަށްޓަކައި ކުރައްވަން ނިންމަވާފައިވާ ކަންކަން އެބަހުރި ކަމަށާއި، އޭގެ ތެރެއިން އެއްކަމަކީ ބިން ހިއްކާ ބޯހިޔާވަހިކަން ފޯރުކޮށްދެއްވުން ކަމަށެވެ. ރައީސް ވިދާޅުވީ އޮޅުވެލިފުށީގެ ފެނާ ނަރުދަމާގެ މަސައްކަތް ދަނީ ނިމެމުން ކަމަށާއި، ދެން އޮންނާނީ މަގު ހެދުން ކަމަށެވެ. އެގޮތުން ރަށުގެ ބޮޑެތި މަގުތަކުގައި ތާރުއެޅާނެ ކަމަށާއި އަންނަ ދައުރުގެ ތެރޭގައި އެ މަސައްކަތްކޮށްދެއްވާނެ ކަމަށެވެ.
މީގެ އިތުން ސިއްހީ ހިދުމަތް ރަނގަޅުކުރުމަށްޓަކައި ސިއްހީ މަރުކަޒުގެ ހިދުމަތް 24 ގަޑިއިރަށް ބަދަލުކޮށް ރަށަށް ބޭނުންވާ އޭޓީއެމް އަދި ކައުސިލް އައު އޮފީސް އިމާރާތްކޮށްދެއްވާނެ ކަމަށް ވެސް ރައީސް ވިދާޅުވިއެވެ. ރައީސް ވިދާޅުވީ ރަށުގެ ރައްޔިތުންގެ ފަރާތުން އިތުރު މިސްކިތެއް އަޅައިދިނުމަށް އެދިފައިވާތީ މިސްކިތެއް ބިނާކޮށްދެއްވާނެކަމަށެވެ.
މީގެ އިތުރުން ބޮޑުފިނޮޅަކީ ޓުއަރިޒަމަށް ކަނޑައަޅާފައިވާ ރަށެއް ކަމަށާއި، ނަމަވެސް ރަށުގެ ރައްޔިތުން އެ ރަށް ޕިކްނިކް އައިލެންޑަކަށް ބަދަލުކޮށްދިނުމަށް އެދިފައިވި ނަމަވެސް، އެމަނިކުފާނަށް ފެނިވަޑައިގަންނަވަނީ އެ ރަށް ޓުއަރިޒަމަށް ދޫކޮށްލެއްވުން ކަމަށް ރައީސް ވިދާޅުވިއެވެ. އޭގެ ބަދަލުގައި ބިން ހިއްކުމުގެ މަސައްކަތް ކުރާއިރު ކައިރީގައި ޕިކްނިކް އައިލެންޑެއް ތަރައްގީކުރައްވާނެ ކަމަށް ރައީސް ވިދާޅުވިއެވެ.
