ފޭސްބުކް ހާވަމުންދަނިކޮށް ކުރީގެ ގައުމީ ކެޕްޓަން ޝާހު އިސްމާއީލް (ސާޔާ) އޭނާގެ ޕޭޖަށް ލާފައި ފޮޓޯއެއް ފެނިފައި ޝައުގުވެރިކަމާއެކު ބަލައިލެވުނެވެ. ފޮޓޯ ނަގާފައިވަނީ އއ. ހިމަންދޫގަ އެވެ. ފޮޓޯއިން ފެންނަނީ ޝާހު އާއި އޭނާގެ އެކުވެރިޔާ މުހައްމަދު ރަޝީދު ނުވަތަ މަބޫ އެވެ.

މަބޫ އަކީ ކާކު ހެއްޔެވެ؟ އެއީ ރާއްޖޭގެ ކުރީގެ އެއްވަނަ ގޯލްކީޕަރެވެ. ނުވަދިހައިގެ ތެރޭގައި ދިވެހި ގައުމީ ޓީމަށް ސާފް ގޭމްސްގައި މޮޅަށް އޭނާ ކުޅުނެވެ. ކްލަބް ލެގޫންސާއި ޔޫތު އަދި ވިކްޓަރީ އާއި އައިއެފްސީގެ ގޯލު ހުށިޔާރު ކަމާއެކު ބަލަހައްޓައިދިނެވެ. އޭގެ ފަހުން އަތޮޅުތެރޭގެ ގިނަ ޓީމުތަކަކުންވެސް މަބޫ ފެނިގެންދިޔަ އެވެ. އޭނާ އަކީ ރާއްޖެ ދުށް ކުޅަދާނަ ކީޕަރެކެވެ. ރާއްޖޭގެ އެންމެ މޮޅު ކީޕަރުގެ މަގާމު ދެ ފަހަރު ހޯދި އެވެ.

މަބޫ މިހާރު ދިރިއުޅެނީ އއ. ހިމަންދޫގަ އެވެ. އޭނާ އަކީ ވެރިކަންކުރާ އެމްޑީޕީގެ ވަރަށް ބޮޑު ސަޕޯޓަރެކެވެ. ކެމްޕޭނުގެ މުހިންމު ވަގުތުތަކުގައި އަބަދުވެސް ހުންނަނީ ރީނދުލާއި އެމްޑީޕީއާ ގުޅިފައިވާ ޕާޓީތަކުގެ ކުލައިން ފަހާފައިވާ ގަމީހާއި ފަޓުލޫގަ އެވެ. މިކަން މީގެ ކުރިން ފެނިފައިވެ އެވެ. ފުޓްބޯޅައިގެ ހަރަކާތަކުން އޭނާ އެންމެ ފަހުން ފެނިގެންދިޔައީ 2012 ވަނަ އަހަރުގެ ވެޓަރަންސް މުބާރާތުގައި ވިކްޓަރީއަށް ކުޅެނިކޮށެވެ.

އޭނާއާއެކު ބައެއް ޓީމުތަކަށް ކުޅުނު ކުރީގެ އެއްވަނަ ފޯވަޑް އަދި އެފްއޭއެމުގެ ކުރީގެ ޖެނެރަލް ސެކްރެޓަރީ ޝާހު އަކީ މިހާރު އެމްޑީއޭގެ ސެކްރެޓަރީ ޖެނަރަލް އެވެ. މި އެކުވެރިން ބައްދަލުވިއިރު މަބޫ ރައީސްގެ އިސްތިގްބާލަށް ގޮސްހުރީ ރީނދުލާއި ފެއްސާއި އޮރެންޖް ކުލަ ގުޅުވައިގެން ފަހާފައިވާ ގަމީހަކާއި ހަރުވާޅަކާއި ތާކިހާއެއް އަޅައިގެން ރީނދޫ ކުޑައެއް ހިފައިގެންނެވެ. ޝާހު ފޭސްބުކަށްލި މި ފޮޓޯ ޝައުގުވެރި އެއްޗަކަށްވި އެއް ސަބަބަކީ ވެސް އެއީ އެވެ.

ޝާހު ބުނީ މަބޫއާ ދިމާވުމުން ވަރަށް އުފާވި ކަމަށާއި އެމީހުންގެ ރަންޒަމާނުގެ ވާހަކަ ހިއްސާކޮށް ވަރަށް އެކުވެރި، އުފާވެރި ވަގުތުކޮޅެއް މަބޫއާއެކު ހޭދަކޮށްލެވުނު ކަމަށެވެ.