އޭއެފްސީގެ ޕޯޓަލަކީ ކެންޑިޑެންސީ ބާތިލުކުރުމަށް އޮތް ހުއްޖަތެއް ނޫން: ސާޔާ

ޤައުމީ ޓީމުގެ ކުރީގެ ފޯވާޑް، އަޙުމަދު ޠާރިޤް (ޓޮމް)ގެ ކެންޑިޑެންސީ ބަލައި ނުގަތުމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިލެކްޓޯރިއަލް ކޮމެޓީން ނިންމި ނިންމުމަކީ، ހަރުދަނާ އެއްވެސް އަސާސެއްގެ މައްޗަށް ބިނާކޮށް ނިންމި ނިންމުމެއް ނޫން ކަމަށް އެފްއޭއެމްގެ ކުރީގެ ޖެނަރަލް ސެކްރެޓަރީ ޝާހު އިސްމާއީލް (ސާޔާ) ވިދާޅުވެއްޖެއެވެ.

ސާޔާ މިހެން ވިދާޅުވީ، ޓޮމްގެ ކެންޑިޑެންސީ ބަލައި ނުގަތުމަށް އިލެކްޓޯރިއަލް ކޮމެޓީން ނިންމި ނިންމުމާ ގުޅޭ ގޮތުން، "ރާއްޖެ އެމްވީ"އާ ވާހަކަ ދައްކަވަމުންނެވެ. އެގޮތުން ސާޔާ ފާހަގަ ކުރެއްވި ގޮތުގައި އިލެކްޓޯރިއަލް ކޮމެޓީގެ ނިންމުމަކީ އިންސާފުން އެއްކިބައިވެ ތިބެ ފުޓްބޯޅާއިގައި ޤައިމްވެފައިވާ އޮންނަ ޖޫރިސްޕުރުޑެންސް ފަހުމުނުވެ ތިބެ ނިންމި ނިންމުމެއްކަން ޤަބޫލް ކުރުމުގެ ފުރުސަތުއޮތް ކަމަށެވެ. އަދި ވަކި ފަރާތަކަށް ބުރަވެ، ނުވަތަ ކޮންމެވެސް ނުފޫޒެއްގައި ޖެހި އިލެކްޓޮރަލް ކޮމިޓީގެ މިނިވަންކަން މުޅިން ގެއްލިފައިއޮތް މަންޒަރު އެނިންމުމުން އިހްސާސް ކުރުމުގެ ފުރުސަތުއޮތްކަމަށް ވެސް ސާޔާ ވަނީ ވިދާޅުވެފަ އެވެ.

ކުލަބު ވެލެންސިއާގެ ބޯޑަށް އައިސްފައިވާ ބަދަލާ ގުޅޭ ގޮތުން ސާޔާ ވިދާޅުވީ، ސަރަހައްދީ ފުޓުބޯޅަ އިދާރާ (އޭއެފްސީ)ގެ ކްލަބް ލައިސަންސް ޕޯޓަލަކީ އޭ.އެފް.ސީ މުބަރާތްތަކުގައި ވާދަކުރާ ކްލަބްތަކުން، އޭއޭފްސީ ކަލްބް ލައިސަންސްގެ ރެގިއުލޭޝަންގެ ބަޔާންކުރާ މިންގަނޑާއި އެއްގޮތަށް ފުރިހަމަ ކުރަންޖެހޭ ކްރައިޓީރިއާތައް އޭއެފްސީއާއި ހިއްސާކުރުމަށް ބޭނުން ކުރަމުންދާ ޕޯޓަލްއެއްކަމަށެވެ. އަދި އެފްއޭއެމް އިން އެޕޯޓަލްއަށް އެކްސަސް ދީފައި އޮންނަނީ އެފްއޭއެމްގެ ކްލަބް ލައިސަންސް އޮފިސަރު މަގާމްގައި ހުރި ޢަބްދުﷲ ޝިބާއު (ޝިބާ) އަށްކަމަށެވެ.

މިގޮތުން ޕޯޓަލްއަށް ކްލަބްތަކުގެ މަޢުލޫމާތު ހިއްސާކުރުމަށް ވަކި މުއްދަތެއް ކަނޑައެޅިފައިވާ އޮންނަކަމަށާއި އަދި މުއްދަތުގެ ފަހުން އިތުރު މައުލޫމާތެއް ޕޯޓަލްގައި ހިއްސާކުރާނަމަ، އެކަން ކުރެވެން އޮންނަ މަގަކީ ކްލަބް ލައިސަން އޮފިސަރު ޝިބާގެ އެހީތެރިކަމާއި އެކުގައިކަން ވެސް ސާޔާ ފާހަގަކުރެއްވި އެވެ. ކްލަބް ލައިސަންސް ޕޯޓަލްގައި ހިމަނަން ޖެހޭ ކްލަބްތަކުގެ ހިންގާ ކޮމިޓީގެ މަޢުލޫމާތު ވާންޖެހޭނީ ޤާނުނީ ހައިސިއްޔަތުން ލިބިދީފައިވާ ހިންގާ ކޮމިޓީއެއް ކަމަށާއި، ކްލަބްތަކުގެ ހިންގާ ކޮމިޓީއަށް ޤާނޫނީ ހައިސިއްޔަތު ހޯދަން ކަނޑައެޅިފައިވާ މަގަކީ ކޮމިޝަނަރ އޮފް ސްޕޯރޓްގެ އެންޑޯސްމަންޓްކަން ފާހަގަކުރެއްވި އެވެ.

އެފްއޭއެމްގެ އިލެކްޓޮރަލް ކޮމިޓީންގެ މި ނިންމުން ފާހަގަވެގެން ދަނީ ކޮމިޝަނަރ އޮފް ސްޕޯރޓްސް އަކީ އެއްވެސް ބާރެއް އަދި މަސްއޫލިއްޔަތެއް އޮންނަ މީހެއްގެ ގޮތުގައި ނޫން ކަމަށް ސާޔާ ވަނީ ވިދާޅުވެފަ އެވެ. ކޮމިޝަނަރ އޮފް ސްޕޯރޓްސް، ކުރިން ރަޖިސްޓްރީ ކޮށްދީފައިވާ ކްލަބެއްގެ ހިންގާ ކޮމިޓީގެ މެންބަރުން އަލުން ބަދަލުވެގެން އައި ނަމަވެސް، އޭއެފްސީ ޕޯޓަލްއަށް އެ ހިންގާ ކޮމިޓީގެ މައުލޫމާތު އަޕްލޯޑް ނުކޮށް އޮތް އޮތުމުގެ މައްޗަށް ބިނާކޮށް، އެފްއޭއެމްގެ އިލެކްޓޮރަލް ކޮމިޓީން ނިންމި އެނިންމުމަކީ ބުއްދި ޤަބޫލް ކުރަންދަތި ނިންމުއް ކަމަށް ސާޔާ ވިދާޅުވި އެވެ.

އޭއެފްސީގެ ކްލަބް ލައިސަންސް ޕޯޓަލްއެއީ ކްލަބްތަކުގެ ހިންގާ ކޮމިޓީގެ ސައްޙަކަމާއި އަދި ޤާނޫނީ ހައިސިއްޔަތު ބަލައިގަންނަން ބޭނުކުރާ ޕޯޓަލްއެއްކަން އެފްއޭއެމްގެ އިލެކްޓޮރަލް ކޮމިޓީއަށް އިހްސާސްވުމަކީ މަޖުބޫރީ ހާލަތެއްގެ ތެރެއިން ނިންމި ނިންމުމެއްކަން ވެސް ސިފަވާކަމަށް ސާޔާ ޤަބޫލު ކުރައްވަ އެވެ. އޭނާ ވިދާޅުވި ގޮތުގައި ދިވެހިރާއްޖޭގައި ކުލަބު ޖަމުއިއްޔާއެއް ރަޖިސްޓްރީކޮށްގެން ކުރިއަށް ދާން ޖެހެނީ، ކުޅިވަރު ޤާނޫނުގެ ތެރެއިންނެވެ. އެ ޤާނޫނުގައި ބުނެފައިވާ ގޮތުން އެފަދަ ޖަމުއިއްޔާއެއްގެ ބެލެނިވެރި ފަރާތަކީ، ކޮމިޝަނަރ އޮފް ސްޕޯރޓްސް އެވެ. އެބަޔަކު ކަނޑައަޅާ ހިންގާ ކޮމެޓީއެއް ނުވަތަ ބޯޑެއް ކޮމިޝަންގައި ރަޖިސްޓްރީކުރުމުން، އެ ބަޔަކަށް ޤާނޫނީ ހައިސިއްޔަތު ލިބޭނެކަން ސާޔާ ވަނީ ފާހަގަ ކުރައްވައިފަ އެވެ.

އަދި އެފަދަ ބަދަލެއް ގެންނަން އެއްވެސް ހާލެއްގައި އޭއެފްސީ ނުވަތަ އެފްއޭއެމްގެ ރައުޔަތް ހޯދަން ނުޖެހޭނެކަން ވެސް އެނާ ފާހަގަ ކުރެއްވިއެވެ. އެފްއޭއެމްގެ އިލެކްޓޯރިއަލް ކޮމެޓީގެ ނިންމުމަށް އަލި އަޅުވާލައި ސާޔާ ވިދާޅުވީ، ކޮމެޓީން ގޮތް ނިންމަން ޖެހޭނީ ދިވެހިރާއްޖޭގެ ކޮމިޝަނަރ އޮފް ސްޕޯރޓްސްގެ އެންޑޯޒްމަންޓާ އެކު ޤާނޫނީ ހައިސިއްޔަތު އޮތް ބައެއްތޯ ބެލުމަށްފަހު ކަމަށެވެ. އެއީ ކުލަބަކަށް ލިބިގެންވާ ޙައްގެއް ކަމަށާއި، އޭއެފްސީގެ ޕޯޓަލަކީ ކެންޑިޑެސީއެއް ބާތިލްކޮށްލަން ގެންގުޅެވޭނެ ހަމައެއް ނޫން ކަމަށް ސާޔާ ވިދާޅުވި އެވެ.