ދިވެހި ޕްރިމިއާ ލީގުގެ މަސައްކަތަށް ޝާހް އެފްއޭއެމަށް

ދިވެހި ޕްރިމިއާ ލީގުގެ ޑިރެކްޓާ އޮފް އެޑްމިނިސްޓްރޭޓަރެއްގެ މަގާމަށް ރާއްޖޭގައި އުފެދުނު އެންމެ މޮޅު އެއް ފޯވާޑް ޝާހް އިސްމާޢީލް (ސާޔާ) ހަމަޖައްސައިފިއެވެ.

ޝާހަކީ މީގެ ކުރިން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީގެ މަގާމާއި، އެ އިދާރާގެ ޑެޕިއުޓީ ޖެނެރަލް ސެކްރެޓަރީގެ މަގާމުގެ އިތުރުން ކުޅިވަރާ ބެހޭ ގައުމީ މަޖިލީހުގެ ރައީސްކަންވެސް ކުރެއްވި ބޭފުޅެކެވެ. ބުރާސްފަތި ދުވަހު ކުރެއްވި ޓްވީޓެއްގައި އެފްއޭއެމުގެ ރައީސް ބައްސާމް އަދީލް ޖަލީލް ވަނީ ދިވެހި ޕްރިމިއާ ލީގުގެ ޑިރެކްޓާ އޮފް އެޑްމިނިސްޓްރޭޓަރެއްގެ މަގާމަށް ޝާހް ހަމަޖެއްސިކަން އިއުލާންކޮށްފައެވެ.

ދިޔަ ޖުލައި މަހުގެ ތެރޭގައި އެފްއޭއެމުން ވަނީ މުޅި ރާއްޖެއިން ޕްރިމިއާ ލީގުގައި ވާދަކުރެވޭނެ ފޯމެޓް ދައްކާލާފައެވެ. އެފްއޭއެމުން އިއުލާންކުރި އައު ފޯމެޓުގައިވާ ގޮތުން ދިވެހި ޕްރިމިއާ ލީގު 2023-2024 ވަނަ އަހަރުގެ ސީޒަން ފަށާނީ މިހާރުވެސް ލީގުގައި ހިމެނޭ އަށް ޓީމާއެކުއެވެ. އޭގެ އިތުރުން ދެން ހިމެނޭނީ ހަތަރު ޒޯނުގެ ޗެމްޕިއަނުންނެވެ. މާލެ ޒޯނުގެ ޗެމްޕިއަން ގޮތުގައި އަންނަ އަހަރުގެ ދެވަނަ ޑިވިޝަނުގެ ޗެމްޕިއަނުންނަށް ޖާގަ ދޭއިރު، ދެން އޮތް ތިން ޖާގަ ދޭނީ ޒޯން ޗެމްޕިއަނުންނަށެވެ.

ކޮންމެ ޒޯނެއްގައިވެސް ލީގެއް ކުޅުމަށް ނިންމާފައިވާއިރު، ކޮންމެ ލީގެއްގައިވެސް ހަތަރު ޑިވިޝަން ހެދުމަށް ވަނީ ނިންމާފައެވެ. އެއީ ފުރަތަމަ ޑިވިޝަނާއި، ދެވަނަ ޑިވިޝަނާއި، ތިންވަނަ ޑިވިޝަނުގެ އިތުރުން އޯޕަން ޑިވިޝަނެކެވެ. އޯޕަން ޑިވިޝަނުގެ ބޭނުމަކީ ކޮންމެ ރަށެއްގައި ވެސް އޮންނަ ކޮންމެ ޓީމަކަށް ނުވަތަ ކޮންމެ ޖަމިއްޔާއަކަށް ބައިވެރިވުމުގެ ފުރުސަތު ދިނުމެވެ.

އައު ފޯމެޓާއެކު ދިވެހި ޕްރިމިއާ ލީގުގައި 12 ޓީމު ފެނިގެންދާއިރު، ދިވެހި ޕްރިމިއާ ލީގުގެ ރެލިގޭޝަނުގައި އަބަދުވެސް ކުޅެން ޖެހޭނީ އެންމެ ފުލަށްދާ ހަތަރު ޓީމެވެ. އެ ހަތަރު ޓީމު ކުޅޭނީ ޒޯންތަކުން އަންނަ ޗެމްޕިއަނުންނާއެކު ދެ ލެގުގެ އުސޫލުން ޕްލޭއޮފް މެޗެކެވެ. އަދި ޕްލޭއޮފްތަކުން ބަލިވާ ޓީމުތައް ކުޅެން ޖެހޭނީ އެ ޓީމެއް ހިމެނޭ ޒޯނެއްގެ ފުރަތަމަ ޑިވިޝަނުގައެވެ.

އެފްއޭއެމުން މައުލޫމާތޭ ގޮތުން ލީގު ފަށާއިރު ކޮންމެ ޒޯނެއްގައި ރީޖަނަލް އޮފީހެއް ހުންނާނެ ކަމަށެވެ. އެންމެ ފުރަތަަމަ ލީގުގެ އިންތިޒާމުތައް އެފްއޭއެމާއި އެ ޒޯން އޮފީހެއް ގުޅިގެން ކުރިއަށްގެންދާއިރު، ޒޯން އޮފީހުން ކަންތައްތައް ދަސްކޮށް އެކަމަށް ފަރިތަވާ މިންވަރަށް ބެލުމަށްފަހު މުސްތަގުބަލުގައި ޒޯން ލީގު އިންތިޒާމުކުރުމުގެ ފުރިހަމަ ބާރު ޒޯން އޮފީހަށް ދޭނެ ކަމަށް އެފްއޭއެމުން ބުނެއެވެ. އަދި ޕްރިމިއާ ލީގަށް ހާއްސަ ބޯޑެއް އެކުލަވާލެވި ސީއީއޯ އެއްވެސް ހަމަޖެހިގެންދާނެ ކަމަށް އެފްއޭއެމުން ވަނީ ބުނެފައެވެ.