ހަތަރު ވަނަ މޮޅާއެކު، އަލް އަހްލީ ސައުދީ ދެ ވަނަ އަށް

ސައުދީ ޕްރޯ ލީގުގައި އަލް ޓާއީއާ ދެކޮޅަށް ކުޅުނު މެޗުން މޮޅުވެ، އަލް އަހްލީ ސައުދީ ލީގު ތާވަލްގެ ދެ ވަނަ އަށް ޖެހިލައިފި އެވެ.

އަންގާރަ ދުވަހުގެ ރޭ ކުޅުނު މެޗު އަލް އަހްލީ ސައުދީން ކާމިޔާބު ކުރީ 2-0 އިންނެވެ. މެޗުގައި އަލް ޓާއީ އަށް އެންމެ ބޮޑު ގެއްލުމެއް ދެއްކީ، ބޮޑުބައި ދިހަ ކުޅުންތެރިންނާއެކު ކުޅެން ޖެހުމުންނެވެ. މެޗުގެ ފުރަތަމަ ހާފުގެ 35 ވަނަ މިނެޓުގައި އެ ޓީމުގެ އަލްފާ ސެމޭޑޯ އަށް ވަނީ ސީދާ ރަތް ކާޑު ދައްކައި ދަނޑުން ފޮނުވާލައިފަ އެވެ. އޭގެ ހަތަރު މިނެޓު ފަހުން އަލް އަހްލީ ސައުދީން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ މެންޗެސްޓަރ ސިޓީ ދޫކޮށް، ދާދި ފަހުން އެ ކުލަބަށް ބަދަލުވި އަލްޖީރިއާގެ ރިޔާދު މާރޭޒް އެވެ. މިއީ އަލް އަހްލީ ސައުދީ އަށް ބަދަލުވެ މާރޭޒް އެ ކުލަބަށް ކުޅެދިން ހަތަރު ވަނަ މެޗެވެ. ހަތަރު މެޗުން އޭނާ ވަނީ ދެ ލަނޑު ޖަހައިފަ އެވެ.

މެޗުގައި އަލް އަހްލީ ސައުދީގެ ދެ ވަނަ ލަނޑު އެ ޓީމުން ޖެހީ ދެ ވަނަ ހާފުގަ އެވެ. 59 ވަނަ މިނެޓުގައި އެ ލަނޑު ޖަހައިދިނީ އައިވަރީ ކޯސްޓުގެ މިޑްފީލްޑަރު ފްރޭންކް ކެސިއޭ އެވެ. މިއީ ބާސެލޯނާ ދޫކޮށް އަލް އަހްލީ ސައުދީ އަށް ބަދަލުވި ކެސިއޭ ވެސް އެ ކުލަބަށް ކުޅެދިން ހަތަރު ވަަނަ މެޗެވެ. ކެސިއޭ ވެސް ވަނީ މިހާތަނަށް އެ ކުލަބަށް ދެ ލަނޑު ޖަހައިދީފަ އެވެ.

މިއީ މި ސީޒަންގެ ލީގުގައި އެ ޓީމުން ކުޅުނު ހަތަރު ވަނަ މެޗެވެ. ހަތަރު މެޗުން ވެސް މޮޅުވެ 12 ޕޮއިންޓާއެކު، އަލް އަހްލީ ސައުދީ އޮތީ ލީގު ތާވަލްގެ ދެ ވަަނައިގަ އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އޮތް އަލް އިއްތިހާދަށް ވެސް ލިބެނީ 12 ޕޮއިންޓެވެ. އަލް އިއްތިހާދު ކުރި ހޯދަނީ ފައިދާ ލަނޑުންނެވެ. ލީގުގައި އަލް އަހްލީ ސައުދީ އަށް ދެން އޮންނާނީ އަންނަ ސެޕްޓެމްބަރު މަހުގެ ދެ ވަނަ ދުވަހު އަލް ފާތެހާ ދެކޮޅަށް ކުޅޭ މެޗެވެ.