ބޮޑު ބައި ދިހަ ކުޅުންތެރިންނާއެކު ކުޅެ، ލިވަޕޫލުން ނިއުކާސަލް ބަލިކޮށްފި

އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން ލިވަޕޫލް މޮޅުވެއްޖެ އެވެ.

އާދިއްތަ ދުވަހުގެ ރޭ ނިއުކާސަލްގެ އެސްޓީ ޖޭމްސް ޕާކުގައި ކުޅުނު މެޗު ލިވަޕޫލް ކާމިޔާބު ކުރީ ފަހަތުން އަރައި ދެ ލަނޑު ޖަހައިގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ނިއުކާސަލް އިންނެވެ. މެޗުގެ 25 ވަނަ މިނެޓުގައި ނިއުކާސަލަށް ލީޑު ނަގައިދިނީ ގޯޑޮން އެވެ. އެއީ ލިވަޕޫލްގެ ޑިފެންޑަރު ޓްރެންޓް އެލެކްސަންޑާ އާނޯލްޑަށް ހެދުނު ގޯހެއްގައި ލިބުނު ބޯޅަ ގޯލަށް ވައްދާލައިގެންނެވެ. ލިވަޕޫލްގެ ގޯލުގައި ހުރި އެލިސަން ބެކާ އެ ބޯޅަ ހުއްޓުވުމަށް މަސައްކަތް ކުރި ނަމަވެސް، ގޯޑޮން ވަނީ އެލިސަންގެ ފައި ދަށުން ބޯޅަ ގޯލަށް ވައްދާލައިފަ އެވެ. މެޗުގައި ލިވަޕޫލަށް އެންމެ ބޮޑު ގެއްލުމެއް ދެއްކީ 28 ވަނަ މިނެޓުގައި ކެޕްޓަން ވާޖިލް ވެން ޑައިކަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ. އެއީ ނިއުކާސަލްގެ އެލެކްސެންޑާ އީސާކަށް ވެން ޑައިކް ކުރި ފައުލަކަށް ރެފްރީ ދެއްކި ރަތް ކާޑެކެވެ.

މެޗުގެ ބާކީ ބައި ދިހަ ކުޅުންތެރިންނާއެކު ކުޅެ، ލިވަޕޫލުން ނަތީޖާ ހަމަހަމަ ކުރީ 81 ވަނަ މިނެޓުގަ އެވެ. އެ ޓީމަށް ނަތީޖާ ހަމަހަމަ ކޮށްދިނީ އުރުގުއޭގެ ޒުވާން ފޯވާޑް ޑާވިން ނޫނޭޒް އެވެ. ނިއުކާސަލްގެ އޭރިޔާ ތެރެއިން ތިރި ތިރިން އޭނާ ފޮނުވާލި ބޯޅަ ގޯލަށް ވަނީ އަރިމަތީ ދަނޑީގައި ޖެހިފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގެ ތެރޭގައި ލިވަޕޫލް މޮޅު ކޮށްދިނީ ވެސް ނޫނޭޒް އެވެ. އެއީ މިސްރުގެ ފޯވާޑް މުޙައްމަދު ޞަލާޙު ދިން ބޯޅައެއް ގޯލަށް ވައްދާލައިގެންނެވެ.

މިއީ މި ސީޒަންގެ ލީގުގައި ލިވަޕޫލް އިން ކުޅުނު ތިން ވަނަ މެޗެވެ. ތިން މެޗުގެ ތެރެއިން އެ ޓީމު ވަނީ ދެ މެޗުން މޮޅުވެ، އެއް މެޗުން އެއްވަރުވެފަ އެވެ. ޖުމުލަ ހަތް ޕޮއިންޓާއެކު ލިވަޕޫލް އޮތީ ހަތަރު ވަނައިގަ އެވެ. ލީގުގައި ދެން އެ ޓީމަށް އޮންނާނީ އަމިއްލަ ދަނޑުގައި ސެޕްޓެމްބަރު މަހުގެ ތިން ވަނަ ދުވަހު އެސްޓަން ވިލާއާ ދެކޮޅަށް ކުޅޭ މެޗެވެ.