"އުޅުނީ ކުދިންނާއެކު 10 ފޫޓު 10 ފޫޓު ގޮޅިއެއްގައި، މިއީ ހުވަފެނެއް ހަޤީޤަތަކަށްވުން"
ސަރުކާރުގެ ބިންވެރިޔާ ސްކީމުގެ ދަށުން ޝަރުތު ހަމަވި 19639 މީހުންނަށް ގޯތި ލިބޭ
ބިންވެރިޔާ ސްކީމްގެ ދަށުން ގޯތި ލިބުނު ބައެއް މީހުން
މާލޭ ސަރަހައްދުގެ ބޯހިޔާވަހިކަމުގެ މައްސަލަ ހައްލުކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވެވަޑައިގެންނެވި ވައުދުފުޅާ އެއްގޮތަށް މާލޭ ސަރަހައްދުން ގޯތި ކަނޑައި ދޭން ފަށާފައި ވަނީ އާދިއްތަ ދުވަހުއެވެ. ބިންވެރިޔާ ސްކީމްގެ ދަށުން އާއްމުންނަށް ގޯތި ދޫކުރުމުގެ މަރުހަލާގެ ތެރެއިން ފުރަތަމަ ގޯތިތައް ލިބުނު މީހުން ތިބީ ގޯތީގެ ހަޤީޤަތް ގަބޫލުކުރަން އަދިވެސް ދަތިވާ ފަދަ، ހައިރާންކަމެއްގައެވެ. އެތައް ދުވަހެއްގެ އިންތިޒާރު ނިމުމަކަށް އައިސް ގޯތިވެރިންނަށް ވުމުގެ ހުވަފެން ހަޤީޤަތަކަށް ވާކަން އަދިވެސް ޤަބޫލުކުރަން ގިނަ މީހުންނަށް ދައްޗެވެ.
ފުރަތަމަ ގޯތި ކަނޑާ ހަވާލު ކުރީ 20739، މުހައްމަދު ވިޝާލް އާއިއެވެ. އޭނާގެ ޝުއޫރުތައް ރާއްޖެއެމްވީ އާއި ހިއްސާކުރަމުން އޭނާ ބުނީ ގޯތި ލިބުމުން ވަރަށް އުފާވާ ކަމަށެވެ. ވިޝާލް ބުނީ މިއީ އޭނާ އަށް ފެނިދާނެ ދުވަހެއް ކަަމަށް ކުރިން އޭނާ ހީކޮށްފައިވެސް ނުވާ ކަމަށެވެ. އަދި އުންމީދަކީ މިފަދަ މަޝްރޫޢުތައް ކުރިއަށް ގެންގޮސް އޭނާ ފަދައިން އިތުރު ގިނަ ބަޔަކަށް ގޯތި ލިބުން ކަމަށް އޭނާ ވަނީ ބުނެފައެވެ.
ގޯތި ލިބުނު މީހުންގެ އިހުސާސްތައް ކިޔާދިނުމުން އެ މީހުންގެ މެދުގައި އޮތް އުފާވެރިކަން ވަރަށް ރަނގަޅަށް ހާމަވެއެވެ. އެގޮތުން ގޯތި ލިބުނު ފާތިމަދު ރަޝީދާ އާއި އޭނާގެ ފިރިމީހާ ވެސް ތިބީ ވަރަށް އުފަލުންނެވެ. މިއީ ވަރަށް ގިނަ މީހުންގެ ހުވަފެންތައް ހަޤީޤަތަކަށް ވުން ކަމަށް އޭނާ ސިފަކުރިއެވެ. އަދި ގޯތި ލިބުމަކީ ހަޤީޤަތަކަށް ވާނެ ކަމެއް ނޫނޭ ބުނަމުން ދަނިކޮށް އެކަމުގެ އަސްލު މިހާރު އެނގިގެން ގޮސްފައިވާ ކަމަށް އޭނާ ވަނީ ބުނެފައެވެ.
އޭނާގެ ފިރިމީހާވެސް ވަނީ ގޯތި ލިބުމަކީ ވަރަށް އުފާވެރިކަމެއް ކަަމަށް ބުނެފައެެވެ. އަދި މިއީ ހުވަފެނެއް ނޫން ކަމަށާއި މިއީ ހަޤީޤަތެއްކަން މިހާރު އެނގޭ ކަމަށް އޭނާ ވަނީ ބުނެފައެވެ.
ގޯތި ލިބުނު އިބްރާހިމް ރަޝީދު އަށް މިއަދަކީ ޖަޒުބާތީ ދުވަހެކެވެ. ސަބަބަކީ އަނބިމީހާ އާއި ކުދިންނާއެކު 10 ފޫޓު 10 ފޫޓު ގޮޅިއެއްގައި އުޅުނު ދިރިއުޅުން މުޅިން ބަދަލުކޮށްލުމެވެ. މިއީ އަމިއްލަ ގޯއްޗެއް ލިބުމަށް އެދި އޭނާ ކުރި ދިގު އިންތިޒާރާއި، ގޯއްޗަށް އެދި އޭނާ ދުށް ހުވަފެނެއް ހަޤީޤަތަކަށްވެގެން ދިޔަ ދުވަހެވެ.
ސަރުކާރުގެ ބިންވެރިޔާ ސްކީމުގެ ދަށުން ޝަރުތު ހަމަވި 19639 މީހުންނަށް ގޯތި ލިބެއެވެ. އެއީ 9000ށްވުރެ ގިނަ ބިމެވެ. ބިންވެރިޔާ ސްކީމްގެ ދަށުން ހުޅުމާލެއިން 1351 ބިން، ގުޅިފަޅުން 2218 ބިން އަދި ގިރާވަރު ފަޅުން 5432 ބިން ދޫކުރުމަށް ވަނީ ހަމަޖެހިފައެވެ. އެއީ ޖުމްލަ 9001 ގޯއްޗެވެ. މި ގޯތިތަކުގެ ތެރެއިން 1250 އަކަފޫޓާއި 1650 އަކަފޫޓާއި 2050 އަކަފޫޓުގެ ގޯތިތައް ދިނުމަށް ހަމަޖެހިފައި ވަނީ ހުޅުމާލެއާއި، ގުޅީފަޅާއި ގިރާވަރު ފަޅުންނެއެވެ. އޭގެ އިތުރުން 2450 އަކަފޫޓުން ފެށިގެން 4000 އަކަފޫޓާ ދެމެދުގެ ގޯތިތައް ދޫކުރާނީ ހުޅުމާލެއާއި ގުޅިފަޅުންނެވެ.
