އަންހެނުންގެ ވޯލްޑްކަޕް ނިންމުމުގެ ރަސްމިއްޔާތުގައި ސްޕޭން ފުޓްބޯޅަ ފެޑަރޭޝަނުގެ ރައީސް ލުއިސް ރުބިއަލެސް އެ ގައުމުގެ ކުޅުންތެރިއެއް ކަމަށްވާ ޖިނީ ހާމޯސޯ އަށް ބޮސްދިން މައްސަލަ ތަހުގީގުކުރަން ފީފާއިން ނިންމުމުން ރައީސް ކަމުން އިސްތިއުފާދޭން އޭނާ ނިންމައިފި އެވެ.
ދުނިޔޭގެ މަޝްހޫރު ކުޅިވަރު އޮންލައިން އީއެސްޕީއެން ވަނީ ހުކުރު ދުވަހު ރުބިއަލެސް އިސްތިއުފާދޭނެކަން ކަށަވަރުކޮށްދީފަ އެވެ.
ދުނިޔޭގެ ފުޓްބޯޅަ ޖަމިއްޔާ، ފީފާއިން ރުބިއަލެސްގެ މައްސަލަ ބަލަން ނިންމީ ވޯލްޑްކަޕް ނިންމުމުގެ ރަސްމިއްޔާތުގައި އަންހެން ކުޅުންތެރިކަށް އޭނާ ބޮސްދިނުމަކީ ފީފާގެ ގަވާއިދުގެ 13 ވަނަ މާއްދާއާ ހިލާފު އަމަލެއް ކަމަށް ބުނެ އެވެ. ފީފާއިން ރުބިއަލެސް އަށް ކުރަނީ އެ މާއްދާގެ އަހުލާގީ އަދި ނަޒާހަތްތެރިކަމަށް އަރައިގަތުމުގެ އަމަލެއް ކުރިކަމުގެ މައްސަލަ އާއި ފުޓްބޯޅައިގެ އިސް އޮފިޝަލަކު އަމަލުކުރަންޖެހޭ ކޯޑް އޮފް ކޮންޑަކްޓާ ހިލާފު އަމަލެއް ކުރިކަމުގެ މައްސަލަ އެވެ.
ފޯވަޑް ހާމޯސޯ އަށް ބޮސްދިން މައްސަލަ ބޮޑުވުމުން ރުބިއަލެސް، ވަނީ އޭނާގެ ދިފާއުގައި ވަރަށް ހަރުކަށިކޮށް އެހެން މީހުންނާ މުހާތަބްކޮށްފަ އެވެ. އެކަމަކު ސަލާމަތްނުވާވަރަށް ފާޑުކިއުން އަމާޒުވުމުން ފަހުން މައާފަށް އެދިވަޑައިގަތެވެ. އެކަމަކު ސްޕޭން ސަރުކާރުން ވަނީ މައާފަށް އެދުމުން އަދި ނުފުދޭ ކަމަށާއި މިއީ އިތުރަށް ތަހުގީގުކުރަންޖެހޭ މައްސަލައެއް ކަމަށް ބުނެފަ އެވެ. ރުބިއަލެސްއަށް ފާޑުކިޔައި ހެދި މީހުންގެ ތެރޭގައި ސްޕޭނުގެ ވަގުތީ ބޮޑުވަޒީރާއި ކުޅިވަރާ ބެހޭ ވަޒީރާއި އިންޓީރިއާ މިނިސްޓަރު ހިމެނެ އެވެ. އަދި ކުރީގެ ބައެއް ކުޅުންތެރިން ވެސް ވަނީ އޭނާ އަށް ފާޑުކިޔަން ފަށައިފަ އެވެ.
ރުބިއަލެސް އަށް ފާޑުކިޔާ ފަރާތްތަކުން ބުނަނީ އޭނާ ގޯސް އަމަލެއް ކުރީ ފީފާގެ ރައީސް އާއި ސްޕޭނުގެ ރާނީ އާއި އޭނާގެ ދަރިފުޅު ވެސް ސްޓޭޖްގައި ހުއްޓައި ކަމަށެވެ.
މުބާރާތް ނިންމުމުގެ ރަސްމިއްޔާތުގައި ސްޓޭޖްމަތީގައި ހުންނަވާ ރުބިއަލެސް ގެންދެވީ ސްޕޭން ކުޅުންތެރިންގެ ކަރުގައި ރަންމެޑަލް އަޅުވަން ސްޓޭޖަށް ވަޑައިގެން ކޮންމެ ކުޅުންތެރިޔަކާވެސް ވަކިވަކިން ބައްދައި، ސަލާމްކުރައްވާ އުފާ ފާޅުކުރައްވަމުންނެވެ.
ރުބިއަލެސް، ހާމޯސޯއަށް ބޮސްދެއްވި މައްސަލައާ ގުޅޭގޮތުން ނޫސްވެރިން ސުވާލުކުރުމުން ފޯވަޑް ހާމޯސޯ ރަސްމިއްޔާތަށްފަހު ބުނީ އޭނާ އެކަމާ ގަޔާނުވާ ކަމަށެވެ. މިކަމާ ފާޑުކިއުން އަމާޒުވުމުން ރުބިއަލެސް ފަހުން ވިދާޅުވީ އެއީ ތަށި ލިބުމުގެ އުފަލުގައި، އުފާފާޅު ކުރަމުންދިޔަ ވަގުތެއްގައި އެދުމެއްނެތި ކުރެވުނު ކަމެއް ކަމަށާއި ނަމަވެސް ހުރިހާ ގޮތަކުން ގޯހީ އޭނާ ކަމަށެވެ.
ސްޕޭންގެ އަންހެން ޓީމު ވޯލްޑްކަޕަށް ދިއުމުގެ ކުރިން ކުޅުންތެރިން ކޯޗާ ދެކޮޅަށް ފެޓިޝަނެއް ވެސް ހެދި އެވެ. އެއީ އަންހެން ކުޅުންތެރިންނަށް އޭނާ ޖިންސީ ފުރައްސާރަކުރާ ކަމަށް ބުނެ އެވެ. މި މައްސަލާގައި އެފްއޭއިން ދިފާއުކުރީ ކޯޗެވެ. އަދި އޭނާ ތަށި ހޯދީ އޭނާ އާ ދެކޮޅަށް ޕެޓިޝަންހަދައި ސޮއިކުރި 12 ކުޅުންތެރިއަކު ނުލައި ޓީމު އެކުލަވާލައިގެންނެވެ.
