އިންޑިއާގައި އިމާރާތްކުރަމުންދިޔަ ބްރިޖެއް ވެއްޓި، މަރުވި މީހުންގެ އަދަދު 26ށް

އިންޑިއާގައި އިމާރާތްކުރަމުންދިޔަ ބްރިޖެއް ވެއްޓި 26 މީހުން މަރުވެއްޖެއެވެ.

އިންޑިއާގެ އިރު އުތުރުގެ މިޒޮރަމް ސްޓޭޓްގެ ސައިރަންގް އަވަށުގައި އިމާރާތްކުރަމުންދިޔަ މި ބްރިޖް ވެއްޓިފައި ވަނީ ބުދަ ދުވަހުއެވެ. މިހާދިސާގައި 26 މީހުން މަރުވެ، އިތުރު ދެ މީހުންނަށް އެކިވަރުގެ އަނިޔާތައް ލިބިފައިވާކަމަށް ފުލުހުން މައުލޫމާތުދެއެވެ.

މިޒޮރަމް ސްޓޭޓްގެ ރެއިލްވޭ އޮތޯރިޓީން މިހާރު ވަނީ މިކަމުގެ ތަހުގީގެއްވެސް ފަށާފައެވެ.

މީޑިއާ ރިޕޯޓުތައް ބުނާގޮތުން ހާދިސާ ހިނގި ވަގުތު އެސަރަހައްދުގައި 40 މީހުން ދިޔައީ މަސައްކަތް ކުރަމުންނެވެ. ނަމަވެސް ފުލުހުން އާންމުކޮށްފައިވާ މައުލޫމާތުތަކުން ހާމަވާގޮތުގައި، އެތަނުގައި އެވަގުތު މަސައްކަތްކުރަމުން ދިޔައީ 28 މީހުންނެވެ.

ފުލުހުން މައުލޫމާތު ދިންގޮތުގައި މީހުންގެ ހަށިގަނޑުތައް ސަލާމަތްކުރުމުގެ މަސައްކަތުގައި މިހާތަނަށް 13 ހަށިގަނޑެއް ވަނީ ނަގާފައެވެ. އަދި ބާކީ ތިބި މީހުންގެ ހަށިތައް ނެގުމުގެ މަސައްކަތް ކުރަމުންދާކަމަށް ފުލުހުން ބުނެއެވެ.

ނޯތު-އީސްޓް ފްރޮންޓަޔަރ ރެއިލްވޭ (އެންއެފްއާރް)އިން ވަނީ، ހާދިސާ ހިނގާފައި މިވަނީ ބައިރްބީ-ސައިރަންގް ނިއު ލައިން ރެއިލްވޭ ޕްރޮޖެކްޓްގެ މަސައްކަތުގެ ތެރޭގައި ކަަމަށް ބުނެފައެވެ. މި މަޝްރޫއަކީ މިޒޮރަމްއާއި އިންޑިއާގެ އެހެން ސިޓީތަކާ ގުޅުވާލުމުގެ މަގުސަދުގައި ފެށި މަޝްރޫއެކެވެ. އެންއާރްއެފްއިން ވަނީ މިމަޝްރޫއު ނިންމާލެވުމުން އެސަރަހައްދުގެ ފަތުރުވެރިކަމާއި އިޖުތިމާއީ-އިގުތިސާދު ކުރިއަރާނެ ކަަމަށް ބުނެފައެވެ.

ބްރިޖް ވެއްޓުމުގެ ހާދިސާ ތަހުގީގުކުރުމަށް 'ހައި ލެވެލް އިންކުއަރީ ކޮމިޓީ'އެއް އެކުލަވާލާނެކަމަށްވެސް އެންއެފްއާރްއިން ވަނީ ބުނެފައެވެ.

މި ހާދިސާއާ ގުޅިގެން، އިންޑިއާގެ ބޮޑުވަޒީރު ނަރެންދުރަ މޯދީ ވަނީ، ހާދިސާގައި އަސަރުކުރި ހުރިހާ އެންމެންނަށް ދެވެން އޮތް އެހީތެރިކަމެއް ސަރުކާރުން ދޭނެ ކަމަށް ވިދާޅުވެފައެވެ.

އިންޑިއާގެ ރެއިލްވޭ ސިސްޓަމަކީ ކޮންމެ ދުވަހަކުވެސް އެތައް މިލިއަން ބަޔަކު ބޭނުންކުރާ ޚިދުމަތެކެވެ. ޒަމާނީ ފެންވަރަށް މި ސިސްޓަމް ތަރައްގީކުރުމަށް އިންޑިއާ ސަރުކާރުން ހައި-ސްޕީޑް ޓްރެއިން ލޯންޗުކޮށްފައި ވީނަމަވެސް، ފާޑުކިޔާ ފަރާތްތަކުން ދަނީ މިކަމުގައި ރައްކާތެރިކަމުގެ ފިޔަވަޅުތައް އެކަށީގެންވާ ގޮތެއްގައި އަޅަމުން ނުދާކަމަށާއި، ދުވަސްވެފައިވާ އުމްރާނީ ބިނާތައްވެސް ތަރައްގީކުރަމުން ނުދާކަމަށް ބުނަމުންނެވެ.

މިއަހަރުގެ ޖޫން މަހު، ރޭލުތަކެއް ޖެހި ހިނގި އެކްސިޑެންޓުގައި 288 މީހުން ވަނީ މަރުވެފައެވެ. މިއީ ފާއިތުވި 20 އަހަރުގެ ތެރޭގައި އިންޑިއާގައި ހިނގި މިފަދަ އެންމެ ނުރައްކާތެރި ހާދިސާއެވެ. މިހާދިސާ ހިނގަން މެދުވެރިވީ ސިގްނަލް ފެއިލިއަރގެ ސަބަބުން ކަމަށް ރިޕޯޓުތައް ބުނެއެވެ.

މިދިޔަ އަހަރުގެ އޮކްޓޫބަރު މަހު ގުޖުރާތު ސްޓޭޓްގައި ސަސްޕެންޝަން ބްރިޖެއް ވެއްޓި، 135 މީހުން މަރުވި ހާދިސާއެއްވެސް ވަނީ ހިނގާފައެވެ.