ވާގްނާގެ ލީޑަރ ޔެވްގެނީ ޕްރިގޮޒިންގެ މަރާ ޔޫކްރެއިނާ ގުޅުމެއް ނެތް - ޒެލެންސްކީ

ރަޝިޔާގެ އަސްކަރިއްޔާއާ ދެކޮޅަށް ވާގްނަރ ގްރޫޕުން ހިންގި ނާކާމިޔާބު އަސްކަރީ ހަރަކާތްތަކުގައި އިސްކޮށް ހުރި އެ ގްރޫޕްގެ ލީޑަރު، ޔެވްގެނީ ޕްރިގޮޒިންގެ މަރާ ޔޫކްރެއިނާ ގުޅުމެއް ނެތް ކަމަށް ޔުކްރެއިންގެ ރައީސް ވްލޮޑޮމީރް ޒެލެންސްކީ ވިދާޅުވެއްޖެއެވެ.

ޒެލެންސްކީ އެފަދައިން ވިދާޅުވީ ބުރާސްފަތި ދުވަހުއެވެ. އިންޓަރ-ފެކްސް ޔުކްރެއިން ނިއުސްއެޖެންސީން ޒެލެންސްކީއާ ހަވާލާދީ ބުނީ ޕްރިގޮޒިންގެ މަރާ ޔުކްރެއިނާ ގުޅުވައިގެން ދައްކަމުންދަނީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ. އަދި އޭނާގެ މަރާ ގުޅުން އޮތީ ކާކާކަން އެންމެންނަށްވެސް އެނގޭނެ ކަމަށް ޒެލެންސްކީ ވަނީ ވިދާޅުވެފައެވެ. ޒެލެންސްކީ ވަކި މީހެއްގެ ނަން ވިދާޅުނުވި ނަމަވެސް އޭނާ އެ އިޝާރާތްކުރެއްވީ ރަޝިއާގެ ރައީސް ޕޫޓިންއަށް ކަމަށް ބެލެވެއެވެ.

ރަޝިޔާގެ ވެރިރަށް މޮސްކޯގެ ހުޅަނގު އުތުރުން އޮންނަ ތިވިއޭ ސަރައްދަށް ވެއްޓުނު މަތިންދާބޯޓުގައި ވާގްނަރ ގުރޫޕުގެ ވެރިޔާ ޔެވްގެނީ ޕްރިގޮޒިންގެ ހުރި ކަމަށް ރިޕޯޓްކޮށްފައިވަނީ ރަޝިއާގެ ވައިގެ އުދުހުންތަކާބެހޭ އިދާރާއިންނެވެ. އޭނާ މަރުވިކަމަށް ބެލެވޭ ކަމަށް އެ އިދާރާއިން ވަނީ ބުނެފައެވެ. ޔެވްގެނީ ޕްރިގޮޒިންގެ އުމުރަކީ 62 އަހަރެވެ.

ރަޝިޔާގެ ކުލީ ސިފައިންގެ ކުންފުންޏެއްް ކަމަށްވާ ވާގްނަރ ގުރޫޕުން ވަނީ، ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމާގައި އިސް ދައުރެއް އަދާކޮށްފައެވެ. އެ ގްރޫޕްގެ ޖެޓެއް ވެއްޓުނުއިރު އޭގައި ތިބީ 10 މީހުން ކަމަށް މީޑިއާ ރިޕޯޓްތައް ބުނެއެވެ. އެއީ 7 ފަސިންޖަރުންނާއި 3 ފަޅުވެރިންނެވެ. އަދި އެ ޖެޓްގައި ތިބި އެންމެންވެސް މަރުވެފައިވާ ކަމަށް ވަނީ ރިޕޯޓްކޮށްފައެވެ. އެ 10 މީހުންގެ ހަށިގަނޑުވެސް ފެނިފައިވާކަމަށް ރިޕޯޓުތައް ބުނެއެވެ. ނަމަވެސް، ރަޝިޔާގެ އެއްވެސް އިދާރާއަކުން މިހާތަނަށް އައިއިރު އެ ކަން ރަސްމީކޮށް ކަށަވަރު ކޮށްދީފައެއް ނުވެއެވެ.

ރަޝިޔާގެ ވައިގެ ސިފައިންގެ އިސްވެރިޔާ، ޖެނެރަލް ސެރްގިޔޭ ސޮރެވިކިން އެ މަގާމުން ދުރުކުރިތާ އެއް ދުވަސް ފަހުން، އެ ބޯޓު ވައްޓާލާފައިވަނީ ރަޝިޔާގެ އަސްކަރިއްޔާއިން ހަމަލާ ދީގެން ކަމަށް ބައެއް މީޑިއާތަކުން ވަނީ ރިޕޯޓްކޮށްފައެވެ. އެފަދަ މީޑިއާތަކުން ބުނާގޮތުން، ޕްރިގޮޒިން މަރާލާފައިވަނީ ރަޝިއާގެ އަސްކަރިއްޔާ ފަހަތުގައި އޮވެގެންނެވެ. ސަބަބަކީ ޕްރިގޮޒިންގެ ބާރު ހިނގާ ފައުޖުތަކުން ރަޝިޔާގެ ސަރުކާރާއި އަސްކަރިއްޔާއާ ދެކޮޅަށް ބަޣާވާތެއް ކުރަން މަަސައްކަތްކޮށްފައި ވުމެވެ.