ބަލަބަނޮވިޗްގެ ދެ ލަނޑާއެކު، މާޒިޔާއިން ސަސް ބަލިކޮށްފި

ސާބިއާގެ ފޯވާޑް، ވޮޖިސްލާވް ބަލަބަނޮވިޗްގެ ދެ ލަނޑާއެކު މާޒިޔާ ސްޕޯޓްސް އެންޑް ރެކްރިއޭޝަނުން ސުޕަ ޔުނައިޓެޑް ސްޕޯޓްސް (ސަސް) ބަލިކޮށްފިއެވެ.

ދިވެހި ޕްރިމިއަރ ލީގުގައި ބުދަ ދުވަހު ހަވީރު ކުޅުނު މެޗު މާޒިޔާއިން ކާމިޔާބުކުރީ 3-0 ގެ ނަތީޖާއަކުންނެވެ. މާޒިޔާގެ ފުރަތަމަ 11 ގައި ބިދޭސީ ފަސް ކުޅުންތެރިން ހިމަނާފައިވެއެވެ. ދާދި ފަހުން އެ ޓީމަށް ގެނައި ޖަޕާނުގެ މިޑްފީލްޑަރު، ޓޮމޯކީ ވާޑާ ކުޅެން އެރުވީ ދެވަނަ ހާފުގައެވެ،

މެޗު ފެށިގެން، ދެ ޓީމުގެ ފަރާތުންވެސް ފެނިފައިވަނީ ދާދި ހަމަހަމަ ކުޅުމެކެވެ. ނަމަވެސް، ގިނަ އެތޭކުތައް ކޮށްފައިވަނީ މާޒިޔާ އިންނެވެ. ފުރަތަމަ ހާފުގައި ސަސްގެ އެންމެ ރަނގަޅު ފުރުސަތު ލިބުނީ އަހުމަދު ހުސާމް (ހުސާންކޮ) އަށެވެ. ސަސް އިން ކުރި ކައުންޓަރ އެޓޭކުގައި ހުސާންކޮ ފޮނުވާލި ބޯޅަ ދިޔައީ ގޯލުގެ އަރިމަތީ ދަނޑިކައިރިން ބޭރަށެވެ. ފުރަތަމަ ހާފުގެ 33 ވަނަ މިނެޓުގައި މާޒިޔާއަށް ކުރިހޯދަދިނީ ސާބިއާގެ މިޑްފީލްޑަރު ޖޯސިކް ބްރެނިމިރް އެވެ. ގާނާގެ މިޑްފީލްޑަރު ރެގަން އޮބެންގް ނަގައިދިން ކޯނަރު، ބްރެނިމިރްގެ ބޮލުން ފޮނުވާލީ ގޯލުގެ މަތީ ކަނަށެވެ. އެއީ މާޒިޔާއަށް މެޗުގައި ލިބުނު ހަވަނަ ކޯނަރެވެ. އެޔަށްފަހު، މެޗުގެ 40 ވަނަ މިނެޓުގައި ބަލަބަނޮވިޗް ވަނީ ލަނޑެއް ޖަހައި، ފަރަގު ބޮޑުކޮށްދީފައެވެ. މާޒިޔާއިން ފުރަތަމަ ހާފު ނިންމާލީ ދެ ލަނޑުގެ ފަރަގަކާއެކުއެވެ.

ބަލަބަނޮވިޗް އޭނާގެ ދެވަނަ ލަނޑު ޖަހާފައިވަނީ މެޗުގެ 70 ވަނަ މިނެޓުގައެވެ. ގޯލު އޭރިއާގެ ރޮނގުމަތިން ފޮނިވާލި ބޯޅަ، ގޯލުގެ ތެރެއަށް ވަނީ ސަސްގެ ކީޕަރުގެ އަތުގައިޖެހިފައެވެ. ދެވަނަ ހާފުގެ އިތުރު ވަގުތުގައިވެސް އޭނާއަށް ވަނީ ލަނޑުޖަހާނެ ރަނގަޅު ފުރުސަތެއް ލިބިފައެވެ. ސަސްގެ ޑިފެންސަށް ހެދުނު ގޯހެއްގެ ސަބަބުން ބަލަބަނޮވިޗް ހުސްކޮށް އަރައި ކީޕަރު ނައްޓާލުމަށްފަހު ފޮނުވާލި ބޯޅަ، ސަސްގެ ކެޕްޓަން އަހުނަފު ރަޝީދު (އަހުއްކޮ) ވަނީ ގޯލުގެ ރޮނގު ކައިރިން ދިފާއުކޮށްފައެވެ. މެޗުގެ މޮޅު ކުޅުންތެރިޔަކަށް ހޮވުނީވެސް ބަލަބަނޮވިޗް އެވެ.

މި މޮޅާއެކު މާޒިޔާ އެއްވަނައިގައި އޮތީ ކުޅުނު އަށް މެޗުން، 22 ޕޮއިންޓް ހޯދައިގެނެވެ. ދެވަނައިގައި ސަސް އަށް ލިބިފައިވަނީ ނުވަ މެޗުން 18 ޕޮއިންޓެވެ. ހަތް މެޗު ކުޅެފައިވާ އީގަލްސް އޮތީ 17 ޕޮއިންޓާއެކު ތާވަލުގެ ތިންވަނައިގައެވެ.