ލިވަޕޫލުން ކުރި އެޕީލް ބަލައިގަނެ، މެކްއަލިސްޓާގެ ސަސްޕެންޝަން އުވާލައިފި
23 އޯގަސްޓު 2023 | ބުދަ 02:04މެކްއަލިސްޓާ އަށް ރަތް ކާޑު ދައްކާފައިވަނީ ބޯންމައުތާ ދެކޮޅަށް ކުޅުނު މެޗުގައި
މެކްއަލިސްޓާ
ލިވަޕޫލުން ކުރި އެޕީލް ބަލައިގަނެ، އެލެކްސިސް މެކްއަލިސްޓާގެ ސަސްޕެންޝަން އުވާލައިފިއެވެ.
ހޮނިހިރު ދުވަހު ބޯންމައުތު ކައިރިން 3-1 ން މޮޅުވި މެޗުގައި މެކްއަލިސްޓާއަށް ވަނީ ރަތް ކާޑު ދައްކާފައެވެ. އޭނާއަށް ރަތް ކާޑު ދައްކާފައިވަނީ ރަޔަން ކްރިސްޓީ އަށް ކުރި ފައުލް އަކާ ގުޅިގެނެވެ. އެ ރަތް ކާޑާއެކު، މެކްއަލިސްޓާ ތިން މެޗަށް ސަސްޕެންޑްވާ ގޮތަށް އޮތުމުން ލިވަޕޫލުން ވަނީ އެޕީލް ކޮށްފައެވެ.
ލިވަޕޫލުން ބުނެފައިވަނީ އެއީ ސީދާ ރަތް ކާޑެއް ދައްކާ ވަރުގެ ފައުލް އެއް ނޫންކަމަށެވެ. އެ ނިންމުމާ ގުޅޭގޮތުން ލިވަޕޫލްގެ ކޯޗު، ޔާގަން ކްލޮޕްވެސް ވަނީ ވަރަށް ބޮޑަށް ނުރުހުން ފާޅުކޮށްފައެވެ. ލިވަޕޫލުން އެޕީލް ކުރުމާއެކު ފުޓްބޯލް އެސޯސިއޭޝަންގެ އިންޑިޕެންޑެންޓް ރެގިއުލޭޓަރީ ކޮމިޝަނުން ވަނީ މައްސަލަ ބަލައި، ސަސްޕެންޝަން އުވާލާފައެވެ.
ސަސްޕެންޝަން އުވާލުމާއެކު، މެކްއަލިސްޓާއަށް ކުރިޔަށް އޮތް މެޗު ކުޅެވޭނެއެވެ. ކުރިޔަށް އޮތް ނިއުކާސަލް މެޗުވާނީ ލިވަޕޫލް އަށް މުހިންމު، އުނދަގޫ މެޗަކަށެވެ. މި މެޗު ކުޅުމަށް ހަމަޖެހިފައިވަނީ އާދިއްތަ ދުވަހުއެވެ.
