އުރީދޫ ދިވެހި ޕްރިމިއާ ލީގުގައި މާޒިޔާއާ ގްރީން ސްޓްރީޓް ކުޅުނު މެޗުގައި ރެފްރީކަން ކުރި ރެފްރީ މުހައްމަދު ނިއުޝާދުގެ ސަސްޕެންޝަން އެފްއޭއެމްއިން އުވާލައިފިއެވެ.

ރެފްރީއާ ޖެހުނު މައްސަލައެއްގައި ކުޅުން ހުއްޓާލަން ޖެހުނު މި މެޗުގައި ރެފްރީކަން ކުރި މުހައްމަދު ނިއުޝާދު އެފްއޭއެމް އިން މައްސަލަ ބަލާ ނިމެންދެން ވަގުތީ ގޮތުން ސަސްޕެންޑް ކުރިއެވެ. ނަމަވެސް ބުދަ ދުވަހު އެ އިދާރާއިން ނެރުނު ބަޔާނެއްގައި ވަނީ އެ އިދާރާގެ ރެފްރީސް ކޮމިޓީން އެ މައްސަލަ ބެލުމަށް ފަހު ނިއުޝާދުގެ ސަސްޕެންޝަން އުވާލުމަށް ނިންމާފައިވާ ކަމަށެވެ.

މި މެޗުގައި މައްސަލަ ޖެހުމަށް މެދުވެރިވީ ގްރީންގެ ބިދޭސީ ކުޅުންތެރިޔާ ސުބޯލް އިލިއާ މެޗުގެ 51 ވަނަ މިނުޓުގައި ނިއުޝާދާ ދިމާލަށް އެއްޗެއް ބުނި ކަމަށް ބުނެ އޭނާއަށް ދެވަނަ ރީނދޫ ކާޑެއް ދެއްކުމާ ވިދިގެން އެކަމާ ހިތްހަމަނުޖެހިގެން ގްރީންގެ ކުޅުންތެރިން ނުރުހުން ފާޅުކުރަމުން ދަނިކޮށް ނިއުޝާދަށް މެޗުގެ ކުޅުން އިތުރަށް ކުރިޔަށް ނުގެންދެވުމާ ގުޅިގެން މެޗުގެ ކުޅުން ހުއްޓާލުމަށް ފަހު ދަނޑުން ފައިބައިގެން ދިޔުމުންނެވެ. މެޗުގެ ފުރިހަމަ ވަގުތު ހަމަނުވަނީސް މެޗުގެ ކުޅުން ހުއްޓާލާފައިވާއިރު އޭރު 1-0 އަކުން ކުރީގަ އޮތީ މާޒިޔާއެވެ

މި މެޗުގެ ފުރަތަމަ ހާފުގައި ރެފްރީކަން ކުރި އާދަމް ފަޒީލް ދެވަނަ ހާފަށް ނުކުމެފައި ނުވާއިރު ދެވަނަ ހާފުގައި ރެފްރީކަން ކުރަން ނުކުތީ މުހައްމަދު ނިއުޝާދެވެ. މި މައްސަލައިގައި ގްރީން ސްޓްރީޓުގެ ފަރާތުން ނިއުޝާދަށާއި އެފްއޭއެމްއަށް ބޮޑެތި ފާޑުކިޔުންތަކެއް އަމާޒުވެގެން ދިޔައެވެ.

އެގޮތުން ގްރީންގެ ކޯޗު ސޮބާ މި މައްސަލައިގައި ބުނެފައި ވަނީ ނިއުޝާދު ރެފްރީކަންކުރި ބައެއް މެޗުތަކުގައި އޭނާ ނެގި ބައެއް ޑިސިޝަންތަކުގެ ސަބަބުން ގްރީންއަށް ޕޮއިންޓް ގެއްލިފައިވާ ކަމަށެވެ. އެގޮތުން އޭނާ ބުނީ ނިއުއާ ދެކޮޅަށް ކުޅުނު މެޗާ ޓީސީއާ ދެކޮޅަށް ގްރީންއިން ކުޅުނު މެޗުގައި ރެފްރީ ނިއުޝާދު ގްރީންއާ ދެކޮޅަށް ނިންމި ބައެއް ނިންމުމުގެ ސަބަބުން އެ ޓީމަށް ޕޮއިންޓް ގެއްލިފައި ވާތީ އެ ރެފްރީގެ މައްސަލަ އެފްއޭމްއަށް ވެސް ހުށަހެޅި ކަމަށެވެ. އަދި ގްރީނުން ކުޅޭ މެޗުތަކުގައި ނިއުޝާދު ރެފްރީއަކަށް ހަމަނުޖެއްސުމަށް ވެސް އެދުނު ކަމަށް ސޮބާހް  އޭރު ބުންޏެވެ.

ހަމައެހެންމެ މި މައްސަލައިގައި އެފްއޭމްގެ ރެފްރީސް ޑިޕާޓްމަންޓް ހިންގުން އިތުރަށް ހަރުދަނާ ކުރުމުގެ ގޮތުންނާ އެ އިދާރާގެ އިދާރީ އޮނިގަނޑު މުރާޖަޢާކޮށް އަލުން އެކުލަވާލަން ނިންމުމާ ގުޅިގެން، އެ އިދާރާގެ ރެފްރީސް ޑިޕާޓްމަންޓާ ހަވާލުވެ ހުރި އަޙްމަދު އަމީޒު ވެސް އެ މަގާމުން ވަކިކޮށްފައި ވެއެވެ.

މައްސަލަ ބޮޑުވެގެން ދިޔަ މި މެޗުން މާޒިޔާ މޮޅުވިކަމަށް ނިންމައި އެފްއޭއެމްއިން ވަނީ ގްރީންސްޓްރީޓް 25,000 ރުފިޔާއިން ޖޫރިމަނާކޮށް އެ ޓީމަށް އިންޒާރު ދީފައެވެ.

މި ސީޒަނުގައި ދިވެހި ޕްރިމިއާ ލީގުގައި ރެފްރީކަން ކުރަމުންދާ ފަރާތްތަކާ މެދު ކްލަބްތަކުން ތަކުރާރުކޮށް ހިތްހަމަ ނުޖެހުން ފާޅުކުރުމާ ވިދިގެން އެފްއޭއެމްއިން ވަނީ ލީގުގެ ކުޅުން ނިމެންދެން އިންޑިއާގެ ރެފްރީން ބޭނުން ކުރަން ނިންމާފައެވެ. އެހެނަސް އިންޑިއާގެ ރެފްރީން ބޭނުންކުރަން ފެށި ފަހުންވެސް ލީގުގެ މެޗެއް ވަނީ ފުރިހަމަ ވަގުތު ހަމަނުވަނީސް ހުއްޓާލަފައެވެ.