ޕްރިމިއާ ލީގުގައި ބުދަ ދުވަހުގެރޭ ކުޅުނު މެޗުން ލިވަޕޫލް އެއްވަރުވެއްޖެއެވެ.

ލިވަޕޫލަށް ލީޑް ފުޅާ ކުރުމަށް ލިބުނު ފުރުސަތު ގެއްލުނީ ލިސެސްޓާ ސިޓީއާއި ދެކޮޅަށް ކުޅުނު މެޗު 1-1 ގެ ނަތީޖާ އަކުން އެއްވަރުވުމުންނެވެ.

ފުރަތަމަ ހާފް ފެށިގެން ތިންވަނަ މިނެޓުގައި ސާޑިއޯ މަންއޭ ކާމިޔާބު ކޮށްދިން ލަނޑާއެކު ލިވަޕޫލް ލީޑްނަގާ ވަރުގަދަ ކުޅުމެއް ދެއްކިއެވެ. ލީޑް ފުޅާ ކުރާނެ ގިނަ ފުރުސަތުތަކެއް ލިބުނު ނަމަވެސް އެ ޓީމަށް ވަނީ އިތުރު ލަނޑެއް ޖެހޭގޮތް ނުވެފައެވެ.

ލިސެސްޓާ ސިޓީގެ ގޯލަށް ލިވަޕޫލުން ވަރުގަދަ ހަމަލާ ތަކެއްދެމުން ދިޔައިރު އެ ޓީމުގެ ގޯލަށް ލިސެސްޓާއިން ވެސް ވަރުގަދަ ހަމަލާތަކެއް ދީފައިވެއެވެ.

ވާދަވެރި ކުޅުމެއް ފެނިގެންދިޔަ ފުރަތަމަ ހާފްގެ ވަގުތު ހަމަވެ އިތުރުވަގުތުގެ ގޮތުގައި ދިން ތިން މިނެޓްގެ ބޭނުން ހިފާ، ލިސެސްޓާއިން ނަތީޖާ އެއްވަރުކުރީ ބެން ޗިލްވެލްގެ އެހީތެރި ކަމާއިއެކު ހެރީ މަގުއެރޭ ޖެހި ލަނޑުންނެވެ.

 ފުރަތަމަ ހާފް ނިމުނުއިރު ދެޓީމު އެއްވަރުވެ ނަތީޖާ އަކީ 1-1 އެވެ.

ދެވަނަ ހާފް ފެށިގެން ދެޓީމްގެ ކުޅުން ރަނގަޅުކޮށް، ދެޓީމުން ވެސް ވަނީ ވަރުގަދަ ހަމަލާތަކެއް އުފައްދާފައެވެ. އެހެން ނަމަވެސް ދެޓީމުންކުރެ އެއްވެސް ޓީމަކަށް އިތުރު ލަނޑެއް ޖެހިފައެއްނުވެއެވެ.

މެޗު ނިމުނުއިރު ނަތީޖާ އަކީ ލިވަޕޫލް އެކެއް އަދި ލިސެސްޓާ ސިޓީ އެކެކެވެ.

މި ނަތީޖާއާއި އެއްކޮށް ކުޅުނު 24 މެޗުން ޕްރިމިއާ ލީގުގެ ތާވަލުގެ އެއްވަނާގައި އޮތް ލިވަޕޫލަށް ލިބިފައިވަނީ 61 ޕޮއިންޓެވެ. މި މެޗުން މޮޅުވިނަމަ 63 ޕޮއިންޓް ހޯދާ ތާވަލުގެ ދެވަނާގައި އޮތް މެންޗެސްޓާ ސިޓީއާ ދެމެދު އޮތް ފަރަގު ހަތް ޕޮއިންޓަށް ފުޅާ ކުރެވުނީހެވެ.

ތާވަލުގެ 11 ވަނާގައިއޮތް ލިސެސްޓާ ސިޓީ އަށް ކުޅުނު 24 މެޗުން ލިބިފައިވަނީ 32 ޕޮއިންޓެވެ.