ކޭބަލް ކާރެއްގެ ތެރޭގައި ތާށިވި 7 ކުދިންގެ ތެރެއިން 2 ކުދިން ސަލާމަތްކޮށްފި، ރޭގަނޑުވުމުން ރެސްކިއު އޮޕަރޭޝަން މެދުކަނޑާލައިފި
22 އޯގަސްޓު 2023 | އަންގާރަ 16:06ކޭބަލް ކާރުގައި ތާށިވެފައި ވަނީ އުމުރުން 10 އަހަރާ 15 އަހަރުގެ ކުދިން
ޕާކިސްތާނުގައި ކޭބަލް ކާރެއްގެ ތެރޭގައި 7 ކުދިން ތާށިވުން
ޕާކިސްތާނުގެ ފަރުބަދަމަތީ ސަރަހައްދެއް ކަމަށްވާ ބައްޓަގްރަމްއިން ދަތުރުކުރަމުންދިޔަ ކޭބަލް ކާރެއްގެ ތެރޭގައި ތާށިވި ހަތް ކުދިންގެ ތެރެއިން ދެ ކުދިން ސަލާމަތްކޮށްފިއެވެ.
ބައްޓަގްރަމް އިން ދަތުރުކުރަމުންދިޔަ ކޭބަލް ކާރު ހުއްޓުނީ އެ ކާރު ދަތުރުކުރަމުންދިޔަ، ކޭބަލް ލައިންތަކުގެ ތެރެއިން ލައިނެއް ކަނޑައިގެން ދިއުމުން، އަންގާރަ ދުވަހު، ޕާކިސްތާނުގެ ގަޑިން ހެނދުނު 7:00 ހާއިރުއެވެ. އެއާއެކު ކޭބަލް ކާރުގައި ސްކޫލަށް ދިއުމަށް ދަތުރުކުރަމުންދިޔަ ހަތް ކުދިންނާއި ޓީޗަރަކު ވަނީ ތާށިވެފައެވެ.
އެގައުމުގެ ކަމާގުޅުންހުރި އިދާރާތަކުން މައުލޫމާތު ދޭގޮތުގައި، ކޭބަލް ކްރޮސިންގް އެކްސްޕާޓުން ފޮނުވައިގެން ކޭބަލްގައި ކުޑަ ޑޯލީ ކެރިއަރެއް އަޅުވައި ކުދިން ސަލާމަތްކުރުމުގެ މަސައްކަތްތައް ފަށާފައިވަނީ ކޭބަލް ކާރުގައި ކުދިން ތާށިވިތާ 12 ގަޑިއިރު ފަހުންނެވެ.
ޕާކިސްތާންގެ އަސްކަރިއްޔާގެ ރެސްކިއު ޓީމަކުން ހެލިކޮޕްޓަރުގައި ކުދިން ސަލާމަތްކުރުމުގައި ހަރަކާތްތެރިވާން ފަށައި، މިހާރު ދެ ކުދިން ސަލާމަތް ކުރެވިފައިވާ ކަމަށާއި، އެހެންނަމަވެސް، ރޭގަނޑުވެ އަނދިރިވުމުން ސަލަމާތްކުރުން އޮޕަރޭޝަން މެދުކަނޑާލާފައި ވާކަމަށް ވަނީ ރިޕޯޓުކޮށްފައެވެ.
ހަތަރު ކުދިން ސަލާމަތްކުރެވިފައި ވާކަމަށްވެސް، އޮފިޝަލަކާ ހަވާލާދީ ބައެއް ރިޕޯޓުތައް ބުނެއެވެ.
ގަދަ ވައިގެ ސަބަބުން ހެލިކޮޕްޓަރުގައިވެސް ކުދިން ސަލަމާތްކުރުމަށް ވަނީ ހުރަސް އެޅިފައެވެ. އަދި ހެލްކޮޕްޓަރު ކޭބަލްއާ މާ ކައިރިވެއްޖެނަމަ، އިތުރު ކޭބަލެއް ކަނޑައިގެން ދިއުމުގެ ބިރު އޮތުމުގެ ސަބަބުންވެސް، ގޮންޖެހުންތަކާ ދަނީ ކުރިމަތިވަމުންނެވެ.
ކޭބަލް ކާރުގައި ތާށިވެފައިވަނީ އުމުރުން 10 އަހަރާ 15 އަހަރުގެ ކުދިންނެވެ.
