ޗެލްސީގެ ޗުކްވުއެމެކާއަށް އަނިޔާވެ، ހަ ހަފުތާއަށް ކުޅުމާ ދުރަށް

ޗެލްސީގެ މިޑްފީލްޑަރު، ކާނީ ޗުކްވުއެމެކާއަށް އަނިޔާވެ ހަ ހަފުތާއަށް ކުޅުމާ ދުރަށް ދާން ޖެހިއްޖެއެވެ.

ޗުކްވުއެމެކާގެ ކަކުލަށް ލިބުނު އަނިޔާއަކާ ގުޅިގެން ހޯމަ ދުވަހު ވަނީ ސާޖަރީ ހަދާފައެވެ. އޭނާއަށް އަނިޔާވެފައިވަނީ ވެސްޓް ހޭމް ކައިރިން 3-1ން ބަލިވި މެޗުގައެވެ. ޗެލްސީގެ ހަމައެކަނި ލަނޑު ޖަހައިދިނީ ޗުކްވުއެމެކާއެވެ.

އެސްޓަން ވިލާއިން 20 މިލިއަން ޕައުންޑަށް ޗެލްސީއާ ގުޅުމަށްފަހު، އޭނާ ވަނީ އައު ސީޒަނުގެ ފުރަތަމަ ދެ މެޗުގައި ކުޅެފައެވެ. އޭނާ ބުނީ، ޗެލްސީގައި އޭނާގެ ފުރަތަމަ ލަނޑު ޖެހުމުން އުފާވިނަމަވެސް، އަނިޔާވެ، މެޗުން ބަލިވުމުން ހިތާމަ ކުރާކަމަށެވެ. އޭނާ ވަނީ ޗެލްސީގެ ސަޕޯޓަރުންގެ ފަރާތުން ލިބުނު ތަރުހީބަށްޓަކައި ޝުކުރު އަދާކޮށްފައެވެ.

އައު ސީޒަން ފެށުމާއެކު ޗެލްސީގެ ގިނަ ކުޅުންތެރިންތަކަކަށް އަނިޔާވެ، ކުޅުމާ ދުރަށް ދާން ޖެހުމުން އެ ޓީމު ވަނީ ހާސް ކަމެއްގެ ތެރޭގައެވެ. މި ހޫނުމޫސުމުގައި އެ ޓީމަށް ގެނައި އެންމެ މުހިންމު ކުޅުންތެރިޔާ ކަމަށްވާ އެންކުންކޫއާއި ޓީމުގެ ކެޕްޓަން ރީސް ޖޭމްސްއާއި ވެސްލީ ފޮފާނާގެ އިތުރުން ޗަލޯބާއަށް ވަނީ އަނިޔާވެފައެވެ.

ޗެލްސީން މި ސީޒަނުގައި ދެ މެޗު ކުޅެފައިވާއިރު އަދި އެއްވެސް މެޗަކުން މޮޅެއް ނުވެއެވެ. ތިންވަނަ މެޗުގައި ހޮނިހިރު ދުވަހު ނިކުންނާނީ ލޫޓަން ޓައުންއާ ދެކޮޅަށެވެ.