އަންނަ ހަފްތާ ނިމުމުގެ ކުރިން ތުޅާދޫ އެއަރޕޯޓުގެ އަމަލީ މަސައްކަތް ފެށި 44 ހެކްޓަރުގެ ބިން ހިއްކާތަން ފެނިގެންދާނެ - ރައީސް

އަންނަ ހަފްތާ ނިމުމުގެ ކުރިން ބ. ތުޅާދޫ އެއަރޕޯޓުގެ އަމަލީ މަސައްކަތް ފެށި 44 ހެކްޓަރު ބިން ހިއްކާތަން ފެނިގެންދާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙު ވިދާޅުވެއްޖެއެވެ.

ބ. ތުޅާދޫގައި ބޭއްވި "އުފާވެރި އަމާންރާއްޖެ" ކެމްޕޭން ޖަލްސާފައި ވާހަކަފުޅުދައްކަވަމުން ރައީސް ވިދާޅުވީ ތުޅާދޫ ރައްޔިތުން އެންމެ ބޮޑަށް ބޭނުންވާ އަދި އެދެމުން ދިޔައީ އެއަރޕޯޓް ކަމަށެވެ. ތުޅާދޫގައި އެއަރޕޯޓެއް އެޅި އޭގެ ލުއިފަސޭހަކަން ކައިރި ރަށްރަށުގެ ރައްޔިތުންނަށް ލިބޭނެ ކަމަށް ރައީސް ވިދާޅުވިއެވެ. އަދި ފަސޭހަ ލުއި ގޮތްތަކެއް ބ އަތޮޅުގެ އެ ސަރަހައްދުގެ ރައްޔިތުންނަށް ލިބިގެންދާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ 30 މިނެޓުން ދެވޭ ހިސާބުގައި އެއަރޕޯޓެއް އޮންނަންޖެހޭނެ ސިޔާސަތުގެ ދަށުން ތުޅާދޫގައި އެއަރޕޯޓެއް އެޅުމަށް ނިންމެވި ކަމަށާއި، އެކަން ކޮންޓްރެކްޓްކުރެވި އަމަލީ މަސައްކަތް ފަށަން އެ ރަށުގައި މިހާރު މަސައްކަތާ ހަވާލުވި ފަރާތުން ތިބި ކަމަށެވެ. އަދި އަންނަ ހަފްތާ ނިމުމުގެ ކުރިން އެކަމުގެ އަމަލީ މަސައްކަތް ފެށި 44 ހެކްޓަރު ބިން ހިއްކާތަން ފެނިގެންދާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ މިހާރު އެޅިފައި ހުރި ބިންގަލުގެ މަތީގައި، ކުރިއަށް އޮތްތަނުގައި ރައްޔިތުން ބޭނުންވާ ހެޔޮ ބަދަލު ގެނައުމަށްޓަކައި ކުރަން ރާވާފައި ހުރި ކަންތައްތައް މެނިފެސްޓޯ އާންމުކުރަމުންދާއިރުގައި، ރައްޔިތުންނަށް ވަރަށް ސާފުކޮށް ފެނިގެންދާނެ ކަމަށެވެ.

ރައީސް ވިދާޅުވީ އިސްކަމެއް ދޭންޖެހުނު ބައެއް ދާއިރާތައް ބައެއް ރަށްރަށުގައި އެބަހުރި ކަމަށެވެ. މުޅި ޕްރޮގްރާމް ނިމިގެންދާއިރުގައި އެއްވެސް ރަށެއްގެ އެއްވެސް ކަމެއް ބާކީވެފައި އޮތްތަނެއް ނުފެންނާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ ތުޅާދޫއަށް ބޭނުންވެފައި އޮތް ކަމަކީ ބޯހިޔާވަހިކަން ކަމަށާއި، އަދިވެސް އެރަށަށް ހައުސިންގ ޔުނިޓް ބޭނުންވާ ކަމަށެވެ. އަދި ކުރިއަށް އޮތް ދައުރުގައި އިތުުރު 100 ހައުސިންގ ޔުނިޓް އަޅުއްވާނެކަމަށް ރައީސް ވިދާޅުވިއެވެ. އަދި ރަށުގެ ރައްޔިތުން ދެން އެންމެ ބޮޑަށް ބޭނުންވެފައި ތިބީ ސިއްހީ ހިދުމަތް ރަށުގައި ތިބެގެން ލިބޭނެ ގޮތެއް ހަދައިދިނުން ކަމަށާއި، ހޮސްޕިޓަލުގެ އަމަލީ މަސައްކަތް ފެށި ބާރު ސްޕީޑުގައި ކުރިއަށްދާކަމަށް ރައީސް ވިދާޅުވިއެވެ. ރައީސް ވިދާޅުވީ އެ މަސައްކަތް ހަވާލުކުރެވިފައިވަނީ އިތުބާރު ހުރި ކުންފުންޏަކާއި ކަމަށާއި، ޕްލޭނާ އެއްގޮތަށް އެ މަސައްކަތް ނިންމާލައި، އެހިސާބުގެ ރައްޔިތުންނަށް ހިދުމަތް ލިބިގެންދާނެ ކަމަށެވެ.

ރައީސް ވިދާޅުވީ ދެން އޮތް މައްސަލައަކީ ނެރުގައި ހެދިފައި އޮތް ބޭރުތޮށި ބޭނުންކުރެވޭނެ ގޮތެއް ހޯދުން ކަމަށާއި، އޭގެ ޕްލޭން ހެދި އެއަށް ގެންނަން ޖެހުނު ބަދަލުތަކާ ހެދި ލަސްތަކެއް ވެގެންދިޔަ ކަމަށެވެ. އެހެންނަމަވެސް މިހާރު ވަނީ ކޮންޓްރެކްޓް ކުރެވިފައި ކަމަށާއި، ލަސްތަކެއް ނުވެ އޭގެ އަމަލީ މަސައްކަތް ފެށިގެންދާނެ ކަމަށެވެ.

ރައީސް ވަނީ މަސް ގަނެވޭނެ ގޮތަށް ތުޅާދޫ ކައިރީގައި ބޯޓެއް ބާއްވާނެކަމަށް ވިދާޅުވެފައެވެ. އަދި އެ ސަރަހައްދުގައި އަކުއާ މެރިން ކަލްޗާ އިންޓަސްޓްރީ ތަރައްގީކުރަން ޕްރައިވެޓް ފަރާތްތަކަށް ލޯނު ފޯރުކޮށްދެއްވާނެ ކަމަށާއި ވޭސްޓް މެނޭޖްމެންޓް ޒަމާނީ ވަސީލަތާއެކު ގާއިމުކުރައްވާނެ ކަމަށް ރައީސް ސާލިހުގެ ވައުދުފުޅުގެ ތެރޭގައި ހިމެނެއެވެ.