ތަރައްގީއަށް ހިތާދޫގައި ގިނަ މަޝްރޫއުތައް ކުރިއަށް ގެންދަންޖެހޭ، ކުރިއަށް އޮތް ދައުރަށް އިންތިޚާބު ކޮށްދެއްވާ: ރައީސް ސާލިހު
21 އޯގަސްޓު 2023 | ހޯމަ 17:25ބޯހިޔާވަހިކަމަށް ދިމާވެފައިވާ މައްސަލަ ހައްލުކޮށްދެއްވާނެ ކަމަށް ވިދާޅުވި
ރައީސް އިބްރާހީމް މުހައްމަދު ސާލިހު ވާހަކަފުޅުދައްކަވަނީ
ތަރައްގީއަށްޓަކައި ބ. ހިތާދޫގައި ގިނަ މަޝްރޫއުތައް ކުރިއަށް ގެންދަން ޖެހޭ ކަމަށާއި، ކުރިއަށް އޮތް ދައުރަށް އިންތިޚާބު ކޮށްދިނުމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އެދިވަޑައިގެންފިއެވެ.
ބ. ހިތާދޫއަށް ވަޑައިގެން ބޭއްވެވި ބަނދަރު ބައްދަލުކުރެއްވުމުގައި ރައީސް ވިދާޅުވީ، ރާއްޖޭގައި މީހުން ދިރިއުޅޭ ހުރިހާ ރަށެއްގައި ތަރައްގީގެ މަޝްރޫއުތައް ކުރިއަށްދާ ކަމަށަށެވެ. ހިތާދޫއަށް އިޝާރާތް ކުރައްވައި ރައީސް ސާލިހު ވިދާޅުވީ، އަދިވެސް އެރަށުގެ ތަރައްގީއަށް ގިނަ މަޝްރޫއުތައް ކުރިއަށް ގެންދަންޖެހޭ ކަމަށެވެ.
އެގޮތުން ކުރިއަށް އޮތް ދައުރުގައި ހިތާދޫގެ ބިން ހިއްކަވައި، ބޯހިޔާވަހިކަމަށް ދިމާވެފައިވާ މައްސަލަ ހައްލުކޮށްދެއްވާނެ ކަމަށް ރައީސް ސާލިހު ވިދާޅުވިއެވެ. އަދި ވިދާޅުވީ ރަށުގެ ޒުވާނުން ބޭނުންވާ ގޮތަށް، އިންޑޯ ކުޅިވަރާއި އިންޑޯ ޖިމް ހިމެނޭ ގޮތަށް ކޮމިއުނިޓީ ސެންޓަރެއް ކުރިއަށް އޮތް ފަސްއަހަރުގެ ތެރޭގައި އަޅުއްވައިދެއްވާނެ ކަމަށެވެ.
މީގެ އިތުރުން ރައީސް ވިދާޅުވީ، ރައްޔިތުން ޕިކްނިކް ދިއުމަށްޓަކައި ހިތާދޫ ކައިރިން ރަށެއް ހަމަޖައްސަވައިދެއްވާނެ ކަމަށެވެ.
ރައީސް ސާލިހު ވިދާޅުވީ ކުރިއަށް އޮތްތަނުގައި ރައްޔިތުން ބޭނުންވާ ތަރައްގީ ގެނެސްދޭނީ މިސަރުކާރުން ކަމަށާއި، ރައްޔިތުން އެދޭ ފަދަ ސިޔާސަތުތަކެއް އޮތީ މިސަރުކާރުގައި ކަމަށެވެ.
