"ބައެއް ބޭފުޅުން ވެރިކަމަށް ކުރިމަތިލައްވައިގެން އުޅުއްވަނީ ދެވަނަ ބުރަކަށް ހިނގައްޖެނަމަ ކޮންމެވެސް ޕޯޝަނެއް ހޯއްދެވުމަށް"
20 އޯގަސްޓު 2023 | އާދީއްތަ 17:08ސަމީރު ވިދާޅުވީ، އިންތިޚާބުގައި ރަނގަޅު ސިޔާސަތުތަކަކާއެކު ރަނގަޅު ޕްލޭނެއް އޮވެގެން ރައްޔިތުންނާ ހަމައަށް ވަޑައިގަންނަވާ ހަމައެކަނި ބޭފުޅަކީ ރައީސްކަމަށް
ރައީސުލްޖުމްހޫރިއްޔާގެ އޮފީހުގެ މިނިސްޓަރު، އަހުމަދު ސަމީރު
ކުރިއަށް އޮތް ރިޔާސީ އިންތިޚާބުގައި ވާދަކުރައްވާ ބައެއް ބޭފުޅުން ވެރިކަމަށް ކުރިމަތިލައްވައިގެން އުޅުއްވަނީ ދެވަނަ ބުރަކަށް ހިނގައްޖެނަމަ ކޮންމެވެސް ޕޯޝަނެއް ހޯއްދެވުމަށް ކަމަށް، ރައީސުލްޖުމްހޫރިއްޔާގެ އޮފީހުގެ މިނިސްޓަރު އަހުމަދު ސަމީރު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަފުޅުދައްކަވަމުން ސަމީރު ވަނީ، ރިޔާސީ އިންތިޚާބުގައި ރަނގަޅު ސިޔާސަތުތަކަކާއެކު ރަނގަޅު ޕްލޭނެއް އޮވެގެން ރައްޔިތުންނާ ހަމައަށް ވަޑައިގަންނަވާ ހަމައެކަނި ބޭފުޅަކީ ރައީސް އިބްރާހީމް މުހައްމަދު ސާލިހު ކަމަށް ވިދާޅުވެފަައެވެ. ބައެއް ބޭފުޅުން ރައްޔިތުންނާމެދު ނުރުހުންވެވަޑައިގެން، ރައްޔިތުންނަށް އެއްޗެއްހި ވިދާޅުވާކަމަށާއި، އެވަރުގެ ބޭބޭފުޅުންނަށް، ރައްޔިތުންނަށް ކަމެއް ކޮށްނުދެއްވޭނެ ކަަމަށް އޭނާ ވިދާޅުވިއެވެ. އަދި ކޯލިޝަނުގެ ދަހިވެތިކަމުގައި އެކަނި ވެރިކަމަށް ކުރިމަތިލެއްވި ބޭފުޅުންވެސް ތިއްބެވިކަމަށް ސަމީރު ވިދާޅުވިއެވެެ. އެފަދަ ބޭބޭފުޅުން މަސައްކަތްކުރައްވަނީ އަމިއްލަ އެދުމައިގެން ކަަމަށް ސަމީރު ވަނީ ވިދާޅުވެފައެވެ.
ސަމީރު ވަނީ، ވެރިކަަމަށް ވަޑައިގަންނަވާ ބޭފުޅުންގެ ތެރޭގައި ރައީސް ސާލިހު ފިޔަވައި އިޚުލާސްތެރިކަމާއެކު މަސައްކަތްކުރައްވާ ބޭފުޅެއް ނެތްކަމަށް ވިދާޅުވެފައެވެ. ވެރިކަމަށް ކުރިމަތިލައްވައިގެން ތިއްބެވި ބައެއް ބޭފުޅުން މަސައްކަތްކުރައްވަނީ އެ ބޭފުޅާއަކީ އެހެން މީހެއްކަމަށް ދެއްކުމަށް ކަމަށާއި، އެއްވެސް ކަހަލަ އަމިއްލަފުޅު ސިޔާސަތެއް ނެތްކަމަށް ސަމީރު ވަނީ ވިދާޅުވެފައެވެ. ސަމީރު ވިދާޅުވީ އެ ބޭފުޅުން ވެރިކަން ކުރައްވާނެ ކަމަށް ވިދާޅުވަނީ އެހެން ބޭފުޅުންގެ ސިޔާސަތުތަކަށް ކަމަށާއި، އަނެއްބައި ބޭފުޅުން ވެރިކަމަށް ކުރިމަތިލެއްވީ ވަކި ބޭފުޅަކު ޖަލުން މިނިވަން ކުރެއްވުމަށްޓަކައި ކަމަށް ވިދާޅުވާކަމަށެވެ. އެހެންކަމުން އެ ބޭފުޅުންގެ ފަރާތުން ރައްޔިތުންނަށް ވާނެ ފައިދާއަކީ ކޮބައިތޯ ސަމީރު ސުވާލު އުފެއްދެވިއެވެ. އަމިއްލަފުޅު މެނިފެސްޓޯއެއް ނެތި ރައްޔިތުންނަށް ކަންކަން ކޮށްނުދެއްވޭނެ ކަމަށް އޭނާ ވިދާޅުވިއެވެ.
އެއާ ޚިލާފަށް، ރައްޔިތުންގެ ތަރައްގީއާއި ރައްޔިތުންނާ ގުޅުންހުރި ވާހަކަތައް ދައްކަވާ ބޭފުޅަކީ ރައީސް ސާލިހު ކަމަށާއި، އެމަނިކުފާނަށް ދެވަނަ ދައުރެއް ދޭންޖެހެނީ އެހެންވެގެން ކަަމަށް ސަމީރު ވިދާޅުވިއެވެ. ސަމީރު ވިދާޅުވީ ރާއްޖޭގައި ހަމަޖެހުން ގާއިމްކޮށްދެއްވަން ވެރިކަމަށް ވަޑައިގަންނަވަން ބޭނުންފުޅުވާކަމަށް ބައެއް ބޭފުޅުން ވިދާޅުވާކަަމަށެވެ. އެހެންނަމަވެސް މިއަށްވުރެ ބޮޑަށް ރާއްޖޭގައި ހަމަޖެހުން އޮތް ޒަމާނެއް ރާއްޖެ ދެކެފައި ނުވާކަމަށް ސަމީރު ވިދާޅުވިއެވެ. އަދި ބައެއް ބޭފުޅުން ވެރިކަމަށް ވަޑައިގެން، ކޮށްދެއްވާނެ ކަމަށް ވިދާޅުވާ ކަންކަމަކީ މިހާރު ކޮށްފައިވާ، އަދި ކުރަމުންދާ ކަންކަން ކަމަށްވެސް ސަމީރު ވިދާޅުވިއެވެ. އެހެންކަމުން، ވެރިކަމަށް ކުރިމަތިލެއްވުމުގެ ކުރިން ރަނގަޅު މައުލޫމާތުވެސް ބައެއް ބޭފުޅުން ހޯއްދަވާފައި ނުވާކަން އެނގޭކަމަށް ސަމީރު ވިދާޅުވިއެވެ.
