ބްރެޒިލް އިން ކިއުބާއާއެކު ވިޔަފާރި އަދި ސިޔާސީ ގުޅުން އަލުން ބަދަހިކުރަން ނިންމާފައިވާކަމަށް އެގައުމުގެ ރައީސް ލުއިޒް އިނާސިއޯ ލޫލާ ޑަ ސިލްވާގެ އަރިސް ބޭފުޅަކު ހާމަކުރައްވައިފިއެވެ.

ބްރެޒިލް ސަރުކާރުގެ އިސް އޮފިޝަލަކު މިހެން ވިދާޅުވެފައި މިވަނީ ހުކުރު ދުވަހު، ހަވާނާގައި ކުރިއަށްގެންދެވުނު ބްރެޒިލްގެ ރައީސް އާއި ކިއުބާގެ ރައީސް މިގުއެލް ޑިއޭޒް ކަނެލްގެ ބައްދަލުކުރެއްވުމަށްފަހުއެވެ.

މީގެ ކުރިން 2003ން 2016ށް، ބްރެޒިލްގެ ވެރިކަމުގައި ލޫލާ ހުންނެވި އިރުވެސް ބްރެޒިލް އާއި ކިއުބާ އާ ދެމެދު އޮތް ގުޅުން ވަރަށް ވަރުގަދައެވެ. ނަމަވެސް 2019 ވަނަ އަހަރު ވެރިކަމާ ހަވާލުވެވަޑައިގެންނެވި ރައީސް ޖެއަރ ބޮލްސޮނާރޯގެ ވެރިކަމުގައި ބްރެޒިލް އާއި ކިއުބާގެ ގުޅުމަށް ވަނީ ހީނަރުކަން އައިސްފައެވެ.

މިއަހަރުގެ ޖެނުއަރީ މަހުން ފެށިގެން ބްރެޒިލް އިން ދަނީ އެގައުމާއި ކިއުބާ އާ ދެމެދު އޮތް ގުޅުން އަލުން ވަރުގަދަ ކުރުމަށް މަސައްކަތްކުރަމުންނެވެ.

ހަވާނާއަށް ކުރެއްވި ދަތުރުފުޅުގެ ތެރެއިން ބްރެޒިލްގެ ރައީސްގެ އެޑްވައިޒަރު ސެލްސޯ އަމޮރިމް ވަނީ ބްރެޒިލް އާއި ކިއުބާއާ ދެމެދު އޮތް ރަހުމަތްތެރިކަމަކީ ފާހަގަކޮށްލެވޭފަދަ އެކުވެރިކަމަކަށް ހެދުމަށް މަސައްކަތްކުރާނެ ކަމަށް ވިދާޅުވެފައެވެ. މިއީ ސަރަހައްދުގެ ސުލްހަޔަށާއި އިގުތިސާދީ ކުރިއެރުމަށް މުހިންމު ފިޔަވަޅެއްކަމަށްވެސް ބްރެޒިލްގެ ރައީސްގެ އެޑްވައިޒަރު ވަނީ ސިފަކުރައްވާފައެވެ.

މީގެ އިތުރުން، ބްރެޒިލްގެ ސިއްހީ ތަޖުރިބާކާރުންނާއި ދަނޑުވެރިކަމުގެ ދާއިރާގެ މަންދޫބުން ވަރަށް އަވަހަށް ކިއުބާއަށް ދަތުރުކުރާނެ ކަމަށްވެސް އަމޮރިމް ވަނީ ވިދާޅުވެފައެވެ.

ކިއުބާއަކީ ބްރެޒިލްގެ އެކި ސަރަހައްދުތަކުގައި މަސައްކަތްކުރުމަށް، ބިދޭސީ ޑޮކްޓަރުން ރެކްރޫޓް ކުރުމަށް 2013 ވަނަ އަހަރު ބްރެޒިލުން ފެށި 'މޯރ ޑޮކްޓަރސް ޕްރޮގްރާމް'ގައި ބޮޑު ސަމާލުކަމެއްދޭ ގައުމެކެވެ. މިޕްރޮގްރާމް އަކީ ބޮލްސޮނާރޯއާ އަށް ކަމުދިޔަ ޕްރޮގްރާމަކަށް ނުވުން، އެމަނިކިފާނުގެ ވެރިކަމުގައި މި ޕްރޮގްރާމް ވަނީ ހުއްޓާލައިފައެވެ. މިއާއެކު ކިއުބާގެ ސަރުކާރާއެކު އޮތް ގުޅުމަށް ނުތަނަވަސްކަން މެދުވެރިވިއެވެ.

މިއަހަރުގެ ޖޫން މަހު ޕެރިސްގައި ކުރިއަށްދިޔަ ނިއު ގްލޯބަލް ފައިނޭންސިން ޕެކްޓް ސަމިޓްގެ ހަވާސާ ގައިވެސް ބްރެޒިލްގެ ރައީސް އާއި ކިއުބާގެ ރައީސް ވަނީ ބައްދަލުކުރައްވާފައެވެ.