ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބު ދައްކަވައިގެން އުޅުއްވާ ވާހަކައަކަށް ގިނަ ބައެއްގެ ފާޑުކިޔުން މިދަނީ އަމާޒުވަމުންނެވެ. ސަބަބުތަކެއްވެސް ނެތިއެއް ނޫނެވެ.
ރިޔާސީ ކެމްޕޭނަށް އަތޮޅުތެރެއަށް ވަޑައިގެން އިލްޔާސް ގެންދަވަނީ ކުރިއަށް އޮތް 5 އަހަރަށް ވެރިކަން ހިންގުމަށް އެ ޕާޓީން އިސްކަންދޭނެ ކަންކަން ކިޔާދެމުންނެވެ.
އޭގެ ތެރެއިންވެސް ގިނަ ބައެއްގެ ފާޑުކިޔުން އަމާޒުވެގެންދިޔަ އެއް ވާހަކައަކީ، ސުކޫލުތަކާއި ކްލާސްރޫމް އިމާރަތް ކުރުމާއި، ހެލްތް ސެންޓަރާއި ރަށްރަށުގެ ބަނދަރު ތަރައްޤީ ކުރުން ފަދަ ކަންކަމަކީ ދެވަނަ ދަރަޖައިގެ ކަންކަން ކަމުގައި ސިފަ ކުރައްވައި ދެއްކެވި ވާހަކައެވެ.
އިލްޔާސް ވިދާޅުވާ ގޮތުގައި ފުރަތަމަ ރަށްރަށަށް ގެންދަންވީ ޑޮކްޓަރުންނެވެ. ޓީޗަރުންނެވެ. ހެލްތު ސެންޓަރު އެޅުމާއި، ކްލާސްރޫމްތައް އެޅުމަކީ އަދި މާފަހުގެ ކަމެކެވެ.
ރައްޔިތުންނަށް ދަންނަވާލަން އޮތީ އެންމެ ވާހަކައެއް، ސިޔާސީ މީހަކު ރަށަކަށް ވަޑައިގަންނަވާއިރު ތިބޭފުޅުން ވިދާޅުނުވާށޭ ހޮސްޕިޓަލެއް، މިތާ އެކްސްޓެންޝަނެއް، މިތާ ކްލާސްބަރިއެއް، މިތާ ހޯލެއް، މިތާ އެއާކޮންޑިޝަނެއް، މިތާ މަލްޓި ޕާރޕޯސް ހޯލެއް، މިތާ ބޭސްފިހާރައެއް، ތިހެން ވިދާޅުނުވާށޭ. ތިބޭފުޅުންގެ ދަރިންގެ މުސްތަޤުބަލު ގުޅިފައި އޮތީ އެތާއިންނަ މަލްޓި ޕާރޕޯސް ހޯލަކާ ނޫނޭ، އެތާއިން ކްލާސްރޫމަކާއެއް ނޫނޭ،ދަ ޑިމޮކްރެޓްސްގެ ކެނޑިޑޭޓު އިލްޔާސް ލަބީބު
އިލްޔާސް ވިދާޅުވާ ގޮތުގައި މުހިއްމީ އެތަންތަނުންދޭ ޚިދުމަތެވެ. ފެންވަރެވެ. ނިކަން ތެދު ވާހަކައެކެވެ.
ސަރުކާރުން ސުކޫލުތަކުގައި އިތުރު ކްލާސްރޫމްތައް އަޅަނީ ތިޔަ ވިދާޅުވި ފެންވަރު ޤާއިމު ކުރުމަށެވެ. ހުރިހާ ދަރިވަރުން ހޯލެއްގައި ބައިތިއްބައިގެން، ކޮންމެ ކްލާހެއްގެ އިން ވަކިކުރަން ފޮތިގަނޑު ދަމައިގެން ތިބެގެން މިއަދު ތިޔަ ވިދާޅުވާ ފެންވަރު ޤާއިމު ނުކުރެވޭތީއެވެ.
ސަރުކާރުން ހެލްތު ސެންޓަރުތަކާއި އެކްސްޓެންޝަން އިމާރަތްތައް ޤާއިމުކުރަނީ ހަމަ ތިޔަ ވިދާޅުވި ފެންވަރު ޤާއިމު ކުރުމަށެވެ. އިތުރު ކުރުމަށެވެ. އެކަށީގެންވާ ޚިދުމަތްތައް ދެވޭނެ ވޯޑުތަކާއި، ޑިޕާޓްމަންޓުތައް މިއަދު ބޭނުންވާތީއެވެ.
ވެދާނެއެވެ. މިވީހާ ޒަމާނު ރަށްރަށުގައި ކަންކަން ހިނގަމުން އައީވެސް އެގޮތަށެވެ.
އެދުރުދައިތަ އޭނާގެ އަމިއްލަ ގޭގައި ވޮށިފިލާ އަޅައިގެން، ކުދިންނަށް ކިޔަވައިދެމުން ދިޔައެވެ. އެއީ ކޮންމެ ގްރޭޑަކަށް، ކޮންމެ ބަޔަކަށް ވަކި ކްލާސްރޫމްތަކެއް ހުންނައިރެއް ނޫނެވެ.
ހެލްތު ސެންޓަރުތައްވެސް ހަމަ އެހެންނެވެ. އޭރު ހުންނަނީ ފޫޅުމާދައިތައާއި ކިޔެވެލިބެއެވެ. ހެލްތު ސެންޓަރެއް ނެތެއްކަމަކު، ރެޔާއި ދުވާލު ބަލި މީހުންގެ ކަންކަން އެމީހުން ބަލަމުންގެންދާނެއެވެ.
ނަފްސާނީ މައްސަލައެއް ދިމާވެއްޖެނަމަ، ކިޔެވެލިބޭ ހުންނާނެއެވެ. އެއީ އެއިރެވެ.
ނަމަވެސް ޒަމާނާއި މަކާނަށް މިއައި ބަދަލުތަކާއެކު، ކަންކަން މިވަނީ ބަދަލުވެފައެވެ.
މިއަދު އެންމެ ޑޮކްޓަރެއް ރަށަށް ގެނެސް، އޭނާ ގެއެއްގައި ބަހައްޓައިގެން ފަރުވާ ދިނުމަކީ އަދި އެންމެ އެދެވޭ ގޮތަކަށް ނުވެއެވެ.
ކުރިއަރަމުން އަންނަ ސިއްޙީ ޚިދުމަތާއެކު، ސިއްޙީ ފަރުވާވެސް ދަނީ ފުޅާވަމުންނެވެ. ހެލްތު ސެންޓަރުތަކާއި ލެބޯޓަރީތަކާއި، ބޭސްފިހާރަތަކާއި، ނުވިތާކަށް ސިއްޙީމަރުކަޒުތަކުގެ އެކްސްޓެންޝަން އިމާރަތްތައް މިއަދު ރައްޔިތުންނަށް ބޭނުންވެއެވެ.
ނަފްސާނީ ފަރުވާއަށް ޚާއްސަ މެންޓަލް ހެލްތު ސެންޓަރުތައް ޤާއިމުކޮށްދޭން މިއަދު ރައްޔިތުން އެދެއެވެ. ކެންސަރ ހޮސްޕިޓަލާއި، ޑައިލިސިސް ޚިދުމަތް ދެވޭނެ އުމްރާނީ ވަސީލަތްތަކަށްވެސް ރައްޔިތުން މިއަދު ތިބީ ފެންބޮވައިގެންފައެވެ.
ރައްޔިތުންނަށް ހެޔޮއެދޭނަމަ ކޮށްދެންވީ އެ ދެކަންތައްވެސް ހަމަހަމަ އުސޫލަކުންނެވެ.
އެހެންނަމަވެސް، ސަރުކާރުން ހިންގަމުން ގެންދާ ޕްރޮޖެކްޓުތަކަށް ފާޑުވިދާޅުވުމުގެ ނިޔަތުގައި، ނުވަތަ ސަރުކާރުން ކުރީތީ އެކަންކަމަކީ ދެވަނަ ދަރަޖައިގެ، މުހިއްމު ނޫން ކަންކަން ގޮތުގައި ސިފަކުރައްވާ ތިޔަ ދައްކަވާ ވާހަކަތައް މީހުން ބަލައެއް ނުގަނެއެވެ. ތިކަމުން ސާފުވަނީ، އަމިއްލަ ސިޔާސަތެއް ނެތުމުން، ދެން ތިބި ބަޔަކު ކުރަހާ ތަސްވީރުގައި ކުލަހާކައި ހުތުރުކުރަން އުޅޭކަމެވެ.
އެކަންކަން ކުރުމަށް ބޭނުންވާ ކްލާސްރޫމާ، ހޮސްޕިޓަލާ، ޓާޝަރީ ހޮސްޕިޓަލާ ހުރިހާ ކަމެއްވެސް ބިނާ ކުރެވިދާނެ، އެއީ ސެކަންޑަރީ ކަންކަންދަ ޑިމޮކްރެޓްސްގެ ކެނޑިޑޭޓު އިލްޔާސް ލަބީބު
މިއަދު ރައްޔިތުންނަށް ބިނާވެށި ތަރައްޤީއާއި އުމްރާނީ ތަރައްޤީވެސް މުހިއްމެވެ. ވަސީލަތްތަކާއި އާލަތްތައްވެސް މުހިއްމެވެ. ސަރުކާރަށް ފާޑުވިދާޅުވާން މިއަދު ތިޔަ ދެއްކެވި ވާހަކަ ރައްޔިތުންނަކަށް ކަމަކުނުދެއެވެ. ރައްޔިތުން އެދެނީ ކޮންމެވެސް އައު ވާހަކައެއް އަޑުއަހާށެވެ.
