ޗެލްސީގެ ކެޕްޓަން ރީސް ޖޭމްސްއަށް އަނިޔާވެ، އައު ސީޒަނުގެ ފުރަތަމަ ދުވަސްކޮޅު ކުޅުމާ ދުރަށް ދާން ޖެހިއްޖެކަމަށް ޓީމުގެ ކޯޗް، މައުރީސިއޯ ޕޮޗެޓީނޯ ބުނެފިއެވެ.
ޖޭމްސްގެ ފަލަމަސްގަނޑަށް އަނިޔާވީ ފަރިތަކުރުންތަކުގެ ތެރޭގައެވެ. އޭނާއަށް ލިބުނު އަނިޔާ ދެނެގަތުމަށްފަހު މިހާރު ވަނީ ރިހެބިލިޓޭޝަން ފަށައިފިއެވެ. ޖޭމްސް ވަނީ ސީޒަނުގެ ފުރަތަމަ މެޗު ކުޅެފައެވެ. ލިވަޕޫލް ކައިރިން 1-1ގެ ނަތީޖާއަކުން އެއްވަރުވި މެޗުގެ 77 ވަނަ މިނެޓުގައި އޭނާ ވަނީ ބަދަލުކޮށްފައެވެ.
ޕޮޗެޓީނޯ ބުނީ، ޖޭމްސްއަކީ ކެޕްޓަން ކަމަށް ވުމުން، މިއީ ހިތާމަވެރި ވަގުތުކޮޅެއް ކަމަށެވެ. އަދި އޭނާ ހުރީ ކެޕްޓަންކަން ވަރަށް ކުރާހިތުން ކަމަށެވެ. ޕޮޗެޓީނޯ އިތުރަށް ބުނީ، ގިނަ ދުވަސްތަކެއް ނުވަނީސް ޖޭމްސް އެނބުރި އަންނާނެ ކަމަށެވެ.
މިދިޔަ ސީޒަނުގައިވެސް ޖޭމްސްއަށް އަނިޔާވެ، ކުޅުމާ ދުރަށް ދާން ޖެހިފައިވެއެވެ. އެކަމުގެ ސަބަބުން އޭނާއަށް ލީގުގައި ކުޅެވިފައިވަނީ އެންމެ 16 މެޗެވެ. އޮކްޓޫބަރު މަހު އޭނާގެ ކަކުލަށް ލިބުނު އަނިޔާއާ ގުޅިގެން ވޯލްޑް ކަޕު ކުޅުމުގެ ފުރުސަތުވެސް ވަނީ ގެއްލިފައެވެ.
ޗެލްސީގެ އެކަޑެމީން ތަމްރީނު ހޯދާފައިވާ ޖޭމްސްއަށް ޓީމުގެ ކެޕްޓަން ބޭންޑް ލިބުނީ ކުރީގެ ކެޕްޓަން އަޒްޕިލިކުއެޓާ އެ ޓީމު ދޫކޮށް، މި ހޫނު މޫސުމުގައި ދިޔުމުންނެވެ.
