"މިއީ ރާއްޖޭގެ އިންތިޚާބަށް އީޔޫ އިން ފޮނުވި އެންމެ ބޮޑު މިޝަން، ކަންކަން ވަރަށް ކައިރިން ބަލާނަން"
18 އޯގަސްޓު 2023 | ހުކުރު 08:09އިންތިޚާބާއި ގުޅުން ހުރި ކަންކަމުގައި ޤާނޫނު ތަންފީޒުކުރޭތޯ އާއި އިލެކްޝަންސް ކޮމިޝަންގެ މަސައްކަތްތައް ދަނީ ރަނގަޅަށްތޯ ވެސް އެ ކޮމިޝަނުން ބަލާނެ
ޔޫރޮޕިއަން ޔޫނިއަން (އީޔޫ)ގެ ވަފުދު
މި ފަހަރު ރާއްޖޭގެ ރިޔާސީ އިންތިޚާބު އޮބްޒަރވްކުރުމަށް އީޔޫ އިން ފޮނުވި މިޝަން އަކީ މިފަދަ ކަމަކަށް އީޔޫ އިން ރާއްޖެ އަށް ފޮނުވި އެންމެ ބޮޑު މިޝަން ކަމަށާއި ކަންކަން ވަރަށް ކައިރިން ބަލާނެ ކަމަށް އީޔޫ އިން ބުނެފިއެވެ.
އަންނަ ސެޕްޓެމްބަރު މަހުގެ 9ގައި ބާއްވާ ރިޔާސީ އިންތިހާބުގެ ކަންކަން ހިނގާ ގޮތް މޮނިޓާކޮށް، އިންތިހާބުގެ މިނިވަންކަމާއި އިންސާފުވެރިކަން ކަށަވަރުކުރުމަށް އެކުލަވާލާފައިވާ ޔޫރަޕިއަން ޔޫނިއަން (އީޔޫ)ގެ އިލެކްޝަން އޮބްޒަވޭޝަން މިޝަންގެ މަސައްކަތް ރަސްމީކޮށް ފަށާފައި ވަނީ ބުރާސްފަތި ދުވަހުއެވެ.
ނޫސްވެރިންނަށް މައުލޫމާތުދެއްވަމުން މިޝަންގެ ޗީފް އޮބްޒާވަރު އަދި އީޔޫގެ ގާނޫނު ހަދާ މަޖިލީހުގެ މެންބަރު ނާޗޯ ސަންޗޭޒް އަމޯ ވިދާޅުވީ މިއީ ޔޫރަޕިއަން ޔޫނިއަން އިން ރާއްޖެއަށް ފޮނުވި ދެވަނަ އިންތިހާބު އޮބްޒަވޭޝަން މިޝަން ކަމަށެވެ. މީގެ އިތުރުން އެ މިޝަނުން ރިޔާސީ އިންތިހާބާ ގުޅޭ ހުރިހާ ކަމެއްވެސް ގާތުން ބަލައި އެކަންކަން ހިނގަމުންދާ ގޮތް ދެނެގަންނާނެ ކަމަށް އޭނާ ވިދާޅުވިއެވެ. އަދި އީޔޫ އިން ބުނީ ރާއްޖޭގައި ބާއްވާ ރިޔާސީ އިންތިޚާބަކީ މިނިވަން އިންސާފުވެރި އިންތިޚާބެއްކަން ކަށަވަރުކުރާނެ ކަމަށެވެ. ހަމައެހެންމެ ކެނޑިޑޭޓުންނަށް ހަމަހަމަ ފުރުސަތެއް ލިބޭކަން ޔަގީންކުރުމާއި، ކަންކަން މޮނިޓަރކުރުމަށް އެ ކޮމިޝަނުން އަދާކުރަން ޖެހޭ ދައުރު ފުރިހަމަ އަށް އަދާކުރާނެ ކަމަށް ވަނީ ބުނެފައެވެ.
އިންތިޚާބާއި ގުޅުން ހުރި ކަންކަމުގައި ޤާނޫނު ތަންފީޒުކުރޭތޯ އާއި އިލެކްޝަންސް ކޮމިޝަންގެ މަސައްކަތްތައް ދަނީ ރަނގަޅަށްތޯ ވެސް އެ ކޮމިޝަނުން ބަލާނެއެވެ. މީގެ އިތުރުން މުއައްސަސާތަކާއި އިދާރާތަކުގެ ދައުރު އަދާކުރޭތޯ އާއި އިންތިޚާބުގެ ކެމްޕެއިން އާއި ވޯޓުލުމުގެ އެންމެހާ ކަންކަން ދަނީ އުސޫލާއި އެއްގޮތަށްތޯ ބަލާނެއެވެ. މީޑިއާގެ ދައުރާއި އިލެކްޝަންގެ ނަތީޖާ އާއި ގުޅުން ހުރި ކަންކަން ވެސް އެ ކޮމިޝަނުން ބަލާނެއެވެ. އަދި އެ ކަންކަމަށް ރިއާޔަތްކޮށް ތަފްސީލް ރިޕޯތެއް އެކުލަވާލާނެއެވެ.
