އައްޑޫއިން ގޯތި ލިބޭ މީހުންގެ ވަގުތީ ލިސްޓު އާންމުކޮށް ޝަކުވާ ހުށަހެޅުމަށް ހުޅުވާލައިފި

އައްޑޫ ސިޓީން ގޯތި ލިބޭ މީހުންގެ ވަގުތީ ލިސްޓު އާންމުކޮށް ޝަކުވާ ހުށަހެޅުމުގެ ފުރުސަތު ހުޅުވާލައިފިއެވެ.

ގޯއްޗަށް އެދުނު މީހުންގެ ތެރެއިން ޝަރުތު ހަމަވި އެންމެނަށް ގޯތި ދިނުމަށް އައްޑޫ ސިޓީ ކައުންސިލުން ވަނީ ނިންމާފައެވެ. އެކަން ހާމަކުރައްވާ އައްޑޫ ސިޓީގެ މޭޔަރ އަލީ ނިޒާރު ކުރެއްވި ޓްވީޓެއްގައި ވިދާޅުވެފައިވަނީ ޝަރުތުހަމަވާ އެންމެންނަށް ގޯތިދޭން ނިންމިއިރު، އޭގެ ތެރޭގައި، އަލަތު ކައިވެންޏެއް ނުކޮށް ތިބި ޒުވާނުން ވެސް ހިމެނޭ ކަމަށެވެ.

އައްޑޫއިން ގޯތި ދޫކުރަނީ މިހާރު ހުރި ބިމުންނާއި، އަލަށް ހިއްކާ ބިން ވެސް ހިމެނޭހެންނެވެ.

އައްޑޫގެ ބިން ހިއްކުމަށް ހިންގާ 1.5 ބިލިއަން ރުފިޔާގެ މަޝްރޫއުގެ ދަށުން އެ ސިޓީގެ ހަތަރު ސަރަހައްދަކުން 193 ހެކްޓަރުގެ ބިން ހިއްކަން ހަމަޖެހިފައިވެއެވެ. އަދި 11 ކިލޯމީޓަރުގެ ގޮނޑުދޮށުގައި ބޮޑުހިލަ ޖަހާނެއެވެ. އޭގެ އިތުރުން ހުޅުމީދޫގައި 42 ހެކްޓަރުގެ ބިން ހިއްކުމަށް އެމްޓީސީސީން 179 މިލިއަން ރުފިޔާގެ މަޝްރޫއެއް ވެސް އެބަ ކުރިއަށް ގެންދެއެެވެ.

އައްޑޫ ސިޓީ ކައުންސިލުން ބުނީ ވަގުތީ ލިސްޓާއި ގުޅިގެން ޝަކުވާ ހުށަހެޅުމަށް ބޭނުންވާ ފަރާތްތަކުން ފޯމުލިީ އަވަށު އޮފީހަށް ޝަކުވާ ހުށަހެޅުމުގެ ފުރުސަތު 20 އޮގަސްޓް ވާ އާދީއްތަ ދުވަހުން ފެށިގެން 27 އޮގަސްޓް ވާ އާދީއްތަ ދުވަހުގެ 12:00އަށް ހުޅުވާލެވިފައިވާ ކަމަށެވެ.

އަދި ދާއިމީ ލިސްޓް ޢިއުލާންކުރުމުގެ ކުރިން ވަގުތީ ލިސްޓްގައި ޝަރުތުހަމަވާކަމަށް ކަނޑައަޅާފައިވާ ފަރާތްތަކުން ހުށަހަޅާފައިވާ ފޯމުގައި ދީފައިވާ މަޢުލޫމާތުގެ ޞައްޙަކަން ކަށަވަރުކުރުމުގެ މަސައްކަތް ކައުންސިލު އިދާރާގެ އަވަށުއޮފީސް ތަކުން ކުރަމުން ގެންދާކަމަށްވެސް އައްޑޫ ސިޓީ ކައުންސިލުން ބުނެއެވެ.