ޖަލު ހުކުމެއް ތަންފީޒުކުރައްވާ ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ މައްސަލައަކީ ޝަރުއީ މައްސަލައެއް ކަމަށާއި، ޝަރުއީ ގޮތުން ކުރިއަށްދާ މައްސަލައަކަށް އީޔޫއިން ނުވަންނާނެ ކަމަށް، ޔޫރަޕިއަން ޔޫނިއަން (އީޔޫ)އިން ބުނެފިއެވެ.
ކުރިއަށް އޮތް ރިޔާސީ އިންތިޚާބު އިންސާފުވެރިކޮށް ކުރިއަށް ގެންދިއުމަށްޓަކައި ކަމަށް ވިދާޅުވެ، ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވަނީ ޔާމީން މިނިވަންކޮށްދިނުމަށް އީޔޫގައި އެދިވަޑައިގެންފައެވެ. 11 އަހަރުގެ ޖަލު ހުކުމެއް އިއްވާފައިވާ ކުރީގެ ރައީސް އަބްދުﷲ ޔާމީން ގެއަށް ބަދަލުކޮށްދިނުމަށް އެހީވެދިނުމަށް، އީޔޫގައި ރައީސް ނަޝީދު އެދިވަޑައިގެންފައިވަނީ މި ހަފުތާ ތެރޭގައެވެ. ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ވަނީ އެކަމާ ގުޅޭގޮތުން ސުވާލު ދަންނަވާފައެވެ.
އެ ސުވާލުގެ ޖަވާބުގައި އީޔޫގެ ވަފުދުގެ ވެރިޔާ ނާޗޯ ސަންޗޭޒް އަމޯރ ވިދާޅުވީ، އީޔޫގެ ވަފުދު ރާއްޖޭގައި ކުރާ މަސައްކަތަކީ އިންތިޚާބާ ގުޅުންހުރި މަސައްކަތްތައްކަން، ރައީސް ނަޝީދާއެކު އީޔޫއާ ބައްދަލުކުރެއްވި މަޖިލިސް ތަމްސީލުކުރައްވާ ވަފުދަށް ވަރަށް ސާފުކޮށް ދަންނަވާފައި ވާނެކަމަށެވެ. އެއްވެސް ސިފައެއްގައި ޔާމީންގެ މައްސަލައާމެދު އެއްޗެއް ބުނުމުގެ ހައިސިއްޔަތެއް އެ ވަފުދުގެ ނެތްކަމަށް އޭނާ ވިދާޅުވިއެވެ. ޝަރީއަތުގެ މަރުހަލާގައި އޮތް ކަމަކަށް އީޔޫއިން ނުވަންނާނެ ކަމަށް އޭނާ ވިދާޅުވިއެވެ.
މީގެ އިތުރުން އީޔޫއިން ރާއްޖެ އައި، ވަފުދުން އިންތިޚާބުގެ ކަންކަން ކުރިއަށްދާ ގޮތް އޮބްޒަރވް ކުރުމަށްފަހު އިބްތިދާއީ ބަޔާނެއް ނެރޭނެކަމަށް އޭނާ ވިދާޅުވިއެވެެ. އަދި މި އިންތިޚާބުގައި ހިނގާ ކަންކަމަށް ބަލައި، އިތުރަށް ރަނގަޅު ކުރެވިދާނެ ކަންކަމުގެ ރިޕޯޓެއް އިލެކްޝަނަށް ހުށަހަޅާނެ ކަމަށް އޭނާ ވިދާޅުވިއެވެ.
