ހޭންޑްބޯޅަ ޓީމްގެ އަމާޒު މެޑައްޔަށް! ބޮޑު ހިތްހަމަޖެހުމަކީ ފިޓްނަސް ރަނގަޅުވުން
17 އޯގަސްޓު 2023 | ބުރާސްފަތި 09:31ދެޓީމްވެސް މިވަގުތު ތައިލެންޑްގައި
ހޭންޑްބޯޅަ މެޗެއްގައި ފިރިހެން ޓީމް ވާދަކުރަނީ
މިމަހު މަޑަގަސްކަރާގައި ފަށާ އިންޑިޔަން އޯޝަން އައިލެންޑް ގޭމްސްގައި އަމާޒަކީ މެޑެލް ހޯދުންކަމަށް ހޭންޑް ބޯޅަ ޓީމްގެ ކޯޗު ސާބިއާގެ ބްރަޓިސްލާވް ސްޓޮމެނޮވިޗް ބުނެފިއެވެ. ޤައުމީ ފިރިހެން ޓީމަށް އިރުޝާދު ދެމުން އަންނަ ކޯޗު މެޑައްޔަށް ކުރާ މަސައްކަތުގައި އެންމެ ބޮޑު އިސްކަމެއް މިހާރު ދެނީ ފިޓްނަސްއަށެވެ.
2019 ވަނަ އަހަރުވެސް ޤައުމީ ޓީމަށް އިރުޝާދުދިން ކޯޗު ބުނީ ގިނަ ދުވަސްތަކަކަށްފަހު އަލުން ރާއްޖޭގެ ޓީމާ ހަވާލުވިއިރު ކުޅުންތެރިންގެ ފިޓްނަސް އެހާ ރަނގަޅު ނޫންކަމަށެވެ. ފިޒިކަލް އެކަމަކު މިދިޔަ މުއްދަތުގައި ކުރި މަސައްކަތުން ފިޓްނަސް ރަނގަޅު ހާލަތަކަށް ގެނެވިފައިވާކަން ފާހަގަކުރިއެވެ. ކޯޗު ގަބޫލުކުރާ ގޮތުގައި މިހާރު މިއޮތް ފެންވަރުން، އަނިޔާގެ މައްސަލަތަކެއް ކުރިމަތި ނުވެ ގޭމްސްއަށް ދެވިއްޖެނަމަ ޤައުމީ ޓީމަށް މެޑަލް ހޯދުމުގެ އުންމީދު ބޮޑެވެ. އެހެންނަމަވެސް، އެކަމަށް ޔަގީންކަން ނުދޭނެ ކަމަށާއި، އެކަމަށް ކުރާނީ މަސައްކަތް ކަމަށް ކޯޗު ސްޓޮމެނޮވިޗް ބުންޏެވެ. ކޯޗުގެ އެންމެބޮޑު އެއް ކަންބޮޑުވުމަކީ އައުޓްޑޯ ކޯޓްގައި ޕްރެކްޓިސް ކުރަން ޖެހުމެވެ. އެކަމަކު މިހާރު ޓީމް ވީ ތަމްރީނު ހޯދުމަށް ތައިލެންޑްގައެވެ. ދެން އޮތް ގޮންޖެހުމަކީ އިދިކޮޅު ޓީމްގެ ފެންވަރު ކޯޗަށް ދެނެގަނެވިފައި ނެތުމެވެ.
ޤައުމީ އަންހެން ޓީމްގެ ކޯޗު ހުސައިން އައްޒާމް ބުނީ ޓީމްގެ މިސްރާބު ހުރިގޮތުން ރަނގަޅު ނަތީޖާއެއް ހޯދޭނެކަމަށެވެ. އޭނާ ފާހަގަކުރީ ހޭންޑްބޯޅަ ކުޅޭ ކުދިން ގިނަވުމާއެކު ރަނގަޅު ކަންތައްތަކެއް ފެންނަމުންދާ ކަމެވެ. އެގޮތުން ގައުމީ ޓީމުން ޖާގަ ހޯދަން ކުރާ މަސައްކަތް ބޮޑުމާއެކު ކުޅުންތެރިންގެ ހުނަރު ބޮޑަށް ކުރިއަރާތަން ފެންނަކަމަށް ބުންޏެވެ. އައްޒާމް ބުނީ ޤައުމީ އަންހެން ހޭންޑްބޯޅަ ޓީމަކީ މިވަގުތު ރާއްޖެއިން ނެގެން އޮތް އެންމެ ވަރުގަދަ ޓީމް ކަމަށެވެ.
އަންހެން ޓީމުގެ ކުޅުންތެރިންވެސް ފާހަގަކުރީ ފަރިތަކުރުންތަކުން އެންމެ ބޮޑަށް ރަނގަޅުކުރެވުނު އެއް ކަމަކީ ފިޓްނަސް ކަމަށެވެ. އެގޮތުން ފުރަތަމަ ފަރިތަކުރުންތައް ފެށިއިރާއި މިހާރާ އަޅާ ބަލާއިރު، ކުޅުންތެރިންގެ ފިޒިކަލް ހާލަތު ވަރަށް ބޮޑަށް ރަނގަޅުވެފައިވާ ކަމަށްވެސް އަންހެން ޓީމުގެ ކުޅުންތެރިން ފާހަގަކޮށްފައިވެއެވެ. ދެޓީމްވެސް މިހާރު ތަމްރީނު ހޯދަމުން ދަނީ ތައިލެންޑްގައެވެ. ކުޅުންތެރިން ތިބީ ރިލީޒްގައެވެ.
