އިދިކޮޅު ކެންޑިޑޭޓް ޑރ.މުހައްމަދު މުއިއްޒު އަކީ ވަޑައިގަންނަވާ ކޮންމެ ތަނަކުން ބޯވައެއްހެން ކުލަ ބަދަލުކުރައްވާ ބޭފުޅެއް ކަމަށް ވިދާޅުވެ ރައީސް ޞާލިހުގެ ރިޔާސީ ކެމްޕެއިންގެ ތަރުޖަމާނު މާރިޔާ އަހުމަދު ދީދީ މުއިއްޒަށް ވަރަށް ބޮޑަށް ފާޑު ވިދާޅުވެއްޖެއެވެ.

މާރިޔާ އެފަދައިން ވިދާޅުވީ ސޯލްޓް ކެފޭގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.

އިދިކޮޅުގެ ކެންޑިޑޭޓް ޑރ.މުހައްމަދު މުއިއްޒު އަކީ ޕީޕީއެމް-ސަލަފް ކެންޑިޑޭޓެއް ކަމަށްވެސް މާރިޔާ ވިދާޅުވިއެވެ. އެމަނިކުފާނަކީ މާލޭގެ މޭޔަރުކަމަށާއި، މޭޔަރުކަމަށް ވަޑައިގަންނަވަން ކެމްޕެއިންކުރެއްވި އިރު އެމަނިކުފާނަކީ މާލޭ ބޭފުޅެއް ކަަަމަށް ވިދާޅުވަމުން ގެންދެވިކަމަށް މާރިޔާ ވިދާޅުވިއެވެ. އަދި މުއިއްޒު އަކީ މާލޭގެ ގޯތިވެސް ހުރި ބޭފުޅެއް ކަމަށް މާރިޔާ ވިދާޅުވިއެވެ. އެހެންނަމަވެސް އިންތިޚާބުގެ ކެމްޕެއިނަށް ވަޑައިގަތުމުން އެމަނިކުފާނަކީ ވަށަފަރު ބޭފުޅެއް ކަމަށް ވިދާޅުވާ ކަމަށް މާރިޔާ ވިދާޅުވިއެވެ. އަދި ދ.އަތޮޅަށް ވަޑައިގަންނަވާފައި އެ އަތޮޅަކީ ވެސް އެމަނިކުފާނުގެ ނުވަތަ އަނބިކަނބަލުންނާއި ގުޅުން ހުރި ތަނެއް ކަމަށް ވިދާޅުވެފައިވާ ކަމަށް މާރިޔާ ވިދާޅުވިއެވެ.

މާރިޔާ އިތުރަށް ވިދާޅުވީ ކޮންމެ ތަނަކަށް ވަޑައިގަތަސް މުއިއްޒު އުޅުއްވަނީ އަމިއްލަ ފައިދާއަށް ކަމަށެވެ. އިންތިޚާބަށް ކުރިމަތިލައްވަވަމުން އިންތިޚާބަށް ނުކުމެވަޑައިގަތީ ޔާމީނަށްޓަކައި ކަަމަށް މުއިއްޒު ވިދާޅުވި ކަމަށް މާރިޔާ ވިދާޅުވިއެވެ. ޔާމީން ދޫކޮށްލަން ވުމުން އުސޫލުތަކުގެ މަތިން ޔާމީން ދޫކޮށްލާނެ ކަަމަށް ވިދާޅުވި ނަމަވެސް ހުރިހާ ކޯޓުތަކުގެ ކުރީގެ ރައީސް ޔާމީން އަބްދުލް ޤައްޔޫމަކީ ކުށްވެރިއެއް ކަަމަށް ނިންމާފައި ވަނިކޮށް ޔާމީން ދޫކޮށްލާނެ ޤާނޫނީ ހަމައެއް ކޮބާތޯ މާރިޔާ ސުވާލުކުރެއްވިއެވެ.

މާރިޔާ ވަނީ މުއިއްޒުގެ ސިޔާސީ ހަޔާތްޕުޅުގައި އޭނާ ގިނަ ޕާޓީތަކަކަށް ކައިރި ކައިރީގައި ބަދަލުވެވަޑައިގެންނެވިކަން ފާހަގަކުރައްވާފައެވެ. 2008 އިން 2010 އަށް މުއިއްޒު ހުންނެވީ ޖުމްހޫރީ ޕާޓީގައި ކަމަށާއި، 2010 އިން 2012 އަށް އަދާލަތު ޕާޓީގައި، 2012 އިން 2013 އަށް ގައުމީ އިއްތިހާދު ޕާޓީ، 2013 އިން މި އިހަށް ދުވަހާއި ޖެހެންދެން ޕީޕީއެމްގައި އުޅުއްވި ކަމަށް މާރިޔާ ވިދާޅުވިއެވެ. އަދި މޭޔަރު ކަމަށް ވެސް އިންތިޚާބުވެވަޑައިގަތީ ޕީޕީއެމްގެ ޑެޕިއުޓީ ލީޑަރެއްގެ ގޮތުގައި ހުންނަވައިގެން ކަމަށް ވީ ނަމަވެސް ޕީއެންސީން ރިޔާސީ ކެންޑިޑޭޓަކު ނަގާ ވާހަކަ ބުނުމާއެކު އެ ޕާޓީ އަށް ބަދަލުވެވަޑައިގަތް ކަމަށް މާރިޔާ ވިދާޅުވިއެވެ. އެގޮތުން 24 ގަޑި އިރު ތެރޭގައި ޕީއެންސީ އަށް ވަޑައިގެން މިހާރު އިންތިޚާބަށް ވާދަކުރައްވަނީ ޕީއެންސީގެ ކެންޑިޑޭޓެއްގެ ގޮތުގައި ކަމަށް މާރިޔާ ވިދާޅުވިއެވެ.