ސައުޕީ ޕްރޯ ލީގަކީ ވަރަށް ބޮޑު ޗެލެންޖެއް ކަމަށާއި، އެކަމާ ކުރިމަތިލާން ބޭނުންވާ ކަމަށް ބްރެޒިލްގެ ފޯވާޑް ނޭމާ ޖޫނިއާ ބުނެފި އެވެ.
ނޭމާ މިހެން ބުނީ އޭނާގެ ކުރީގެ ކުލަބު ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށްފަހު އަލް ހިލާލަށް ބަދަލުވެ ވާހަކަ ދައްކަމުންނެވެ. ނޭމާ ބުނީ، އައު ލީގަކަށް ބަދަލުވެވުމުން އޭނާ ވަރަށް ހިތްހަމަޖެހިފައި ހުރި ކަމަށެވެ. އެހެންކަމުން މިއީ އޭނާގެ ކެރިއަރުގައި ކުރިމަތިލާން ޖެހޭނެ އައު ޗެލެންޖެއް ކަމަށާއި، އެކަމާ ކުރިމަތިލައި، ތާރީޚު ލިޔަން ބޭނުންވާ ކަމަށެވެ. އިތުރަށް އޭނާ ބުނީ، އެކަހަލަ ޗެލެންޖުތަކާ ކުރިމަތިލާން ޖެހުމަކީ މީހާގެ އަމިއްލަ ނަފްސަށް އޮންނަ އިތުބާރު ވެސް ބޮޑުވެގެން ދާނެ ކަމެއް ކަމަށެވެ. ނޭމާގެ އަމާޒަކީ ސައުދީ ޕްރޯ ލީގަކީ ފެންވަރު ރަނގަޅު، މަޝްހޫރު ލީގަކަށް ހެދުމެވެ. އެ ލީގުން މިހާރު ސޮއި ހޯދަމުން އަންނަ ކުޅުންތެރިންގެ ސަބަބުން އެކަން ހާސިލްވާނެ ކަމަށް ވެސް އޭނާ ދެކެ އެވެ.
މީގެ އިތުރުން ނޭމާ ވަނީ އަލް ނަސްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށް ޚާއްސަ ޝުކުރެއް އަދާކޮށްފަ އެވެ. އޭނާ ބުނީ ރޮނާލްޑޯ ސައުދީ ލީގަށް ބަދަލުވާން އުޅުމުން އޭނާ އަކީ މޮޔައެއް ކަމަށް ގިނަ މީހުން ބުނި ކަމަށެވެ. ނަމަވެސް ސައުދީ ލީގު މިހާރު އޮތް ވަރަށް ފުޅާ ވެގެންދިޔައީ ރޮނާލްޑޯގެ ސަބަބުން ކަމަށް ނޭމާ ފާހަގަކުރި އެވެ. އެހެންކަމުން އެކަމުގައި ރޮނާލްޑޯ އަށް ޝުކުރު އަދާ ކުރަން ބޭނުންވާ ކަމަށް ވެސް އޭނާ ބުންޏެވެ.
ޕީއެސްޖީގެ އިތުރުން ސްޕެއިންގެ ބާސެލޯނާ އަށް ވެސް ކުރިން ކުޅެފައިވާ ނޭމާ ބުނީ، އަލް ހިލާލަށް ބަދަލުވީ އެ ޓީމާއެކު ވެސް ގިނަ ކާމިޔާބީތަކެއް ހޯދުމަށް ކަމަށެވެ. އެގޮތުން އަލް ހިލާލާއެކު ކާމިޔާބު ކުރެވެން ހުރި އެންމެހައި ތައްޓެއް ކާމިޔާބުކޮށް، އެ ކުލަބަކީ ސައުދީގައި ވެސް އަދި ސަރަހައްދުގައި ވެސް މޮޅު ކުލަބަކަށް ހަދައިދޭން ބޭނުންވާ ކަމަށް ނޭމާ ބުންޏެވެ.
އަލް ހިލާލުން ނޭމާ އަށް ޖުމްލަ މުސާރައިގެ ގޮތުގައި ގާތްގަނޑަކަށް 400 މިލިއަން ޑޮލަރު ލިބޭނެ އެވެ. އެ ކުލަބާއެކު އޭނާ ސޮއިކުރީ ދެ އަހަރު ދުވަހުގެ އެއްބަސްވުމެއްގަ އެވެ. އެހެންކަމުން 2025 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި މަޑުކުރާނެ އެވެ.
