ނޭމާގެ މަރުޙަބާގެ މެސެޖެއް ޕައުލީނިއޯ އަށް.!
ޕައުލީނިއޯ ވަނީ ބްރެޒިލްގެ ގައުމީޓިމުގައިވެސް މޮޅުކުޅުމެއް ދައްކާފައި
ޕައުލީނިއޯ އަދި ނޭމާ: ބްރެޒިލްގެ ގައުމީޓިމުން ވިދާލި ދެކުޅުންތެރިން
ދުނިޔޭގެ އެންމެ އަގުބޮޑު ކުޅުންތެރިޔާ ކަމުގައިވާ ނޭމާ ބްރެޒިލްގެ މިޑްފީލްޑަރ ޕައުލީނިއޯއަށް މަރުހަބާ ކިޔައިފިއެވެ.
ޕީއެސްޖީގެ ތަރި ނޭމާ ޕައުލީނިއޯ އަށް މަރުހަބާ ކިޔާފައި ވަނީ ޕައުލީނިއޯ ބާސެލޯނާއާ ގުޅެން ނިންމުމާއި ގުޅިގެންނެވެ.
ޕައުލީނިއޯއަށް މަރުހަބާ ކިޔަމުން ނޭމާ ކޮށްފައިވާ ޓްވީޓެއްގައި ލިޔެފައި ވަނީ އޭނާ ބާސެލޯނާއާއި ގުޅުނުއިރު އުފާވެފައި ހުރިވަރަށް ޕައުލީނިއޯ ވެސް އުފާވާނެ ކަމަށް އުއްމީދުކުރާ ކަމަށާއި ބާސާއަށް ޕައުލީނިއޯ ބަދަލުވުމަކީ ލިބުނު ކާމިޔާބީ އެއްކަމަށެވެ.
" އަހަރެން އުންމީދުކުރަން އަހަރެން ބާސާއާ ގުޅުނުއިރު އުފާވިާ ވަރަށް ޕައުލީނިއޯ ވެސް އުފާވާނެ ކަމަށް. ތީ ލިބުނު ވަރަށް ބޮޑު ކާމިޔާބީއެއް." ނޭމާ ލިޔެފައިވެއެވެ.
ދުނިޔޭގެ ރެކޯޑު ފީއަކަށް ނޭމާ ޕީއެސްޖީއަށް ވިއްކާލުމަށް ފަހު ބާސެލޯނާއިން އަންނަނީ ޓީމު ވަރުގަދަ ކުރުމުގެ ގޮތުން އެޓީމަށް ކުޅުންތެރިން ގެނައުމަށް މަސައްކަތް ތަކެއް ކުރަމުންނެވެ. އެގޮތުން އެޓީމުން މިހާރު ވަނީ ޗައިނާ ސުޕަ ލީގުގައި ކުޅެމުން އަންނަ ބްރެޒިލްގެ މިޑްފިލްޑަރު ޕައުލީނިއޯ ގެނައުމަށް އެއްބަސް ވުމަކަށް އައިސްފައެވެ. އުމުރުން 29 އަހަރުގެ ޕައުލީނިއޯ ބާސެލޯނާއަށް ބަދަލުވުމުގެ އެންމެ ހާކަމެއް ނިމުމަކަށް އައިސްފައިވާއިރު ބާސެލޯނާއިން ވެސް ވަނީ އެކަން ޔަގީން ކޮށްދީފައެވެ.
ޕައުލީނިއޯއާއި ނޭމާ އަކީ ގާތް ދެ ރަހުމަތްތެރިން ކަމަށް ވާއިރު މި ދެކުޅުންތެރިން ވިދާލާފައި ވަނީ ވެސް އެއް ދުވަސްވަރެއްގައި ބްރެޒިލްގެ ގައުމީޓީމުންނެވެ. މި ދެކުޅުންތެރިންނަކީ ވެސް ބަރެޒިލްގެ ގައުމީޓީމުގައި މޮޅުކުޅުމެއް ދައްކާފައިވާ އަދި ދައްކަމުންއަންނަ ދެކުޅުންތެރިންނެވެ.
ޕައުލީނިއޯގެ އިތުރުން ބާސެލޯނާއިން އަންނަނީ ލިވަޕޫލްގެ ކޮޓީނިއޯ އަދި ބޮރޫޝިޔާ ޑޯޓްމުންޑްގެ އުސްމާނޭ ޑެމްބެލޭ ހޯދުމަށް ވެސް މަސައްކަތް ކުރަމުންނެވެ. ދެ ކުޅުންތެރިން ހޯދުމަށް މީގެ ކުރިން ބާސެލޯނާއިން ހުށަހެޅި ބިޑުތަކަށް ދެ ކުލަބުން ވެސް ވަނީ ރިޖެކްޓް ކޮށްފައެވެ.
ބާސެލޯނާ ވަނީ ސްޕެނިޝް ލީގު ހުޅުވުމުގެ ގޮތުން ކުޅުނު ސްޕެނިޝް ސުޕަ ކަޕްގެ ފުރަތަމަ ލެގުގައި އަމިއްލަ ދަނޑުގައި ރެއާލް މެޑްރިޑް އަތުން ތަފާތު ބޮޑުކޮށް ބަލިވެފައެވެ.
