އަޅުގަނޑުމެން މިތިބީ އެތައް ސްޓެޕެއް ކުރީގައި، ދެން ތިބި ޕާޓީތަކަށް ކައިރިވެސް ނުކުރެވޭނެ: ރައީސް
16 އޯގަސްޓު 2023 | ބުދަ 09:05ކުރީ ސަރުކާރުތަކާއި މި ސަރުކާރު ރައްޔިތުންނަށް ވަނީ ޓެސްޓް ކުރެވިފައި
ރައީސް ބޮޑުފޮޅުދޫ ރައްޔިތުންނާ ބައްދަލު ކުރައްވަނީ
އެމްޑީޕީ ހިމެނޭ ކޯލިޝަން އޮތީ އިދިކޮޅު އެހެން ޕާޓީތަކަށްވުރެ އެތައް ސްޓެޕެއް ކުރީގައި ކަމަށާއި އެ ޕާޓީތަކަށް ދެން ކައިރި ވެސް ނުކުރެވޭނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވިދާޅުވެއްޖެއެވެ.
އއ. ބޮޑުފޮޅުދޫގައި ބުދަ ދުވަހު ބޭއްވި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސް ވިދާޅުވީ ކުރީ ސަރުކާރުތަކާއި މި ސަރުކާރު ރައްޔިތުންނަށް ޓެސްޓް ކުރެވިފައިވާ ކަމަށާއި ރަނގަޅީ ކޮން ސަރުކާރެއްކަން އެނގޭނެ ކަމަށެވެ. އެގޮތުން, މިހާތަނަށް ވައުދުވެވަޑައިގެންނެވި ކަންކަމުގެ ތެރެއިން 90 އިންސައްތަ މަސައްކަތް ފެށިގެން ކުރިއަށްދާއިރު މިއީ ކުރީގެ އެއްވެސް ސަރުކާރަކަށް ކުރެވިފައިވާ ކަމެއް ނޫންކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ މިއަދު އިދިކޮޅު ކެންޑިޑޭޓުން ވާން ޖެހޭނެ ވައުދެއް ނެތުމުން ކަންބޮޑުވާނެ ކަމަށެވެ. މިކަމާ އެހެން ޕާޓީތަކުގެ މެންބަރުން ވެސް ވިސްނަން ޖެހޭ ކަމަށާއި އަދި މިފަހަރު އިންތިޚާބުގައި ދޭ ވޯޓަކީ ބޭކާރު ވޯޓަކަށް ނުހެދުމަށް އެދިވަޑައިގެންނެވިއެވެ.
ކުރިއަށް ވެސް ތަރައްގީގެ މަޝްރޫއުތައް ކުރިއަށްގެންދާނެކަން ފާހަގަކުރައްވައި ރައީސް ވިދާޅުވީ ބޮޑުފޮޅުދޫގައި ދެވަނަ ދައުރެއްގައި ބަނދަރު ބޮޑުކޮށް ޒަމާނީ ފެންވަރަށް ތަރައްގީ ކޮށްދެއްވާނެ ކަމަށެވެ. އަދި ރޯހައުސް އަޅުއްވައި ފެންބޮޑުވާ މަގުތަކުގައި ތާރު އަޅުއްވައި, ކައުންސިލާއި ކޯޓާއި ފުލުހުންގެ ޚިދުމަތް ހިންގުމަށް އޮފީސް ކޮމްޕްލެކްސްއެއް ވެސް އަޅުއްވައިދެއްވާނެ ކަމަށް ރައީސް ވިދާޅުވިއެވެ.
މީގެ އިތުރުން ޒުވާނުން ބޭނުންވާ ހޭންޑްބޯލް ކޯޓާއި ފުޓްސަލް ދަނޑު ތަރައްގީކޮށްދެއްވައި, 12 ކްލާސްރޫމުގެ އައު އިމާރާތެއް ސްކޫލުގައި އަޅުއްވައިދެއްވާނެ ކަމަށް ވެސް ވިދާޅުވިއެވެ.
ރައްޔިތުން އެންމެ ބޭނުންވަނީ ބިން ހިއްކުމުގެ މަޝްރޫއުކަން ފާހަގަކުރައްވައި ރައީސް ވިދާޅުވީ އުކުޅަހުގެ ބިން ހިއްކުމަށްފަހު، ކުރިއަށް އޮތް ހަތަރު ފަސް ދުވަހުގެ ތެރޭގައި ބޮޑުފޮޅުދޫ ބިންހިއްކުމުގެ މަސައްކަތް ވެސް ފެށޭނެ ކަމަށެވެ.
މީގެއިތުރުން ރާއްޖޭގެ ރައްޔިތުން ބޭނުންވާ ހެޔޮ ބަދަލު ގެނެވޭނީ މި ސަރުކާރަށް ކަމަށާއި ކުރިއަށް އޮތް ފަސް އަހަރުގެ ތެރޭގައި އެ ހެޔޮ ބަދަލު ފެންނާނެ ކަމަށް ވެސް ރައީސް ވިދާޅުވިއެވެ.
