އިންތިޚާބު މޮނިޓަރ ކުރުމަށް އޮބްޒާވަރުންނާއި މޮނިޓަރުންގެ ގޮތުގައި ޖުމްލަ 8000ށް ވުރެ ގިނަ އެޕްލިކޭޝަން ހުށަހަޅާފައިވޭ: އީސީ
ރާއްޖޭގެ މީޑިއާތަކުން މޮނިޓަރުންގެ ގޮތުގައި 4545 އެޕްލިކޭޝަން ހުށަހަޅާފައިވޭ
އިންތިޚާބާބެހޭ މަރުކަޒު
ރިޔާސީ އިންތިޚާބު މޮނިޓަރ ކުރުމަށް އޮބްޒާވަރުންނާއި، މޮނިޓަރުންގެ ގޮތުގައި ޖުމްލަ 8000ށް ވުރެ ގިނަ އެޕްލިކޭޝަން ހުށަހަޅާފައިވާ ކަމަށް އިލެކްޝަން ކޮމިޝަން (އީސީ)ން ބުނެފިއެވެ.
އީސީގެ ނާއިބު ރައީސް އިސްމާއީލް ހަބީބު ވިދާޅުވީ، ރިޔާސީ އިންތިޚާބު 2023 މޮނިޓަރ ކުރުމަށް ރާއްޖޭގެ މީޑިއާތަކުން މޮނިޓަރުންގެ ގޮތުގައި 4545 އެޕްލިކޭޝަން ހުށަހަޅާފައިވާ ކަމަށެވެ. އަދި އިންތިހާބުގެ އޮބްޒާވަރުންގެ ގޮތުގައި ސިޔާސީ ޕާޓީތަކުންނާއި، ޖަމްއިއްޔާ ޖަމާއަތްތަކުންނާއި އަމިއްލަގޮތުން ކުރިމަތިލި މީހުންނާއެކު 3607 އެޕްލިކޭޝަން އޮބްޒާވަރުންނާއި، މޮނިޓަރުންގެ ގޮތުގައި ޖުމްލަ 8152 އެޕްލިކޭޝަން ލިބިފައިވާ ކަމަށް ހަބީބު ވިދާޅުވިއެވެ.
އެޕްލިކޭޝަންތަކުގެ މައުލޫމާތު ކަށަވަރުކޮށް އެކްރެޑިޓް ކުރުމުގެ މަސައްކަތް ކުރިއަށްދާކަން ފާހަގަކުރައްވައި ހަބީބު ވިދާޅުވީ ރިޔާސީ އިންތިޚާބުގައި 574 ވޯޓުލާ މަރުކަޒު ގާއިމް ކުރެވޭއިރު، ކޮންމެ ވޯޓުލާ މަރުކަޒެއްގައި ރާއްޖެއިން ގާތްގަނޑަކަށް 14 މީހުން އިންތިޚާބު އޮބްޒާވްކޮށް މޮނިޓަރ ކުރުމަކީ، އިންތިޚާބުގެ ކަންކަން ގާނޫނާއި ގަވާއިދުގެ އިމުގެ ތެރެއިން ކުރިޔަށް ގެންދިޔުމަށް ލިބޭ ވަރަށްބޮޑު ހިތްވަރެއް ކަމަށާއި، ހިތްހަމަ ޖެހުމެއް ކަމަށެވެ.
ހަބީބު ވިދާޅުވީ ރާއްޖޭގެ މޮނިޓަރުންނާއި، އޮބްޒާވަރުންގެ އިތުރުން، އިންޓަރނޭޝަނަލް އޮބްޒާވަރުންނާއި މޮނިޓަރުންގެ އޮބްޒަރވޭޝަންތަކާއެކު، ރިޔާސީ އިންތިހާބު 2023 ވެގެންދާނީ، އެންމެ ރަނގަޅަށް، އެންމެ ގިނަ އަދަދެއްގެ މީހުން އޮބްޒާވްކޮށް މޮނިޓަރ ކުރެވޭނެ އިންތިޚާބަށް ކަމަށެވެ.
ސެޕްޓެންބަރު މަހުގެ 09 ވަނަ ދުވަހު ބާއްވާ ރިޔާސީ އިންތިޚާބުގައި މުޅި ޖުމްލަ 574 ވޯޓު ފޮށި ބަހައްޓާނެ އެވެ. އެއީ މާލެ ސަރަހައްދުގައި 176 ވޯޓު ފޮށި، މާލެ ފިޔަވައި ސިޓީތަކާއި އަތޮޅުތަކުގައި 384 ވޯޓު ފޮށި، ސިނާއީ މަސައްކަތް ކުރާ ތަންތަނާއި ޖަލުތަކުގައި 6 ވޯޓު ފޮށި، ރާއްޖެއިން ބޭރުގައި 8 ވޯޓު ފޮށި ބަހައްޓާނެއެވެ.
މީގެ އިތުރުން ރާއްޖެއިން ބޭރުގެ ފަސްގައުމެއްގައި ވޯޓު ފޮށި ބެހެއްޓުމަށް ވަނީ ނިންމާފައެވެ. އެއީ ސްރީލަންކާ، އިންޑިއާ، މެލޭޝިޔާ، އިނގިރޭސިވިލާތް އަދި އަބޫދާބީ ގައެވެ. އެގޮތުން ސްރީލަންކާގައި ދެ ވޯޓު ފޮށި، މެލޭޝިޔާގައި 3 ވޯޓު ފޮށި އަދި އެހެން ކޮންމެ ގައުމެއްގައި އެއް ވޯޓު ފޮށި ބެހެއްޓުމަށް ވަނީ ނިންމާފައެވެ.
