އިނގިރޭސި ޕްރިމިއާ ލީގުގައި ލިވަޕޫލާ ދެކޮޅަށް އަމިއްލަ ދަނޑުގައި ކުޅުނު މެޗުން މޮޅުވުން ހައްގުކަމަށާއި، ނަމަވެސް މިއީ ފެށުމެއް ކަމަސް ޗެލްސީގެ ކޯޗު މައުރީސިއޯ ޕޮޗެޓީނޯ ބުނެފި އެވެ.

އޭނާ މިހެން ބުނީ ލީގުގައި ލިވަޕޫލާ ދެކޮޅަށް ކުޅެ، 1-1 އިން އެއްވަރުވި މެޗަށްފަހު ވާހަކަ ދައްކަމުންނެވެ. ޕޮޗެޓީނޯ ބުނީ، ގިނަ ދުވަސްތަކެއް ވަންދެން ޕްރިމިއާ ލީގާ ދުރުގައި ހުރުމަށްފަހު، އެނބުރި އާދެވުމުން އުަފާވެރި އިހުސާސެއް ކުރެވުނު ކަމަށެވެ. އަދި އޭނާގެ އެނބުރި އައުން ވެސް ގޯސް ނޫން ކަމަށް ޕޮޗެޓީނޯ ވަނީ ބުނެފަ އެވެ. ޕްރިމިއާ ލީގުގައި ޕޮޗެޓީނޯ އެންމެ ފަހުން އިރުޝާދު ދިނީ ޓޮޓެންހަމަށެވެ. އެ ކުލަބު ދޫކޮށްލުމަށްފަހު އޭނާ ދެން ބަދަލުވީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އަށެވެ. ޕީއެސްޖީގެ ކޯޗުކަމުން އޭނާ ވަކިކުރިތާ އަހަރެއް ފަހުން، ޗެލްސީގެ ކޯޗުކަމާ ހަވާލުވީ މިދިޔަ ޖުލައި މަހު އެވެ.

ޕޮޗެޓީނޯ ބުނީ، ޖުމުލަކޮށް މެޗުގައި ޗެލްސީން ދެއްކީ ރަނގަޅު ކުޅުމެއް ކަމަށާއި، އެ މެޗުން މޮޅުވުން ވެސް އޭނާގެ ޓީމަށް ހައްގު ކަމަށެވެ. ނަމަވެސް އެ މެޗުން މޮޅުނުވެވުމުން ކޮންމެ ވެސް ވަރެއްގެ ނުތަނަވަސްކަމެއް އޮތްކަން ފާހަގަކޮށް އޭނާ ބުނީ، ހިތްހަމަޖެހެނީ ކުޅުންތެރިން ކުރާ މަސައްކަތް ފެނުމުން ކަމަށެވެ. އެ މެޗުން މޮޅު ނުވެނުނު ނަމަވެސް، މިއީ އަލުން ލީގުގައި ރަނގަޅު ވާދައެއް ކުރުމަށް މަސައްކަތް ކުރަމުން އަންނަ ޗެލްސީ އަށް ރަނގަޅު ފެށުމެއްގެ ގޮތުގައި އޭނާ ވަނީ ސިފަ ކޮށްފަ އެވެ.

މީގެ އިތުރުންް ޕޮޗެޓީނޯ ބުނީ ދެން ފޯކަސް ކުރާނީ ރަށުން ބޭރުގައި ކުޅެން އޮތް މެޗަށް ކަމަށާއި، އެ މެޗުން މޮޅެއް ހޯދައިގެން ހަމަޖެހިލަަން ބޭނުންވާ ކަމަށެވެ. އޭނާ ބުނީ ކުރިއަށް އޮތް ތަނުގައި މަސައްކަތް ކުރާނީ ރަނގަޅު ކުރަން ހުރި ކަންކަން ރަނގަޅު ކުރުމަށް ކަމަށެވެ. ހަމައެހެންމެ، ފަސޭހެ މެޗުތަކުގައި މުހިންމު ޕޮއިންޓުތަކެއް ގެއްލުވާލައިގެން ނުވާނެ ކަމަށާއި، އެއީ ކުރިއަށް ދިޔުމުގައި ސަމާލުކަން ދޭން ޖެހޭ އެންމެ ބޮޑު ކަންތައް ކަމަށް އޭނާ ވަނީ ބުނެފަ އެވެ. ޕޮޗެޓީނޯ ބުނީ މިވަގުތު އޮތް ސްކޮޑާ މެދު ވެސް ހިތްހަމަ ޖެހޭ ކަމަށާއި، އެހެން ނަމަވެސް ޗެލްސީގެ ކޯޗަކަށް ހުންނަ މީހަކު އަބަދުވެސް އައު ކުޅުންތެރިން ހޯދަން ވެސް ބޭނުންވާނެ ކަމަށެވެ.

ލީގުގައި ދެން ޗެލްސީ އަށް އޮންނާނީ ވެސްޓް ހޭމް ޔުނައިޓެޑާ ދެކޮޅަށް ކުޅޭ މެޗެވެ.