އަދުގެ ހަލަބޮލި ދުނިޔޭގެ އޮއިވަރުގައި ޖެހި، ބޭއިޚުތިޔާރުގައި ނަމަވެސް މިސްރާބުން ދެވޭ ގޮތް ވަނީ މަދު ފަހަރަކު ނޫނެވެ. ހުޅަނގުގެ ނުފޫޒުގަދަ ބާރުތަކުގެ ރޭވުންތައް މުޅި ދުނިޔެއަށް ފަތުރަމުން ދަނީ ސިއްރާއި ފާޅުގައި ވަކި މަގުސަދުތަކެއް ހާސިލުކުރުމަށް ކަމުގައިވެސް ދެންނެވިދާނެއެވެ. ހީވެސް ނުކުރާ ފަދަ އެތައް ގޮތަކަށް، މައުސޫމު އެތައް މަސްދަރަކުން، އިންތިހާ ނުރައްކާ ފަތުރާކަމާމެދު ސަމާލުވާން ޖެހިފައި ވަނީވެސް އޭގެ އެންމެ އިންތިހާއަށެވެ. ފިޔާތޮށި ކުލައެއްގެ އަވައިގައި އަދުގެ ދުނިޔެ ޖެހިފައި އޮންނަތާ ދުވަސްކޮޅެއް ވެއްޖެއެވެ. މި ކަން ގޮސް ގުޅެނީ، ދާދި ފަހުން ރިލީޒްކޮށްގެން އުޅޭ ބާބީ ފިލްމާއެވެ. ބާބީއަކީ މީގެ އެތައް އަހަރެއް ކުރީއްސުރެ، އެތައް ބައެއްގެ މެދުގައި ލޯބި ހޯދާފައިވާ ބުދެއް ނަމަވެސް، އެންމެ ފަހުން ރިލީޒްކުރި ބާބީ ފިލްމާމެދު މިއަދު ވަނީ އިންތިހާއަށް ސަމާލުވާންޖެހިފައެވެ.
ހުޅަނގުގެ ގައުމުތަކާ ޚިލާފަށް، މެދުއިރުމަތީގެ ސިނަމާތަކުގައި ބާބީ ފިލްމު އަޅުވަން ހަމަޖެއްސީ އޯގަސްޓް 10 ވީ ބުރާސްފަތި ދުވަހަށެވެ. ފިލްމް އަޅުވާ ދުވަސް ޖެހުނުއިރު، ލުބްނާނާއި ކުވައިތުފަދަ ގައުމުތަކުން އެ ގައުމުތަކުގެ ސިނަމާތަކުގައި ބާބީ ފިލްމު އެޅުވުމަކީ މަނާކަމެއް ކަމުގައި ވަނީ ކަނޑައަޅާފައެވެ. ސަބަބަކީ، ސައްތައިން ސައްތަ ދިވެހި މުޖުތަމައުންވެސް ސަމާލުވާންޖެހޭ ވަރުގެ ސަބަބެކެވެ. ސަބަބު ގުޅެނީ ޖިންސުގެ އަސްލާއެވެ.
ކުވައިތުގައި ބާބީ ފިލްމު ދެއްކުން މަނާކޮށް، އެ ގައުމުގެ ކަމާބެހޭ ފަރާތްތަކުން ވަނީ ބަޔާނެއް ނެރެފައެވެ. އެ ބަޔާނުގައި ބުނެފައިވަނީ، ބާބީ ފިލްމަކީ ކުވައިގެ މުޖުތަމައާއި އާންމު އުސޫލުތަކުގެ ރޫހާ ޚިލާފު، ބީރައްޓެހި ޚިޔާލުތަކާއި ފިކުރު ޕްރޮމޯޓްކުރާ ފިލްމެއް ކަމަށެވެ. އިތުރަށް އެކަން ތަފްސީލުކޮށްދީފައެއް ނުވެއެވެ.
ލުބްނާނުގައިވެސް ވަނީ ބާބީ ފިލްމު ދެއްކުން މަނާކޮށްފައެވެ. ލުބްނާނުގެ ކަލްޗަރ މިނިސްޓަރު، މުހައްމަދު މުރުތަލާ ވިދާޅުވީ، ބާބީ ފިލްމަކީ އިސްލާމީ އަގީދާއާއި އަޚުލާގީ މިންގަނޑުތަކާ ފުށުއަރާ ފިލްމެއް ކަމަށާއި، އެ ފިލްމަކީ އެއްޖިންސުން ގުޅުން ހިންގުން ޕްރޮމޯޓްކޮށް، ޖިންސު ބަދަލުކުރުމުގެ ނޭއްގާނީ އާދަވެސް ޕްރޮމޯޓްކުރާ ފިލްމެއް ކަމަށެވެ.
މި ފިލްމު ބަލާފަ، މީހުންގެ ވިސްނުމަށް ބަދަލު އަތުވެދާނެތީ އަހަރެން ބިރުގަނޭ. ނޫނީ އެންމެން އެގޮތަށް ވިސްނަން ފަށާފާނެތީ އަހަރެން ޖެހިލުންވޭ. މިކަމުގެ އަސަރު އެމީހުންނަށް ކުރާނެ. ފިރިހެނުންނާ ފިރިހެން ކުދިންނަށްވެސް ހީވެދާނެ، ނިޔަފަތީގަ ކުލަޖެއްސުމާ، ކަންފަތް ތޮރުފާ، އެއްޗެހި ލެއްވުމާ، މިކަހަލަ އަންހެންވަންތަ ކަންކަމަކީ އާދައިގެ އާންމު ކަމެކޭ. އަންހެނުންނަށް ބެލިއަސް، ބާބީގެ ޝަޚްސަށް ބަލާއިރު، އެއީ ވަރަށް ނުފޫޒު ގަދަ، ކަންކަން ކޮންޓްރޯލްކުރާ މީހެއް. ނޫން! އެއީއެއް ނޫން އެކަން އޮންނަން ޖެހޭނެ ގޮތަކީ.ސަބީން ޖަރަވާން؛ ލުބްނާންގެ ޕިއާނޯ ޓީޗަރެއް
ބާބީ ފިލްމުގައި ޖިންސީ ގޮތުން ނޭދެވޭ ކަންތައްތަކެއް ފަތުރާފައެއް ނެތްކަމުގައި ބުނާ ބަޔަކު އުޅެއެވެ. އެއީ ހުޅަނގުގެ ޣައިރު ދީނުގެ ފިކުރުގެ ލެންސުން ބަލާނަމަ އެކަން އޮތް ގޮތެވެ. ނަމަވެސް ފިލްމުގެ ކާސްޓުންނަށް ބަލާއިރު، އެއްޖިންސުން ގުޅުން ހިންގާ ކޭޓް މެކިނަންއާއި، އުފަންވީއިރު ބަޔާންކުރި ޖިންސު ނޫން އެހެން ޖިންސަކަށް ބަދަލުވެގެން އުޅޭ ނުވަތަ ޓްރާންސްޖެންޑަރ ހާރީ ނެފް އެ ފިލްމުން ފެނިގެންދެއެވެ. އެއްޖިންސުން ގުޅުން ހިންގުމުގެ ތެރޭގައި މަޝްޣޫލުވެގެން އުޅޭ މީހުންގެ ފަރާތުން ބާބީ ފިލްމަށް ބޮޑު ތަރުހީބެއް ދޭކަން ފާހަގަކުރަން ޖެހެއެވެ.
ވޯނަރ ބްރޮސްގެ ބާބީ ފިލްމު ސްކްރީންތަކަށް ދޫކޮށްލިތާ މަހެއް ނުވަނީސް 1 ބިލިއަން ޑޮލަރަށްވުރެ ބޮޑު އާމްދަނީއެއް ވަނީ ހޯދާފައެވެ. ބާބީ ފިލްމަށް ލިބުނު އާމްދަނީއަކީ، ހެރީ ޕޮޓަރފަދަ ފިލްމުތަކަށް ލިބުނު ކާމިޔާބީއަށްވުރެ ބޮޑު ކާމިޔާބީއެއް ކަމަށްވެއެވެ.
