ޑައިވްކުރުމަށް ހުރި ފުން ލޯތްބެއްގެ ސަބަބުން، ދުނިޔޭގެ ހުރިހާ ހިސާބުތަކެއްގައި އޭނާ ޑައިވްކޮށްފިއެވެ. ކަނޑުއަޑީގެ ރީތިކަމާއި "ނުލުގެ" އެތައް ކުލައެއް ދެކެފިއެވެ. ގުދުރަތީ ރީތި އެތައް މަންޒަރެއް ހަމަލޮލަށް ފެނިއްޖެއެވެ. ޗާލު ދިރުންތަކާއި، މުރަކައާއި މަސްމަހާމެހީގެ އާޝޯޚުކުރުވަނިވި ރީތިކަން ފެންނަ އެތައް ޑައިވެއް އޭނާގެ ހަޔާތުގައި ވަނީ ކޮށްފައެވެ. މިހާތަނަށް އައިއިރު 5000ށްވުރެ ގިނަ ޑައިވް ކޮށްފިއެވެ. އެކަމަކު ދެކެދެކެވެސް ރާއްޖެވަރުގެ ތަނެއް އޭނާއަކަށް ނުފެނުނެވެ. މިވަރެއް ހަމަ ނެތެވެ.
މިއީ މީގެ 25 އަަހަރު ކުރިން އޭނާގެ ފުރަތަމަ ދަތުރުކުރި ރާއްޖެއަށް ނައިޓޯ ޓަކާޝީގެ ވާހަކައެވެ. ފާއިތުވި 25 އަހަރު ތެރޭގައި ތަކުރާރުކޮށް އެތައް ފަހަރަކު ރާއްޖެ އައިސްފައިވާ ޓަކާޝީ މިހާރު ރާއްޖެއަށް ކުރަމުންދާ ދަތުރަކީ އޭނާ ރާއްޖެއަށް ކުރި 103 ވަނަ ދަތުރެވެ. މި ރާއްޖޭގެ ނޫ ފަޅުތަކުގެ ހިތްގައިމުކަން ފެނި، ރާއްޖެއަށް އޭނާގެ ހިތުގައި އުފެދުނު ލޯބީގެ ވާހަކަ އޭނާ "ރާއްޖެ އެމްވީ"އަށް ކިޔައިދިނީ ޝައުގުވެރިކަމާ އެކުގައެވެ. ޓަކާޝީ ބުނާގޮތުން، އެތައް ހާސް ތަނަކަށް ގޮސް ތަފާތު އެތައް ޑައިވެއް ކުރެވުނުއިރު ވެސް، އޭނާއަށް ރާއްޖެއިން ކުރެވޭ ތަޖުރިބާ އެހެން ތަނަކުން ނުކުރެވެއެވެ. އޭނާއަށް ރާއްޖޭގެ މާހައުލުން ފެންނަ މިޔަރުފަދަ މަސްމަހާމެހިން ފެށިގެން އެހެނިހެން ދިރުންތަކާ ހަމައަށް ބެލިއަސް، އެއިން ކޮންމެ ކަމަކުން އޭނާއަށް ލިބުނީ ހައިރާންކުރުވާފަދަ ހިތްހަަމަޖެހުމެއް ކަމަށް އޭނާ ވަނީ ބުނެފައެވެ.
ޓަކާޝީ ރާއްޖެއަށް ކުރަންފެށި ސިލްސިލާ ދަތުރުތަކުގެ ބޮޅު ފެށުނީ ރާއްޖެ އައިސް، ބަނޑޮސް އައިލެންޑް ރިސޯޓާއި ވާދޫ ރިސޯޓްގައި އޭނާ ހޭދަކުރި ދުވަސްތަކާ އެކުގައެވެ. އެހެންނަމަވެސް ރާއްޖެއަށް ކުރާ ދަތުރުތައް އިތުރުވެ، ރާއްޖޭގައި ހޭދަކުރާ ދުވަސްތައް އިތުރުވީވަރަކަށް އޭނާއަށް އެނގުނީ ރާއްޖެއާމެދު އޭނާގެ ހިތުގައި އުފެދުނު ޝައުގަކީ އަލަތު ދުވަސްވަރު އެކަނި ވީ "ލޯތްބެއް" ނޫންކަމެވެ. ގިނައިން ފެނި، ރާއްޖެދެކެ ފޫހިވުމުގެ ބަދަލުގައި، ކޮންމެ ދަތުރަކާއެކު ރާއްޖެއަށް އޭނާގެ ހިތް އިތުރަށް ލަންބުވާލިއެވެ.
ކޮންމެ ފަހަރަކުވެސް ރާއްޖޭގެ ރީތިކަން ފެނި އަޖައިބުވޭ. ތަކުރާރުކޮށް ރާއްޖެއަށް އަންނަނީ އެހެންވެ. އަހަރެން ރާއްޖެ އައިސް ހުންނަ ބޯޓު ބަދަލުވެފަ ހުންނާނެ. އެކަމަކު މި ބޯޓުގަ 25 ވަރަަކަށް ފަހަރު އުޅެފިން. ކޮވިޑަށްފަހު ޖަޕާން މީހުންނަށް ދެވޭ ތަންތަން ވަރަށް މަދު. މިއީ ޑައިވިނަށް ލޯބިކުރާ މީހުންނަށް ވަރަށް ރަނގަޅު ފުރުސަތެއް.ޓަކާޝީ
ޓަކާޝީގެ މި ދަތުރުތައް އެންމެ ކައިރިން ދުށް ބައިވެރިއަކީ އޭނާގެ މިފަހަރުގެ ދަތުރުގެ ބައިވެރިޔާއެވެ. ކޮންމެ އަހަރަކު 3 ނޫނީ 5 ފަހަރު ރާއްޖެ އަންނަ ޓަކާޝީގެ މިފަހަރުގެ ދަތުރުގައި އޭނާގެ ދުވަސްތައް ހޭދަކުރަމުންދަނީ ރާއްޖޭގެ ސަފާރީ ބޯޓެއް ކަމަށްވާ "ފަން އަޒުލް ފްލީޓް"ގައެވެ. ފަން އަޒުލް ފްލީޓަކީ ކޮވިޑް-19ގެ ދުވަސްވަރު ދެމިއޮތުމުގެ އާލަމަށް ދަތުރުކުރެއްވި މަޝްހޫރު ޑައިވަރެއް ކަަަމަށްވާ އަބީދު އަބްދުލް ޣަފޫރުގެ ބޯޓެކެވެ. ޓަކާޝީގެ ދަތުރުތައް މިހާ ހިތްގައިމުކޮށްދިނުމުގައި މި ބޯޓުގެ ދައުރު ފުޅާވެފައި ފޮންޏެވެ. ރާއްޖެ އައިސް ޓަކާޝީ ހޭދަކުރި ދުވަސްތަކުގައި ހިތްގައިމު ތަޖުރިބާއެއް ކުރެވުމުގައި މި ބޯޓުގެ ދައުރުގެ މުހިންމުކަން އޭނާ ފާހަގަކުރެއެވެ. އޭނާގެ ދަތުރުތައް މިހާ ކުލަގަދަވުމުގައި ރާއްޖެއިން ބެހެއްޓި ގާތްކަމާއި މެހެމާންދާރީގެ ދައުރުވެސް ނިކަން ފުރިހަމައެވެ.
ޓަކާޝީ ރާއްޖެ އައުމުން އޭނާއަށް ފަތުރުވެރިކަމާބެހޭ ވަޒީރު ޑރ. އަބްދުﷲ މައުސޫމް ވަނީ މަރުހަބާ ވިދާޅުވަން، އޭނާގެ ދަތުރު އޯގަނައިޒްކުރާ ސަފާރީ ބޯޓަށް ވަޑައިގެންފައެވެ. މިނިސްޓަރު ވިދާޅުވީ ރާއްޖޭގެ ފަތުރުވެރިކަމުގެ ކާމިޔާބަކީ ރާއްޖެއަށް ތަކުރާރުކޮށް އަންނަ ފަތުރުވެރިން ކަމަށެވެ. 40 ނުވަތަ 50 ފަހަރު ރާއްޖެ އައިސްފައިވާ މީހުންނާ މީގެ ކުރިންވެސް ދިމާވެފައިވާކަން ފާހަގަކުރައްވައި މައުސޫމް ވިދާޅުވީ، މީގެ ކުރިން 100އަށްވުރެ ގިނަ ފަހަރު ރާއްޖެ އައި މިހަކާ ދިމާވެފައި ނުވާކަަމަށެވެ. އެހެންކަމުން މިފަދަ ކަންކަން ވަރަށް ބޮޑަށް ބަލައިގަންނަ ކަމަށް މިނިސްޓަރު ވިދާޅުވިއެވެ.
އަހަރަކު އެވްރެޖްކޮށް އެބަހުރި 4 ވަރަކަށް ފަހަރު އައިސްފަ. ބޮޑަށް ދަތުރުކޮށްފަ ހުރީ ބ. އަތޮޅާ އަރިއަތޮޅަށް.ޑރ. މައުސޫމް
ޓަކާޝީ ރާއްޖޭގެ ވާހަކަދައްކަނީ އަދިވެސް ފުރަތަމަ ފަހަރަށް ރާއްޖެ ތަޖުރިބާކޮށްލެވުނު މީހެކޭ އެއްފަދައިންނެވެ. އޭނާ ބުނާގޮތުން އަދިވެސް ރާއްޖެއާމެދު އޮތް ޝައުގުވެރިކަން އެންމެ ތަންކޮޅެއްވެސް ކުޑަވެގެނެއް ނުދެއެވެ. އޭނާ ބުނާގޮތުން މި ރާއްޖޭގެ ނޫ ކަނޑުތަކުގެ ރީތިކަމާއި ޖަޒީރާވަންތަކަމަކީ އެފަދަ ދެވަނައެއް ނެތް ހިތްގައިމުކަމެކެވެ. އަދި މި ރާއްޖެއިން އޭނާއަށް ތަޖުރިބާކުރެވުނު ފަތުރުވެރިކަމުގެ އުސްލޫބުވެސް އެހާ ކަމުދެއެވެ. ދެކެދެކެވެސް އޭނާއަށް މިވަރުގެ ތަނެއް ހަމަ ނުފެނުނެވެ.
