ހިލޭ އެއްބަސްވުމެއްގެ ދަށުން އަޑަމާ ޓްރައޯރޭ ފުލަމް އަށް

ހިލޭ އެއްބަސްވުމެއްގެ ދަށުން ސްޕެއިންގެ އަޑަމާ ޓްރައޯރޭ ފުލަމްއަށް ސޮއިކޮށްފިއެވެ.

އުމުރުން 27 އަހަރުގެ ކުޅުންތެރިޔާ ވުލްވްސް އާއެކު ހަދާފައިވާ އެއްބަސްވުން ހަމަވެފައިވަނީ މި ހޫނުމޫސުމުގައެވެ. އޭނާ ފުލަމްއަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. ޓްރައޯރޭ އާއެކު ވުލްވްސްގައި ކުޅެފައިވާ ރައުލް ހިމެނޭޒްވެސް ވަނީ މިދިޔަ ޖުލައި މަހު ފުލަމްއަށް ސޮއިކޮށްފައެވެ. ޓްރައޯރޭ ބުނީ، ހިމެނޭޒް ފަރާތުން ކުލަބާ ގުޅޭ ގިނަ މައުލޫމާތު ލިބުނު ކަމަށެވެ.

ޓްރައޯރޭ ކެރިއަރު ފަށާފައިވަނީ ބާސެލޯނާގައެވެ. 2018 ވަނަ އަހަރު ވުލްވްސްއަށް ބަދަލުވުމުގެ ކުރިން އޭނާ ވަނީ އެސްޓަން ވިލާ އާއި މިޑްލްސްބްރޯއަށް ކުޅެފައެވެ. އެޔަށްފަހު 2021-2022 ވަނަ ސީޒަނުގައި އޭނާ ވަނީ ލޯނު އެއްބަސްވުމެއްގެ ދަށުން އެނބުރި ބާސެލޯނާ އާ ގުޅިފައެވެ. ނަމަވެސް، ބާސާ އިން ދާއިމީކޮށް އޭނާ ގެންނާކަށް ބޭނުމެއް ނުވިއެވެ.

ފުލަމް އިން އައު ސީޒަން ފެށީ މޮޅަކާއެކުއެވެ. އެވަޓަންއާ ބައްދަލުކުރި މެޗު ކާމިޔާބުކުރީ 1-0 ގެ ނަތީޖާއަކުންނެވެ. މި މެޗުގެ ފުރަތަމަ 11 ގައި ރައުލް ހިމެނޭޒްވެސް ހިމަނާފައިވެއެވެ.