ފުލަމް ކައިރިން ލިވަޕޫލް އެއްވަރު

އިނގިރޭސި ޕްރިމިއާ ލީގުގައި ފުލަމްއާ ދެކޮޅަށް ކުޅުނު މެޗުން ލިވަޕޫލް އެއްވަރުވެއްޖެ އެވެ.

ލިވަޕޫލްގެ އަމިއްލަ ދަނޑު، އެންފީލްޑުގައި ހޮނިހިރު ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ފުލަމް އިން ވަނީ ދެ ފަހަރެއްގެ މަތިން ލަނޑު ޖަހައި ކުރި ހޯދައިފަ އެވެ. ނަމަވެސް ދެ ފަހަރު ވެސް ލިވަޕޫލް އިން ވަނީ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ނުވަ ވަނަ މިނެޓުގައި ފުލަމް އަށް ލީޑު ނަގައިދިނީ އެންޑްރިއަސް ޕެރެއިރާ އެވެ. އޭނާ އެ ލަނޑު ޖެހީ އެންޓޮނީ ރޮބިންސަން ތަނަވަސްކޮށްދިން ފުރުސަތެއްގަ އެވެ. އޭގެ ފަހުން މެޗުގައި ލިވަޕޫލް އަށް އެންމެ ބޮޑު ގެއްލުމެއް ދެއްކީ، މެޗުގެ 17 ވަނަ މިނެޓުގައި އެ ޓީމުގެ އެންޑީ ރޮބާޓްސަން އަށް ސީދާާ ރަތް ކާޑު ދައްކައި ދަނޑުން ފޮނުވާލުމުންނެވެ.

އެއް ކުންތެރިޔަކު މަދުކޮށް ކުޅެމުން ދިޔަ ލިވަޕޫލް އިން މެެޗުގެ ނަތީޖާ ހަމަހަމަ ކުރީ ދެ ވަނަ ހާފު ފަށައިގެން ދެ ވަނަ މިނެޓުގަ އެވެ. މިޞްރުގެ ފޯވާޑު މުޙައްމަދު ޞަލާޙު ތަނަވަސްކޮށްދިން ފުރުސަތެއްގައި ލިވަޕޫލަށް ނަތީޖާ ހަމަހަމަ ކޮށްދިނީ ކޯޑީ ގަކްޕޯ އެވެ. އޭގެ ފަހުން މެޗުގެ 76 ވަނަ މިނެޓުގައި ދެ ވަނަ ފަހަރަށް ފުލަމް އަށް ލީޑު ނަގައިދިނީ ރޮޑްރީގޯ މުނީޒް އެވެ. މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، ލިވަޕޫލަށް ނަތީޖާ ހަމަހަމަ ކޮށްދިނީ ޑިއޭގޯ ޖޮޓާ އެވެ.

މީގެ އިތުރުން ލީގުގައި އަމިއްލަ ދަނޑުގައި އެވަޓަންއާ ދެކޮޅަށް ކުޅުނު މެޗު އާސެނަލް އިން ވެސް ނިންމާލަން ޖެހުނީ އެއްވަރުވެގެންނެވެ. އެ މެޗުގައި އެއްވެސް ޓީމަކަށް ލަނޑެއް ނުޖެހެ އެވެ.

ލީގު ތާވަލްގެ އެއް ވަަނައިގައި ލިވަޕޫލް އޮތީ 15 މެޗުން 36 ޕޮއިންޓާ އެކު އެވެ. ދެ ވަނައިގައި ޗެލްސީ އޮތީ 15 މެޗުން 31 ޕޮއިންޓާ އެކު އެވެ. ތިން ވަަނައިގައި އާސެނަލަށް 30 ޕޮއިންޓު ލިބެނީ 16 މެޗުންނެވެ. ހަތަރު ވަަނައިގައި ނޮޓިންހަމް ފޮރެސްޓު އޮތްއިރު، ފަސް ވަނައިގައި އޮތް އެންމެ ފަހުގެ ޗެމްޕިއަން މެންޗެސްޓަރ ސިޓީ އަށް ލިބެނީ 27 ޕޮއިންޓެވެ.