އިނގިރޭސި ޕްރިމިއާ ލީގުގައި ފުލަމާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން މެންޗެސްޓަރ ސިޓީން އަލުން ލީގު ތާވަލްގެ އެއް ވަނަ އަށް ޖެހިލައިފި އެވެ.

ލީގުގައި ފުލަމްގެ އަމިއްލަ ދަނޑުގައި ހޮނިހިރު ދުވަހު ކުޅުނު މެޗު ސިޓީން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ސިޓީން އެއް ލަނޑު ޖެހިއިރު، އަނެއް ތިން ލަނޑު ޖެހީ ފަހު ހާފުގަ އެވެ.

މެޗު ފަށައިގެން 13 ވަނަ މިނެޓުގައި ސިޓީން ވަނީ ލަނޑު ޖަހައި ލީޑު ނަގައިފަ އެވެ. ސިޓީ އަށް ކުޅެމުން އަންނަ ބެލްޖިއަމްގެ މިޑްފީލްޑަރު ކެވިން ޑި ބްރޭނާ ތަނަވަސްކޮށްދިން ފުރުސަތެއްގައި ސިޓީ އަށް ލީޑު ނަގައިދިނީ ޖޮސްކޯ ގްވާޑިއޯލް އެވެ. ދެ ވަނަ ހާފު ފަށައިގެން ކުރީ ކޮޅު ސިޓީގެ ދެ ވަނަ ލަނޑު ޖެހީ ފިލް ފޮޑެން އެވެ. އޭނާ އެ ލަނޑު ޖެހީ، ބެނާޑޯ ސިލްވާ ތަނަވަސްކޮށްދިން ފުރުސަތެއްގަ އެވެ.

މެޗުގައި ސިޓީގެ ތިން ވަނަ ލަނޑު، 71 ވަނަ މިނެޓުގައި ޖެހީ ގްވާޑިއޯލް އެވެ. އެ ލަނޑު ޖަހަން ގްވާޑިއޯލް އަށް ވެސް ފުރުސަތު ތަނަވަސްކޮށްދިނީ ސިލްވާ އެވެ. މެޗުގައި ސިޓީގެ ފަހު ލަނޑު ހޫލިއަން އަލްވަރޭޒް ޖެހީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލިބުނު ޕެނަލްޓީ ކާމިޔާބު ކޮށްގެންނެވެ.

މޮޅާއެކު ސިޓީ އެއް ވަނައިގައި އޮތީ ދެ ޕޮއިންޓުގެ ލީޑަކުންނެވެ. އެއީ މިހާތަނަށް ލީގުގައި ކުޅުނު 36 މެޗުން 85 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އާސެނަލަށް ލިބެނީ 83 ޕޮއިންޓެވެ. ލީގުގައި އާދިއްތަ ދުވަހުގެ ރޭ މެންޗެސްޓަރ ޔުނައިޓެޑާ ދެކޮޅަށް ކުޅޭ މެޗުން މޮޅުވެ، އާސެނަލަށް އަނެއްކާ ވެސް އެއް ވަނަ އަށް ޖެހިލެވޭނެ އެވެ. ނަމަވެސް އެއީ ސިޓީ އަށް ވުރެ އިތުރަށް އެއް މެޗު ކުޅެގެންނެވެ. ތިން ވަނައިގައި 78 ޕޮއިންޓާއެކު ލިވަޕޫލް އޮތްއިރު، އެ ޓީމަށް ލީގު ކާމިޔާބު ކުރުމުގެ ފުރުސަތު ވަނީ ގެއްލިފަ އެވެ.