ލީގު ކަޕް ސެމީފައިނަލް ފުރަތަމަ ލެގުން ލިވަޕޫލް ކުރި ހޯދައިފި
ފުރަތަމަ ލެގު ލިވަޕޫލް ކާމިޔާބުކުރީ 2-1 ން
ލިވަޕޫލްގެ ދެވަނަ ލަނޑުޖެހުމަށްފަހު ގަކްޕޯ އެހެން ކުޅުންތެރިންނާއެކު އުފާފާޅުކުރަނީ
އިނގިރޭސި ފުޓްބޯޅަ ލީގު ކަޕްގެ ސެމީފައިނަލް ފުރަތަމަ ލެގުން ލިވަޕޫލް ކުރި ހޯދައިފި އެވެ.
ފުލަމްއާ ދެކޮޅަށް, ލިވަޕޫލްގެ އެންފީލްޑްގައި ކުޅުނު ފުރަތަމަ ލެގުން ކުރިހޯދީ 2-1 ނެވެ. މެޗު ލިވަޕޫލުން ކާމިޔާބުކުރީ ފުރަތަމަ ހާފްގައި ފުލަމްއިން ކުރި ހޯދާފައި ވަނިކޮށް, ދެވަނަ ހާފްގައި ދެ ލަނޑު ޖަހައިގެންނެވެ. ފުރަތަމަ ހާފްގައި ފުލަމް އަށް ކުރިހޯދައިދިނީ ވިލިއަން އެވެ. ދެވަނަ ހާފްގައި ލިވަޕޫލަށް ނަތީޖާ ހަމަހަމަ ކޮށްދިނީ ކާޓިސް ޖޯންސް އެވެ. އޭގެ ދެ މިނިޓްފަހުން ލިވަޕޫލަށް ކުރިހޯދައިދިނީ ބަދަލު ކުޅުންތެރިޔާ ގަކްޕޯ އެވެ. މިއީ މަހެއްހާ ދުވަހުގެ ތެރޭގައި ފުލަމް ކުރި ހޯދާފައި ވަނިކޮށް, ލިވަޕޫލުން މޮޅުވި ދެވަނަ މެޗެވެ. ޕްރިމިއަރ ލީގުގައި ޑިސެމްބަރު މަހު ތިންވަނަ ދުވަހު ލިވަޕޫލް މޮޅުވީ ވެސް ފުލަމް މެޗުގެ ފަހު ދިހަ މިނިޓާ ހަމައަށްވެސް ކުރީގައި ވަނިކޮށެވެ.
ސެމީފައިނަލް ދެވަނަ ލެގުގައި މިދެޓީން ފުމަލްގެ ދަނޑުގައި ވާދަކުރަނީ މިމަހުގެ 24 ވަނަ ދުވަހު އެވެ. ސެމީފައިނަލް ދެވަނަ މެޗުގައި ވާދަކުރަނީ ޗެލްސީ އާއި މިޑްލްސްބަރާ އެވެ. އެދެޓީމް ވާދަކުރި ފުރަތަމަ ލެގު 1-0 ން ކާމިޔާބުކުރީ މިޑްލްސްބަރާ އެވެ.
