ޕީޕީއެމްގެ ލީޑަރޝިޕުން އެ ޕާޓީއަށް ޚިޔާނާތްތެރިވެފައިވާ ކަމަށް ވިދާޅުވެ ކުރީގެ ރައީސް ޑރ. މުޙައްމަދު ވަހީދު ހަސަން މަނިކު އެޕާޓީން ވަކިވެވަޑައިގެންފިއެވެ.
ޑރ. ވަހީދު ޕީޕީއެމުން ވަކިވެވަޑައިގެންނެވިކަން އިއުލާން ކުރެއްވީ ބުރާސްފަތި ދުވަހުގެ ރޭގެ ވަގުތެއްގައެވެ. އެގޮތުން، އެމަނިކުފާނު ނެރުއްވި ބަޔާނެއްގައި ވިދާޅުވީ އެމަނިކުފާނުގެ ހުނަރާއި ތަޖުރިބާ އަދި އިލްމު، ތެދުވެރިކަމާއި ނަޒާހަތްތެރިކަން އޮތް ތަނެއްގައި ބޭނުންކުރަން މުހިންމު ކަމުގައި ދެކެވަޑައިގަންނަވާ ކަމަށެވެ. އެހެންވެ، ޕީޕީއެމްގެ ސްޕެޝަލް އެޑްވައިޒަރު ކަމުންނާއި މެމްބަރު ކަމުން ވަކިވެވަޑައިގެންފައިވާ ކަމަށް ވިދާޅުވެފައި ވެއެވެ.
ވަހީދު ނެރުއްވި ބަޔާނުގައި ޕާޓީން ވަކިވެވަޑައިގެންނެވި ސަބަބު ތަފްސީލުކޮށް ހާމަ ނުކުރެއްވި ނަމަވެސް ޕާޓީން ވަކިވެވަޑައިގަތުމަށް ފޮނުއްވި ސިޓީ މިހާރު ވަނީ ސޯޝަލް މީޑިއާގައި އާއްމުވެފައެވެ. އެ ސިޓީގައި ވަހީދު ވިދާޅުވެފައިވަނީ ކުރީގެ ރައީސް އަބްދުﷲ ޔާމީނަށް މިއަހަރުގެ ރިޔާސީ އިންތިޚާބުގައި ވާދަކުރެއްވުމަށް ޝަުތުހަމަނުވާ ކަން އީސީންނާއި ސުޕްރީމް ކޯޓުން ވެސް ނިންމާފައިވާއިރު 5 އޮގަސްޓާއި 7 އޮގަސްޓުގެ މެންދުރު 2:00 ޖެހުމާ ހަމައަށް އިތުރު ކެންޑިޑޭޓެއް ނެރޭނެ ވަގުތު ޕީޕީއެމަށް އޮތް ކަމަށެވެ. ނަމަވެސް އެކަމަށް ޕީޕީއެމްގެ ލީޑަރޝިޕުން އެއްވެސް މަސައްކަތެއް ނުކުރާ ކަމަށާއި ޕާޓީގެ ސެނެޓަށް ވެސް ކެންޑިޑޭޓެއް ނެރުމުގެ ފުރުސަތު ނުދީ ކުޑަ ޕާޓީއަކުން ކެންޑިޑޭޓެއް ނެރުމަކީ އެ ލީޑަރޝިޕުން ޕާޓީއަށް ވި ވަރަށް ބޮޑު ޚިޔާނާތެއް ކަމަށެވެ.
މީގެ އިތުރުން އެއީ އަނިޔާވެރި އަމަލެއް ކަމަށާއި އެ އަމަލު ކުށްވެރި ކުރައްވާ ކަމަށް ވެސް ސޯޝަލް މީޑިއާގައި ދައުރުވަމުން އަންނަ ސިޓީގައި ވަހީދު ވިދާޅުވެފައި ވެއެވެ.
ވަހީދު މިފަދައިން ވިދާޅުވެފައިވާއިރު ޕީޕީއެމް ޕީއެންސީ ކޯލިޝަނުން ވަނީ ޔާމީނަށް އިންތިޚާބުގައި ވާދަ ނުކުރެއްވޭތީ ޕީއެންސީގެ ކެންޑިޑޭޓެއްގެ ގޮތުގައި މާލޭގެ މޭޔަރު ޑރ. މުޙައްމަދު މުއިއްޒު ނެރެފައެވެ. މުއިއްޒުއަށް ޓިކެޓް ދީފައިވަނީ ރިޔާސީ އިންތިޚާބުގައި ވާދަކުރެއްވުމަށް ވަހީދު ޝައުގުވެރިކަން ފާޅުކުރައްވާފައި ވަނިކޮށެވެ. އިންތިޚާބުގައި ވާދަކުރުމަށް ޔާމީނުގެ ޝަރުތު ހަމަނުވާކަމަށް ސުޕްރީމް ކޯޓުން ތާއީދު ކުރުމުން ވަހީދު ކުށުގެ ރެކޯޑު ސާފު ކުރެއްވުމަށް ވެސް ހުށަހެޅުއްވިއެވެ.
ވަހީދު ޕީޕީއެމުން ވަކިވެވަޑައިގެންފައިވާއިރު އެމަނިކުފާނުގެ ދަރިކަލުން ޖެފްރީ ސާލިމް ވަހީދު ވެސް ވަނީ ޕާޓީން ވަޑިވެފައިވާކަން އިއުލާން ކުރައްވާފައެވެ.
