ވިލިނގިލި ރައްޔިތުންގެ ފިކުރަކީ ތަރައްގީގެ ފިކުރު - ސައުދު
11 އޯގަސްޓު 2023 | ހުކުރު 00:36ވިލިނގިލި ރައްޔިތުންނަކީ ލިބެމުންދާ ތަރައްގީއަކާއެކީގައި އެ ސަރުކާރަކާއެކީގައި ދެމިތިބޭނެ ރައްޔިތުންތަކެއް
ވިލިނގިލި ދާއިރާގެ މެންބަރު ސައުދު ހުސައިން
ގއ. ވިލިނގިލި ރައްޔިތުންގެ ފިކުރަކީ ތަރައްގީގެ ފިކުރުކަމަށް ރައްޔިތުންގެ މަޖިލީހުގެ ވިލިނގިލި ދާއިރާގެ މެންބަރު ސައުދު ހުސައިން ވިދާޅުވެއްޖެއެވެ.
ގއ. ވިލިނގިލިގައި ބޭއްވި "އުފާވެރި އަމާންރާއްޖެ" ކެމްޕޭން ޖަލްސާގައި ވާހަކަދައްކަވަމުން މެންބަރު ސައުދު ވިދާޅުވީ ޝައްކެއް ނެތް ގޮތުގައި ވިލިނގިލި ރައްޔިތުންގެ ފިކުރަކީ ތަރައްގީގެ ފިކުރުކަމަށާއި، ތަރައްގީގެ ސަފްހާތަކުން ވިލިނގިއްުޔަކީ ރަންޒަމާންތަކުން ތަރައްގީ ހާސިލްކުރަމުން އަންނަ ރަށެއްކަމަށެވެ. ވިލިނގިލީގެ ބަނދަރުމަތިންނާއި މަލަމަތިން އެކަންކަން ފެންނަން ހުންނާނެކަމަށެވެ. މެންބަރު ވިދާޅުވީ އިންފްރާސްޓްރަކްޗަރގެ ޑިވަލޮޕްމަންޓުގައި ވިލިނގިއްޔަކީ ނަމޫނާ ރަށެއް ކަމަށާއި، ރައްޔިތުންނަކީ ތަރައްގީ ލިބޭ ކޮންމެ ދިމާލަކަށް އަތްފުނާއަޅައިގެން އެ ތަރައްގީއަކާއި ދިމާލަށް ދަތުރުކުރާނެ ރައްޔިތުން ދިރިއުޅޭ ރަށެއްކަމަށެވެ.
ސައުދު ވިދާޅުވީ ވިލިނގިލި ރައްޔިތުންނަކީ ލިބެމުންދާ ތަރައްގީއަކާއެކީގައި އެ ސަރުކާރަކާއެކީގައި ދެމިތިބޭނެ ރައްޔިތުންތަކެއް ކަމަށެވެ.
ސައުދު ވިދާޅުވީ ކައުންސިލުން ބަނދަރުގެ މަސައްކަތް ހުއްޓުވަން އުޅުނަސް، ބަނދަރުގެ މަސައްކަތް ނިންމާލާފައި ނޫނީ އެމްޓީސީސީގެ އެކްސްކަވޭޓަރުގެ އިންޖީނު ނުހުއްޓުވޭނެކަމަށެވެ. ސައުދު ވިދާޅުވީ ރައްޔިތުން އެދިފައިވާ ގޮތަށް ރައްޔިތުން ބޭނުންވާ ބަދަލާއެކު ސްޕީޑުގެ ބަނދަރުގެ މަސައްކަތް ކުރިއަށްދާނެ ކަމަށެވެ.
ސައުދު ވިދާޅުވީ އެންމެ ހަރުއަޑުކޮށް މަސްވެރިންގެ ވާހަކަ ދައްކަނީ ހުވަދޫ މަސްވެރިން ކަމަށާއި، ޝަކުވާ އަކީ ބާނާ މަސް ނުކުރިގެން ކުރާ ޝަކުވާ ކަމަށެވެ. ސައުދު ވިދާޅުވީ މި ހިނގަމުންދާ ދައުރާ ހަމައަށް އައި އިރު، ކޫއްޑޫގެ ކެޕޭސިޓީ އިތުރު ނުވެ 27 އަހަރު ވެގެން ދިޔައިރު މިއަދާ ހަމައަށް އެކަން ނުވެ އޮތުމަކީ މި ސަރުކާރުން ޒިންމާ ނަގަންޖެހޭ ކަމެއް ނޫން ކަމަށެވެ.
ސައުދު ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަން ނިމުނު އިރު ރާއްޖޭގެ މަސްވެރިކަމުގެ ސިނާއަތް އޮތީ އަނދަވަޅެއްގެ ތެރޭގައި ކަމަށާއި، އެ އަނދަވަޅުގެ ވާހަކަ މިއަދު ހަނދާންކުރަންޖެހޭ ކަމަށެވެ.
ސިޔާާސަތުތަކާއި ނިޒާމުގައި މައްސަލަތަކެއް އެބައުޅޭކަމަށް މެންބަރު ސައުދު ވިދާޅުވިއެވެ. ސައުދު ވިދާޅުވީ މަސްވެރިން ހަޅޭލެވުމުގެ ބަދަލުގައި މިއަދު ދެއްވަންވީ އެއްބާރުލުން ކަމަށެވެ. 27 އަހަރު ތެރޭގައި ނުލިބުނު ތަރައްގީ މި 5 އަހަރު ތެރޭގައި 6 ގުނަ ބޮޑުކޮށް ތަރައްގީކުރަމުންދާ ކަމަަށާއި، ބޭނުންވަނީ މަސްވެރިންގެ އެއްބާރުލުން ކަމަށެވެ. ސައުދު ވިދާޅުވީ ކޫއްޑޫގެ ބަނދަރު ބޮޑުކުރަމުންދާ ކަމަށާއި، ބްރައިންފްރީޒިންގ ކެޕޭސިޓީ 120 ޓަނަށް ބޮޑުކުރަމުންދާ ކަމަށާއި، ކޫއްޑޫގެ އައު އިންޖީނުގެ އަޅަމުންދާ ކަމަށާއި، ކޫއްޑޫގެ ކޯލްޑް ސްޓޯރޭޖް ފެސިލިޓީ ދެހާހުން، ހަތަރު ހާހުން ހަ ހާހަށް ބަދަލުކުރަމުންދާ ކަމަށެވެ.
ސައުދު ވިދާޅުވީ މި ވާހަކަ އަދަދުތަކުން ދައްކާލި ނަމަވެސް އެއީ ކޫއްޑޫ ކަހަލަ 3 ކޫއްޑޫ ހެދުމުގެ ކެޕޭސިޓީކަމަށެވެ. ސައުދު ވިދާޅުވީ މަސްވެެރިން ހަމައަގުގެ ވާހަކަ ދައްކަން ތިބުމުގެ ބަދަލުގައި މަސައްކަތުގެ ނަތީޖާ ނެރެދެން ސަރުކާރާއެކީގައި ތިބުންތޯ ރަނގަޅީ ސުވާލު އުފައްދަވާފައެވެ. ސައުދު ވިދާޅުވީ މަސްވެރިކަމުގެ ސިނާއަތަށް އިންގިލާބެއް ގެންނާނީ މިސަރުކާރުން ކަމަށާއި، މަސްވެރިން ހީނުކުރާ ވަރުގެ ބޮޑު އިންގިލާބެއް އަންނަ އަހަރު ނިމިގެންދާއިރު ފެނިގެންދާނެކަމަށެވެ.
