"ކުދިން ތަރުބިއްޔަތުކުރުމަށް ފަހި މަގެއް" މިނަމުގައި ލިޔުއްވާފައިވާ ފޮތް ރައީސްގެ އަނބިކަނބަލުން ނެރެދެއްވައިފި
ކުދިން ތަރުބިއްޔަތުކުރުމުގައި އަމަލު ކުރެވިދާނެ މުހިއްމު ގޮތްތަކާބެހޭ މައުލޫމާތު މިފޮތުގައި ހިމަނާފައިވޭ
ރައީސްގެ އަނބިކަނބަލުން ފޮތް ނެރެދެއްވަނީ
"ކުދިން ތަރުބިއްޔަތު ކުރުމަށް ފަހިމަގެއް" މިނަމުގައި އަހުމަދު ފަޔާޒް ހަސަން ލިޔުއްވާފައިވާ ފޮތް، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު ނެރެދެއްވައިފިއެވެ.
މި ރަސްމިއްޔާތު އޮތީ ބުރާސްފަތި ދުވަހުގެ ހެނދުނު، ގައުމީ ކުތުބުޚާނާގައެވެ.
މިރަސްމިއްޔާތުގައި ރައީސްގެ އަނބިކަނބަލުން ދެއްކެވި ވާހަކަފުޅުގައި، މިފޮތުގައި ހިމަނާފައިވާ މައުލޫމާތު އަމަލީގޮތުން ބޭނުންކުރެވިދާނެ ގޮތްތަކުގެ މައްޗަށް އަލިއަޅުއްވާލެއްވިއެވެ. އެކަމަނާ ވިދާޅުވީ، ނެރެވުނު މި ފޮތަކީ ވަރަށް މުހިއްމު، އަދި ބޭނުންތެރި ފޮތެއް ކަމަށެވެ. އަދި ދަރިން ތަރުބިއްޔަތުކުރުމުގައި ކޮންމެ ދުވަހަކީވެސް ކަންކަން ދަސްކުރަންޖެހޭ ދުވަހެއްކަން އެކަމަނާ ފާހަގަކުރެއްވިއެވެ.
ރައީސްގެ އަނބިކަނބަލުން ވިދާޅުވީ، ދަރިން ތަރުބިއްޔަތުކުރުމުގައި އެންމެ މުހިންމު ކަމަކީ ކުދިންނަށް ނަމޫނާ ދެއްކުން ކަމަށާއި، އެކަން ގިނަ ބަޔަކު ގަބޫލުވެސް ކުރާކަމަށެވެ. އަދި ކުދިންނަށް މައިންބަފައިން ދައްކާ ނަމޫނާގައި ކުދިން ނުހިފާނަމަވެސް އެކަމަކީ ކުދިންގެ ކިބައިން އުއްމީދު ކަނޑައިލާންވީ ކަމެއް ނޫންކަމަށާއި، ކުދިންނަށް ނަމޫނާ ދެއްކުމުގައި ބެލެނިވެރިން ދެމިތިބުމަކީ ވަރަށް މުހިންމު ކަމެއްކަން އެކަމަނާ ފާހަގަކުރެއްވިއެވެ.
މީގެ އިތުރުން އެކަމަނާގެ ވާހަކަފުޅުގައި ވަނީ، ޓީޗަރެއްގެ ހައިސިއްޔަތުންނާއި މަންމައެއްގެ ހައިސިއްޔަތުން އެކަމަނާގެ ތަޖުރިބާތައްވެސް މި ރަސްމިއްޔާތުގައި ބައިވެރިވި ފަރާތްތަކާ ހިއްސާކުރައްވާފައެވެ.
"ކުދިން ތަރުބިއްޔަތުކުރުމަށް ފަހިމަގެއް" މިފޮތުގައި، ކުދިން ތަރުބިއްޔަތުކުރުމުގައި އަމަލު ކުރެވިދާނެ މުހިއްމު ގޮތްތަކާއި މައުލޫމާތު ހިމަނާފައިވެއެވެ.
