އަލް ނަސްރު ގޮވައިގެން ރޮނާލްޑޯ ފައިނަލަށް

އަރަބް ކުލަބް ޗެމްޕިއަންސް ކަޕްގެ ފައިނަލުން އަލް ނަސްރު ޖާގަ ހޯދައިފި އެވެ.

އަލް ނަސްރު ފައިނަލުން ޖާގަ ހޯދީ މުބާރާތުގެ ސެމީ ފައިނަލްގައި އަލް ޝޯޓާގެ މައްޗަށް 1-0 އިން ކުރި ހޯދައިގެންނެވެ. ބުދަ ދުވަހުގެ ރޭ ކުޅުނު ސެމީ މެޗުން އަލް ނަސްރުން މޮޅު ކޮށްދިން ލަނޑު ޖެހީ ކެޕްޓަން ކްރިސްޓިއާނޯ ރޮނާލްޑޯ އެވެ. އެއީ މެޗުގެ ދެ ވަނަ ހާފުގައި ލިބުނު ޕެނަލްޓީއެއް ކާމިޔާބުކޮށްގެން ރޮނާލްޑޯ ޖަހައިދިން ލަނޑެކެވެ. އެއީ އަލް ޝޯޓާގެ އޭރިޔާ ތެރެއިން 72 ވަނަ މިނެޓުގައި ސެނެގާލްގެ ސަޑިއޯ މާނޭ އަށް ކުރި ފައުލަކަށް ދިން ޕެނަލްޓީ އެކެވެ. ޕެނަލްޓީގައި ގޯލުގެ އަރި މައްޗަކަށް ވާ ގޮތަށް ރޮނާލްޑޯ ފޮނުވާލި ބޯޅަ ހުއްޓުވުމަށް އަލް ޝޯޓާގެ ކީޕަރަށް އެއްވެސް މަސައްކަތެއް ނުކުރެވުނެވެ. އެ މެޗުގެ މޮޅު ކުޅުންތެރިޔަކަށް ހޮވުނީ ވެސް ރޮނާލްޑޯ އެވެ.

މިއީ މިދިޔަ އަހަރުގެ ޑިސެމްބަރު މަހު އަލް ނަސްރަށް ބަދަލުވި ޕޯޗުގަލްގެ ކެޕްޓަން ރޮނާލްޑޯ އެ ކުލަބަށް ޖަހައިދިން 18 ވަނަ ލަނޑެވެ. އަރަބް ކުލަބު ޗެމްޕިއަންޝިޕްގެ ފައިނަލްގައި އޯގަސްޓު މަހުގެ 12 ވަނަ ދުވަހު އަލް ނަސްރު ނިކުންނާނީ ވާދަވެރި އަލް ހިލާލާ ދެކޮޅަށެވެ. ފައިނަލުން އަލް ހިލާލް ޖާގަ ހޯދީ ސެމީ ފައިނަލްގައި އަލް ޝަބާބްގެ މައްޗަށް 3-1 އިން ކުރި ހޯދައިގެންނެވެ.