ކުރިއަށް އޮތް 5 އަހަރު، ކަނޑުހުޅުދޫ ބޯހިޔާވަހިކަމުގެ މައްސަލަ ހައްލު ކޮށްދޭނަން : ރައީސް ސާލިހު
ތަރައްގީގެ ގިނަ މަޝްރޫއުތައް މުޅި ރާއްޖޭގައި ކުރިއަށްގެންދޭ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވާހަކަފުޅު ދައްކަވަނީ
ކުރިއަށް އޮތް 5 އަހަރު، ގއ. ކަނޑުހުޅުދޫއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލު ކޮށްދެއްވުމާއެކު، ގިނަ ތަރައްގީގެ މަޝްރޫއުތައް ކުރިއަށް ގެންދަވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ބުދަ ދުވަހު ދުވަހު ކަނޑުހުޅުދޫގައި ބޭއްވި "އުފާވެރި އަމާން ރާއްޖެ" ކެމްޕޭނުގެ ބަނދަރު ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ، ގިނަ ސިޔާސަތުތައް ތަންފީޒު ކުރައްވަމުން ގެންދަވާއިރު، ތަރައްގީގެ ގިނަ މަޝްރޫއުތައް މުޅި ރާއްޖޭގައި ކުރިއަށް ގެންދަވާކަމަަށެވެ.
ރައީސް ވިދާޅުވީ، ކަނޑުހުޅުދޫގައި ވެސް ރައްޔިތުން އެދޭ ތަރައްގީ ގެނެސްދެއްވާނެ ކަމަށެވެ. އެގޮތުން ކައުންސިލް އިދާރާގެ އައު އިމާރާތް އެޅުމާއި، ޒުވާނުންނަށްޓަކައި ވަސީލަތްތަކާއެކު ޔޫތު ސެންޓަރެއްގެ އިތުރުން ޒަމާނީ ފުޓްބޯޅަ ދަނޑެއް އަޅުއްވައިދެއްވާނެ ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ އެރަށުގެ ރައްޔިތުންނަށް ބޯހިޔާވަހިކަމުގެ މައްސަލައަށް ހައްލެއް ހޯއްދަވައިދެއްވުމުގެ ގޮތުން ހައުސިން ޔުނިޓް އަޅުއްވައިދެއްވާނެ ކަމަށާއި، ސްކޫލަށް ބޭނުންވެފައިވާ ކްލާސްރޫމުގެ ދަތިތައް ހައްލުކުރެއްވުމަށް 8 ކްލާސްރޫމް އަޅުއްވައިދެއްވާނެ ކަމަށެވެ.
ރައްޔިތުން އެދޭ ތަރައްގީ ގެނައުމަށް ސެޕްޓެންބަރު މަހުގެ 09 ވަނަ ދުވަހު ލާ ވޯޓުގައި އެމަނިކުފާނަށް ވޯޓު ދިނުމަށް ވަނީ އެދިވަޑައިގެންފައެވެ. މިފުރުސަތު ދޫކޮށްލައިފިނަމަ އެ ތަރައްގީ ރާއްޖެއަށް ނުލިބޭނެ ކަމަށާއި، ރައްޔިތުން ބޭނުންވާ އަސާސީ ޚިދުމަތްތައް ފޯރުކޮށްނުދެވި އަނެއްކާވެސް އެނބުރި ހަމަނުޖެހުމާއި ހަލަބޮލިކަމަށް ރާއްޖެ ހިނގައިދާނެކަމަށް ރައީސް ސާލިހު ވިދާޅުވިއެވެ.
