ގއ ކަނޑުހުޅުދޫގައި ދެމީހެއްގެ މެދުގައި ހިނގި މާރާމާރީއެއްގައި، ދެމީހުންނަށްވެސް އަނިޔާވެ، ފަރުވާ ދެމުން އަންނަ ކަމަށް ފުލުހުން ބުނެފިއެވެ.

މި މައްސަލައާ ގުޅޭ ގޮތުން ފުލުހުން ބުނެފައިވަނީ، ގއ. ކަނޑުހުޅުދޫގައި ދެ މީހެއްގެ މެދުގައި މާރާމާރީއެއް ހިނގި މައްސަލަ ހޮނިހިރު ދުވަހުގެ ރޭ 21:37 ހާއިރު ރިޕޯޓްކޮށްފައިވާ ކަމަށާއި، މައްސަލައިގައި ދެމީހުންނަށްވެސް އަނިޔާވެފައިވާ ކަމަށެވެ. އަނިޔާވެފައިވަނީ 37 އަހަރުގެ ދިވެހި ފިރިހެނަކަށާއި 40 އަހަރުގެ ދިވެހި ފިރިހެނަކަށް ކަމަށް ފުލުހުން ބުނެފައިވެއެވެ.

މައްސަލައިގައި އަނިޔާވި ދެމީހުންނަށް ވެސް ގއ އަތޮޅު ހޮސްޕިޓަލުން މިހާރު ފަރުވާ ދެމުން އަންނަ އިރު، މީގެ ތެރެއިން އެކަކު އިތުރު ފަރުވާއަށް މާލެ ގެނައުމުގެ މަސައްކަތް މިއަދު ވަނީ ފަށައިފައެވެ.

މި މައްސަލައާ ގުޅޭ އިތުރު ތަފުސީލެއް ފުލުހުން ދީފައެއް ނުވެއެވެ. ނަމަވެސް މައުލޫމާތު ލިބޭ ގޮތުގައި، މާރާމާރީގައި ބައިވެރިވި އެކަކުގެ ކޮނޑު ކަށިގަނޑާއި ހަމައިން ދެ އިންޗިއެއްހާ ތަން ކަފައިގެން ގޮސްފައި ވާއިރު، އޭނާގެ ގައިގެ އެކި ތަންތަނަށް ބޮޑެތި ޒަޚަމްތައް ވަނީ ލިބިފައެވެ. އަދި ދެވަނަ މީހާގެ ބޮލުގެ ބައެއް ވަރަށް ބޮޑަށް ކަފައިގެން ގޮސް، އޭނާގެ ބޮލުގެ ނާށިގަނޑު ވެސް ހުރީ ބޭރަށް ފެންނަން ކަމަށް މައުލޫމާތު ލިބެއެވެ.

މިމައްސަލަ މިހާރު ފުލުހުން ގެންދަނީ ތަހުގީގު ކުރަމުންނެވެ.