72 ކިލޯ ޑްރަގް މައްސަލަ: ހެކިބަސް ނަގަން ފަށައިފި

72 ކިލޯ މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރަން އުޅުނު މައްސަލައިގައި އެންމެ އިސްކޮށް ހުރި ކަމަށް ތުހުމަތު ކުރާ އިރުފާން ތަގިއްޔުއާއި އިތުރު ފަރާތްތަކެއްގެ މައްޗަށް އުފުލާފައިވާ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ދައުލަތުން ބުނެފައިވަނީ ދައުވާލިބޭ ފަރާތްތަކުން 2020 ވަނަ އަހަރުގެ ޑިސެމްބަރު މަހުގެ 8 ވަނަ ދުވަހު "މަސްޖަރީ 2" ނަމަކަށްކިޔާ ދޯންޏެއްގައި, 72 ކިލޯ ހުރި މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރަން އުޅުނުކަމަށެވެ.

Advertisement

މި މައްސަލައިގައި މިހާރު ދައުލަތާއި ދިފާއުންވެސް ވަނީ އިފްތިތާޙީ ބަޔާން އިއްވާފައެވެ.

ވުމާއެކު، ބުދަ ދުވަހުގެ އަޑުއެހުމުގައި ކުރިއަށް ދިޔައީ ހެކިބަސް ނަގަން ފެށުމެވެ. މި އަޑުއެހުމުގައި 3 ފުލުހެއްގެ ހެކިބަސް ނެގުމަށް ތާވަލު ކުރެވިފައި އޮތެވެ. އޭގެ ތެރޭގައި މަސްތުވާތަކެތި ގެނައި ދޯނީގެ ފަހަތުން ލޯންޗުގައި ފާރަލަމުން ދުއްވި އޮފިސަރުން ހިމެނެއެވެ.

އެއީ މި މައްސަލައިގެ ސީން އޮފް ކްރައިމް އޮފިސަރުންތަކެކެވެ.

މި އަޑުއެހުމުގައި ހެކިބަސް ދެއްވި ހެކިވެރިއަކު ވިދާޅުވީ، މަސްޖަރީ-2 ދޯނި ރާއްޖޭގެ ކަނޑުގެ ސަރަޙައްދުން ބޭރަށް ދިޔަ ކަމަށާއި، އޭގެ ފަހުން އެ ދޯނި ރާއްޖެއަށް އައިކަމަށް އިންޓެލިޖެންސް މައުލޫމާތު ލިބުމާއި ގުޅިގެން އަނެއްކާވެސް ޙަރަކާތްތެރިވެފައިވާކަމަށެވެ. އޭރު އިންޓެލިޖެންސް މައުލޫމާތު ލިބިފައިވަނީ ހުޅުމާލެއާ ދިމާލަށް އެ ދޯނި ދުއްވަމުންދާ ކަމަށެވެ.

ހެކިވެރިންނަށް ވަނީ 2020 ވަނަ އަހަރުގެ ޑިސެމްބަރު މަހުގެ 8 ވަނަ ދުވަހު ހުޅުމާލޭ ފަޅު ތެރެއިން ދޯނި ފެނިފައެވެ. އޭރު އަބްދުﷲ ވިސާމް ދޯނީގައި ހުއްޓެވެ. އެއީ މި މައްސަލައިގައި އިސްކޮށް އުޅުނުކަމުގެ ތުހުމަތުގައި ދައުވާކޮށް، ފަހުން ދައުވާ އަނބުރާ ގެންގޮސްފައިވާ މީހެކެވެ.

އޭނާގެ އިތުރުންވެސް އިތުރު ބަޔަކު ދޯނީގައި ތިބި ކަމަށާއި، އެމީހުން ބަލައި ފާސްކޮށްފައިވާކަމަށް ހެކިވެރިޔާ ވިދާޅުވިއެވެ.

ދެން ތިބި ދެ ހެކިންނަކީވެސް އެކަންކަން ސާބިތު ކުރުމަށް ހުށައަޅާފައިވާ ހެކިންކަމަށްވާތީ، އެމީހުންގެ ހެކިބަސް އިތުރަށް ނަގަން ބޭނުންނުވާކަމަށް ދައުލަތުގެ ވަކީލު ވިދާޅުވިއެވެ.

މި މައްސަލައިގައި ޑައިމޯފިން ޓްރެފިކް ކުރުމުގެ ދައުވާ ދައުލަތުން 10 މީހެއްގެ މައްޗަށް އުފުލިއެވެ. ނަމަވެސް އޭގެ ތެރެއިން 7 މީހަކަށް ކުރާ ޓްރެފިކިންގ ދައުވާ ފަހުން ދައުލަތުން ވަނީ އަނބުރާ ގެންގޮސްފައެވެ. އޭރު ދައުވާ ހުށައެޅިތާ އަހަރަކަށްވުރެ ގިނަ ދުވަސް ވަނީ ވެފައެވެ.

މިހާރު މި މައްސަލައިގައި ދައުވާ އުފުލާފައިވަނީ ޢިރުފާން ތަގިއްޔުއާއި، މުހައްމަދު އަކްރަމްގެ އިތުރުން، އަހުމަދު ނަސީރުގެ މައްޗަށެވެ. ދައުލަތުން ބުނާ ގޮތުގައި މަސްތުވާތަކެތި އުުފުލާފައިވާ ކާރަކީ އަކްރަމްގެ ހިޔާޒަތުގެ ދަށުގައިވާ ކާރެކެވެ. އަދި މަސްތުވާތަކެތި ގެނައި ލޯންޗަކީ ނަސީރު ދުއްވި ލޯންޗެއްކަމަށް ދައުލަތުން ބުނެއެވެ

މި މައްސަލައިގައި ދައުލަތުން 65 ޝަފަހީ ހެކިން ހުށައަޅާފައިވެއެވެ.

ދައުލަތުގެ ވަކީލު ވިދާޅުވީ، ދައުލަތުން ހުށައަޅާފައިވާ ކަންކަން ސާބިތު ކުރުމަށް ކާފީ ހެކި ލިބޭ މިންވަރަކަށް ބަލައި ހެކިން އަނބުރާ ގެންދަން ޖެހޭނަމަ ގެންދަވާނެ ކަމަށެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިބްރާހިމް އިޙްސާންއެވެ.