ޔޫވީ އަތުން ވެލެންސިއާ ބަލިވި ނަމަވެސް، ޒުވާން އީތަން އަށް މެޗު ޚާއްސަ

ދިވެހި ޕްރިމިއާ ލީގުގައި ޔުނައިޓެޑު ވިކްޓްރީ (ޔޫވީ)އާ ދެކޮޅަށް ކުޅުނު މެޗުން ކުލަބު ވެލެންސިއާ ބަލިވެއްޖެ އެވެ.

އަންގާރަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ޔޫވީން ކާމިޔާބު ކުރީ ފަހަތުން އަރައި 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެލެންސިއާ އިންނެވެ. މެޗުގެ 12 ވަނަ މިނެޓުގައި އެ ޓީމަށް ލީޑު ނަގައިދިނީ އީތަން އިބްރާހީމް ޒަކީ އެވެ. މި ލަނޑާއެކު އުމުރުން އެންމެ 14 އަހަރުގެ އީތަން އަށް ވަނީ ޚާއްސަ ޝަރަފެއް ލިބިފަ އެވެ. އެއީ ލީގުގައި މިހާތަނަށް ލަނޑު ޖެހި އެންމެ ހަގު ކުޅުންތެރިޔާގެ ޝަރަފެވެ. އީތަންގެ ކުރިން މި ޝަރަފު އޮތީ އޭނާއާ އެއް ޓީމަކަށް ކުޅެމުން އަންނަ އުމުރުން 15 އަހަރުގެ ޔޫސުފް އަޔާން އާމިރު އަތުގަ އެވެ. އަޔާން އެ ޝަރަފު ހޯދީ ލީގުގެ މީގެ ކުރިން ވެލެންސިއާ އިން ކުލަބް ގްރީން ސްޓްރީޓްސްއާ ދެކޮޅަށް ކުޅުނު މެޗުގައި ލަނޑު ޖަހައިގެންނެވެ.

މެޗުގައި ވެލެންސިއާ އިން އެއް ލަނޑުގެ ލީޑެއް ނަގާފައި ވަނިކޮށް ޔޫވީ އިން ނަތީޖާ ހަމަހަމަ ކުރީ ފުރަތަމަ ހާފުގެ 41 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ ޝަނާން ރަޝާދު އެވެ. ވެލެންސިއާ އަތުން ޔޫވީ މޮޅުވި ލަނޑު ޖެހީ ދެ ވަނަ ހާފުގަ އެވެ. މެޗުގެ 57 ވަނަ މިނެޓުގައި އެ ލަނޑު ޖަހައިދިނީ އަޙުމަދު ބައްސާމް މުޙައްމަދު ނައީމް އެވެ.

މޮޅާއެކު ޔޫވީ ވަނީ ލީގު ތާވަލްގެ ހަ ވަނަ އަށް ޖެހިލައިފަ އެވެ. އެއީ މިހާތަނަށް ކުޅުނު އަށް މެޗުން ހަ ޕޮއިންޓު ހޯދައިގެންނެވެ. ވެލެންސިއާ އަށް މިހާތަނަށް ލިބިފައި ވަނީ އެންމެ ޕޮއިންޓެކެވެ. މިވަގުތު އެ ޓީމު އޮތީ ވެސް ލީގު ތާވަލްގެ އެންމެ ފުލުގަ އެވެ.