ހުކުމް ތަންފީޒުކުރުން ފަސްކޮށްދިނުމަށް ޔާމީން އެދިވަޑައިގެންފި

ކުރީގެ ރައީސް އަބްދުﷲ ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމާއި ފަސް މިލިއަން އެމެރިކާ ޑޮލަރުގެ ޖޫރިމަނާގެ ހުކުމް ތަންފީޒު ކުރުން ފަސްކޮށްދޭން އެދިވަޑައިގެންފިއެވެ.

ކްރިމިނަލް ކޯޓުން އިއްވާފައިވާ ހުކުމް ތަންފީޒުކުރުން ފަސްކޮށްދޭން ޔާމީން އެދިވަޑައިގެންނެވީ އާދީއްތަ ދުވަހުގެ ރޭ ހައި ކޯޓުގައެވެ. މީގެ ކުރިން ހައި ކޯޓުގައި މި މައްސަލަ އިސްތިއުނާފު ކުރި އިރުވެސް ސިޓީއެއް މެދުވެރިކޮށް ހުކުމް ތަންފީޒު ކުރުން ފަސްކޯށްދޭން އެދިފައިވެއެވެ. ނަމަވެސް އެއީ ކޯޓުތަކުގެ އިޖުރާއަތުތަކާ އެއްގޮތަށް ހުށަހަހެޅި ހުށަހެޅުމެއް ނޫނެވެ. އިޖުރާއަތްތަކާ އެއްގޮތަށް އެދިފައިވަނީ އާދީއްތަ ދުވަހުގެ ރޭ ކަމަށް ހައި ކޯޓުން "ރާއްޖެ އެމްވީ" އަށް މައުލޫމާތު ދެއެވެ.

ވ. އާރަށު ހިޔާނާތުގެ މައްސަލައިގައި ރިޝްވަތު ނަންގަވައި، އެ ފައިސާ ލޯންޑަރ ކުރައްވާފައިވާތީ ޔާމީންގެ މައްޗަށް ކްރިމިނަލް ކޯޓުން 11 އަހަރުގެ ޖަލު ޙުކުމެއް އިއްވައި، 5 މިލިއަން ޑޮލަރުން ޖޫރިމަނާކޮށްފައިވަނީ މިދިޔަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.

އަންނަ މަހު ބާއްވާ ކުރީގެ ރިޔާސީ އިންތިޚާބަށް ރައީސް އަބްދުﷲ ޔާމީނުގެ ކެންޑިޑެސީ ބަލައިނުގަތުމަށް އީސީން ނިންމި ސަބަބުތަކުގެ ތެރޭގައިވެސް 11 އަހަރުގެ ޖަލު ޙުކުމާއި، އެ ޙުކުމާއެކު ދައްކަންޖެހޭ 5 މިލިއަން ޑޮލަރުގެ ސާބިތު ދަރަނި އޮތުން ހިމެނެއެވެ. 5 މިލިއަން ޑޮލަރުގެ ފައިސާ 6 މަސްތެރޭ ދައްކަންޖެހޭއިރު، އެ ފައިސާ ދެއްކުން ފަސްކުރުމުގެ އަމުރެއް ހައިކޯޓުން ނެރެފައިނުވާތީ، އެއީ ސާބިތު ދަރަންޏެއްކަމަށް ފަނޑިޔާރުން ނިންމެވިއެވެ.

ޙުކުމާ އެއްގޮތަށް ޖޫރިމަނާ ނުދައްކާހާ ހިނދަކު އެއީ ސާބިތު ދަރަންޏެއްކަން ފަނޑިޔާރުން ފާހަގަ ކުރެއްވިއެވެ. އަދި އިސްތިއުނާފު ކޮށްފައި އޮތުމަކީ ކޯޓުގެ ނިންމުމަކަށް ތަބާވާން ނުޖެހޭ ސަބަބެއް ނޫންކަމަށް ފަނޑިޔާރުން ވިދާޅުވިއެވެ. ޙުކުމުގައިވާގޮތަށް 6 މަސްތެރޭ އެ ފައިސާ ނުދެއްކުމުން، 3 ޖުލައި 2023 ގައި އެ ފައިސާ ދެއްކުމަށް ޔާމީނަށް މީރާއިން އަންގާފައިވާކަން ލިޔެކިއުންތަކުން އެނގޭކަމަށް ވެސް ފަނޑިޔާރުން ފާހަގަކުރެއްވިއެވެ. އެ ލިއުމުގައި ޔާމީނު ސޮއި ކުރައްވައި އިނގިލީގެ ނިޝާންވެސް ޖަހާފައިވެއެވެ.

ޖޫރިމަނާގެ ފައިސާ ނުދައްކާ އޮތުމުން އެ ފައިސާ ހޯދުމަށް ބަންޑާރަނައިބުގެ އޮފީހުން ވެސް ވަނީ ސިވިލް ކޯޓަށް މައްސަލައެއް ހުށަހަޅައިފައެވެ.