ކުރީގެ ރައީސް ޔާމީނަށް ޖާސޫސްކުރުމަށް އަދީބުގެ އަތުން ރައީސް މުއިއްޒު 14 މިލިއަން ރުފިޔާ ނެންގެވިކަމަށް ތުހުމަތުކޮށްފި
ޔާމީން ވަނީ އެއީ ވަރަށް ދަށް ފެންވަރުގެ ކަމެއް ކަމަށް ސިފަކުރައްވާފަ
ކުރީގެ ރައީސް އަބްދުﷲ ޔާމީން އަދި މިހާރުގެ ރައީސް ޑރ.މުހައްމަދު މުއިއްޒު
ކުރީގެ ރައީސް އަބްދުﷲ ޔާމީނަށް ޖާސޫސްކުރުމަށް ކުރީގެ ނައިބު ރައީސް އަހުމަދު އަދީބުގެ އަތުން ރައީސް ޑރ.މުހައްމަދު މުއިއްޒު 14 މިލިއަން ރުފިޔާ ނެންގެވިކަމަށް ތުހުމަތުކޮށްފިއެވެ.
ހޯމަ ދުވަހުގެ ރޭ ބޭއްވި ޖަލްސާގައި ކުރީގެ ކޮމާންޑަރު ކެޕްޓަން އަހުމަދު ފަޔާޒު އަލީ ރިޒާ (ޕާޕާ) ވަނީ 2016 ވަނަ އަހަރު ކުރީކޮޅު ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ހައްޔަރުކުރުމަށް ސައްޚަ ނޫން ކޯޓު އަމުރެއް ނެރުމަށް މަސައްކަތް ކުރި ކުރުމުގެ ފަހަތުގެ ކުރީގެ މެމްބަރުންނާއި ސިޔާސީ ބައެއް ބޭފުޅުންނާއި، ފުލުހުންގެ އިސް ބައެއް ވެރިން ތިބިކަމަށް ވިދާޅުވެފައެވެ. އެގޮތުން ކުރީގެ ކޮމިޝަނަރ އޮފް ޕޮލިސް އަހުމަދު އަރީފާއި، ކުރީގެ ކޮމިޝަނަރ އޮފް ޕޮލިސް އަބްދުﷲ ރިޔާޒު އާއި، މާމިގިލީ ކޯޓުގެ އޭރުގެ އިސް މެޖިސްޓްރޭޓާއި، ކުރީގެ ޕީޖީ މުހުތާޒް މުހުސިން އާއި ޤާސިމް އިބްރާހިމްގެ ދަރިކަލުން ސިޔާދު ޤާސިމް އާއި ކުރީގެ މެމްބަރު އިލްހާމް އަހުމަދު އާއި ކުރީގެ އެސިސްޓެންޓް ކޮމިޝަނަރުންނާއި ފުލުހުންގެ އިސް މަޤާމުތަކުގައި ތިބި ބައެއް އެހެން މީހުން ވެސް އެކަމުގައި ބައިވެރިވެފައިވާ ކަމަށް އޭނާ ވިދާޅުވިއެވެ. އަބްދުﷲ ރިޔާޒްގެ ފޯނު ކޯޓު އަމުރެއްގެ ދަށުން ބެލުމުން ގިނަ ކަންތައްތަކެއް އެނގިގެން ދިޔަކަމަށް އޭނާ ވަނީ ވިދާޅުވެފައެވެ.
ކުރީގެ ނައިބު ރައީސް އަދީބު ހައްޔަރުކުރުމާއި ގުޅޭ ގޮތުން ކެބިނެޓް މީޓީންގައި އާއި އެހެނިހެން ޕްލެޓްފޯމްތަކުގައި ކުރީގެ ރައީސް ޔާމީން ދައްކަވާ ވާހަކަތައް އަދީބާއި ހަމައަށް ގެންގޮސްދިނީ މިހާރުގެ ރައީސް ޑރ.މުއިއްޒު ކަމަށް އޭނާ ވިދާޅުވިއެވެ. އޭނާ ވަނީ މުއިއްޒު އަކީ ޢައްދާރެއް ކަަމަށް ސިފަކުރައްވާފައެވެ. މިއަދުވެސް މުއިއްޒުގެ ކިބައިން ތެދުވެރިކަމެއް ނުފެންނަ ކަމަށް އޭނާ ވިދާޅުވިއެވެ. ރައީސްކަމުގައި ހުންނަވައިގެން ޔާމީން އޭރު ދެއްކެވި ހުރިހާ ވާހަކައެއް ކުރީގެ ސީޕީ ރިޔާޒް އާއި އޭސީޕީ މަންނާނު އާއި ދެ ބޭފުޅުންނާއި މުއިއްޒު ވަނީ ހިއްސާކުރައްވާފައި ކަމަށް އޭނާ ވިދާޅުވިއެވެ.
އެކަމާއި ގުޅިގެން ކުރީގެ ރައީސް ޔާމީން ވަނީ އަދީބުގެ އަތުން ރައީސް މުއިއްޒު 14 މިލިއަން ރުފިޔާ ނަގައިގެން މައުލޫމާތު ފޯރުކޮށްދެމުން ދިޔައީ ޖާސޫސެއްގެ ގޮތަށް ކަމަށާއި އެކަހަލަ މީހުންނަށް ކިޔަނީ "މޯލް" ކަމަށް މުއިއްޒު ވިދާޅުވިއެވެ. ޔާމީން ވަނީ އެއީ ވަރަށް ދަށް ފެންވަރުގެ ކަމެއް ކަމަށް ސިފަކުރައްވާފައެވެ. ވަޒީރަކަށް ހުންނަވައިގެން، ރައީސް އިތުބާރުކުރައްވާ މަޤާމެއްގައި ހުރެގެން އެފަދަ ކަމެއް ކުރުމުން ފާޑު ވިދާޅުވެފައެވެ. މަނީލޯންޑްރިން އާއި ބެހޭ ޤާނޫނުގެ ދަށުން 2 ލައްކަ ރުފިޔާ އަށް ވުރެ ބޮޑުކޮށް ޤާނޫނާއި ޚިލާފަށް ލިބޭ ފައިސާ އަކީ ރިޝްވަތުކަމަށް ޤަބޫލުކުރެވޭ ކަމަށް ކުރީގެ ރައީސް ޔާމީން ވިދާޅުވިއެވެ. އެހެންނަމަވެސް އެކަމާއި މެދު ދައުވާކުރުން އޮންނަނީ އޭރެއްގައި ހުންނަ ޕީޖީއެއްގެ އަތްމަތީގައި ކަމަށް އެ މަނިކުފާނު ވިދާޅުވިއެވެ. 14 މިލިއަން މުއިއްޒު ނެންގެވި ގޮތަކީ މަނީ ލައުންޑަރކުރުން ކަމަށް ނުބެލޭނެ ގޮތަކީ ނެތްގޮތެއް ކަމަށް ވެސް ކުރީގެ ރައީސް ޔާމީން ވިދާޅުވިއެވެ.
މި މައްސަލައިގައި އިސްކޮށް ތިބި މީހުން މިހާރު ސަރުކާރުގެ އިސް މަޤާމުތަކުގައި ތިބި ކަމަށާއި އެހެންކަމުން މި ސަރުކާރުގެ އިސްކޮށް ތިބި މީހުންގެ ބައިވެރިވުން އެކަމުގައި އެބައޮތްކަން އެނގޭ ކަމަށް ޔާމީން ވިދާޅުވިއެވެ. މިކަމާއި ގުޅޭ ރިޕޯޓަކީ ފޭކް ރިޕޯޓެއް ކަމަށް ފުލުހުން ބުނި ނަމަވެސް އެ މިންވަރުން ނުފުދޭ ކަމަށް ޔާމީން ވިދާޅުވިއެވެ. މީގެ އިތުރުން ޕީޖީ ކަމުގައި ހުންނެވި އިރު މުހުތާޒް އަދީބަށް ދައުވާ ނުކުރުމަށް މަސައްކަތް ކުރެއްވި ކަމަށް އޭނާ ވިދާޅުވިއެވެ. ޕީޖީ ބޭނުން މައްސަލަ އެއްގައި ދައުވާކުރުމާއި ނުކުރުމުގެ އިޚްތިޔާރު އޮންނާތީ އެކަމާއި މެދު ކުރީގެ ރައީސް ޔާމީން ވަނީ ކަންބޮޑުވުން ފާޅުކޮށްފައެވެ.
