ރައްޔިތުން ތިބީ ހާލުގައި، ސަރުކާރުން ފިކުރިއްޔާތުގެ ވާހަކަ ދެއްކުން ހުއްޓާލަން ވެއްޖެ - ޔާމީން
ސަރުކާރަށް ވައުދުތައް ނުފުއްދިގެން އުޅެނިކޮށް އިތުރު ވައުދުތައް ވުމަކީ ހަމަޖެހޭ ކަމެއް ނޫންކަމަށް ރައީސް ޔާމީން ފާހަގަކުރައްވާފައިވޭ
ކުރީގެ ރައީސް އަބްދުﷲ ޔާމީން
ރައްޔިތުން ތިބީ ވަރަށް ހާލުގައި ކަމަށާއި ސަރުކާރުން ފިކުރިއްޔާތުގެ ވާހަކަ ދެއްކުން ހުއްޓާލަން ވެއްޖެކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ ޕީއެންއެފް ޖަލްސާގައި ވާހަކަދައްކަވަމުންނެވެ.
ރައްޔިތުން މިއަދު ދަތި ހާލުގައި ތިއްބާ ސަރުކާރުން ފިކުރިއްޔާތު ދިރުވާ ވާހަކަ ދެއްކުމަކީ ބަލައިގަނެވޭ ކަމެއް ނޫންކަމަށް ފާހަގަކުރައްވާ އެކަމަށް އެ މަނިކުފާނު ވަނީ ވަރަށް ބޮޑަށް ފާޑު ވިދާޅުވެފައެވެ.
މީގެ އިތުރުން ސަރުކާރުން އުޅޭނީ އަދިވެސް ސަރުކާރުގެ މާލީ ކަންކަން މެނޭޖްކުރަން ނޭނގިގެން ކަމަށް އެ މަނިކުފާނު ވަނީ ވިދާޅުވެފައެވެ. ސަރުކާރުން ޢަމަލުކުރަމުން ދަނީ ރައްޔިތުންގެ މަސްލަހަތަށް އިސްކަން ދީގެން ނޫންކަމަށް ވެސް އެ މަނިކުފާނުވަނީ ވިދާޅުވެފައެވެ. ހަމައެހެންމެ އާއްމު ރައްޔިތުންނަށް އިގްތިސާދު ދަށްވުމުގެ އަސަރުކުރަމުންދާ ކަމަށާއި އާއްމުންގެ ދިރިއުޅުމުގެ ހާލަތު ދުވަހުން ދުވަހަށް ދަނީ ދަށަށް ކަމަށް އެ މަނިކުފާނު ވިދާޅުވިއެވެ. ރައީސް ޔާމީން ވަނީ ދިވެހިން ތިބީ ބަނޑަށްޖެހިފައި ކަމަށް ސިފަކުރައްވާފައެވެ.
އެ ޖަލްސާގައި އާސަންދައިން ބޭނުންވާ މުހިންމުކަންކަން ކަނޑާލުމަށް ފަހު ސަރުކާރުން އާސަންދަ މެދުވެރިކޮށް ދުންފަތް ހުއްޓާލުމަށް މަސައްކަތް ކުރާ މީހުންނަށް ބޭނުންވާ ފަރުވާ ބޭނުންވާނެ ކަމަށް ބުނާތީ އެކަމަށް ވެސް ރައީސް ޔާމީން ފާޑު ވިދާޅުވިއެވެ. އެގޮތުން އާއްމުންނަށް ބޭނުންވާ ޒަރޫރީ ފަރުވާތައް ކަނޑާލުމަށް ފަހު އެކަން ކުރުން އެއީ އެންމެ ރަނގަޅު ގޮތްތޯ ވަނީ ސުވާލު އުފައްދަވާފައެވެ.
އާއްމުންނަށް ލިބިފައިވާ ހައްގުތައް ވެސް ސަރުކާރުން ދަނީ ހަނިކުރަމުން ކަމަށް އެ މަނިކުފާނު ވަނީ ވިދާޅުވެފައެވެ. އެގޮތުން ޚިޔާލުފާޅުކުރުމުގެ މިނިވަންކަން ހަނިކޮށް ޚިޔާލުފާޅުކުރާ މީހުން އިދާރާތަކަށް ހާޒިރުކުރަމުންދާ ދިއުމަށް އެ މަނިކުފާނު ވަނީ ފާޑު ވިދާޅުވެފައެވެ.
ޕީއެންއެފްގެ ޖަލްސާގައި ވާހަކަދައްކަވަމުން މަސްވެރިން މަސްކިރާތާ 48 ގަޑި އިރުތެރޭ ފައިސާ ލިބޭނެ ކަމަށް ރައީސް ޑރ މުހައްމަދު ވެވަޑައިގެންނެވި ވައުދު އަނެއްކާވެސް ތަކުރާރުކުރައްވާފައިވާ އިރު އެ ވައުދު ނުފުދި އޮތުމުން ރައީސް ޔާމީްނ ވަނީ އެކަމަށް ފާޑު ވިދާޅުވެފައެވެ. އަދި ސަރުކާރަށް ވައުދުތައް ނުފުއްދިގެން އުޅެނިކޮށް އިތުރު ވައުދުތައް ވުމަކީ ހަމަޖެހޭ ކަމެއް ނޫންކަމަށް ފާހަގަކުރައްވާފައިވެއެވެ.
