ވޯޓްލުމުގެ ކުރިން ދ. މާއެނބޫދޫ ބިން ހިއްކުމުގެ އަމަލީ މަސައްކަތް ފެށިގެންދާނެ: ރައީސް

ރިޔާސީ އިންތިޚާބުގެ ވޯޓްލުމުގެ ކުރިން ދ. މާއެނބޫދޫ ބިން ހިއްކުމުގެ އަމަލީ މަސައްކަތް ފެށިގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

ދ. މާއެނބޫދޫއަށް ވަޑައިގެން ބޭއްވެވި ބަނދަރު ބައްދަލުވުމުގައި ރައީސް ވިދާޅުވީ، އެންމެ ފުރަތަމަވެސް ރަށަށް ވަޑައިގަތުމުން ރައްޔިތުން އެދުނީ ބިންހިއްކުމަށް ކަމަށާއި، މިހާރު ކޮންޓްރެކްޓަރާ މަސައްކަތް ހަވާލުކުރެވިފައި ވާކަމަށެވެ.

ދ. މާއެނބޫދޫ ބިން ހިއްކުމުގެ މަޝްރޫއުގެ އެއްބަސްވުމުގައި ޕްލޭނިންގ މިނިސްޓްރީން އެމްޓީސީސީއާއެކު ސޮއިކުރީ މިއަހަރުގެ ޖުލައި މަހުގެ ތެރޭގައެވެ. ދ. މާއެނބޫދޫއިން ވެސް 15 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. އަދި މި މަޝްރޫއު ނިންމަން ހަމަޖެހިފައިވަނީ 300 ދުވަހުގެތެރޭގައެވެ. މާއެނބޭދޫގައި މި މަޝްރޫއު ކުރިއަށް ގެންދަން ނިންމާފައިވަނީ 82،903.165.20 (އަށްޑިހަ ދެ މިލިޔަން ނުވަ ލައްކަ ތިން ހާސް) ދިވެހި ރުފިޔާއަށެވެ.

ރައީސް ވިދާޅުވީ ކުރިއަށް އޮތް ދައުރުގައި ރަށުގައި ހިއްކާ ބިމުގައި ރައްޔިތުންނަށް ރޯ ހައުސް އަޅުއްވައިދެއްވާނެ ކަމަށާއި، ސިއްހީ މަރުކަޒަކީ 24 ގަޑިއިރު ޚިދުމަތް ދޭނެ ކަމަށެވެ. އަދި ވޮލީ ކޯޓް ވެސް ތަރައްގީކޮށްދެއްވާނެ ކަމަށާއި ސެން ކްލާސްރޫމުގެ މަސައްކަތްވެސް ކޮށްދެއްވާނެ ކަމަށް ވިދާޅުވިއެވެ.

ރިޔާސީ އިންތިޚާބަކީ ވަރަށް މުހިންމު އިންތިޚާބެއްކަމަށާއި ރައްޔިތުންނަށް ބޭނުންވާ އަސާސީ ބައެއް ޚިދުމަތްތައް ނިމި، އަނެއްބައި މަސައްކަތްތައް ކުރިއަށްދާ ކަމަށްވެސް ވިދާޅުވިއެވެ. އަދި ވެރިކަމަށް އަންނަ މީހެއްގެ އެހެން ސިޔާސަތެއް އޮތްކަމަށްވާނަމަ އެ މަޝްރޫއުތައް ހުއްޓުމަކަށް އަންނާނެ ކަމަށްވެސް ވިދާޅުވިއެވެ. އެހެންކަމުން ރައީސް ވަނީ އެމަނިކުފާނަށް ވޯޓުދީ، ކޯލިޝަނަށް ތާއީދުކުރުމަށް މާއެނބޫދުގެ ރައްޔިތުންގެ ކިބައިން އެދިވަޑައިގެންފައެވެ.